1 Rĩm-dãmbã 10 - WẼNNAAM SEBRE 2014

Seba rĩm-poakã tɩ gesa a Salmo

¹ Rĩm-poak a yembr sẽn yit Seba wʋmame tɩ b gomd rĩm a Salmo yʋʋrã sẽn yi wã yelle. Dẽ, a wa n na n maka a Salmo ne yel-bũna.

² Seba tẽng rĩm-poakã kẽnga Zeruzalɛm ne a poorẽ dãmb wʋsgo. B waa ne yʋgma sẽn zɩt parfẽ-rãmb sẽn tar yũ-noogo, ne sãnem wʋsgo, la kug-sõama. La a sẽn ta rĩm a Salmo nengẽ, a soka a Salmo sokds nins fãa sẽn dag n be a sũurẽ.

³ Rĩm a Salmo leoka rĩm-poakã sokdsã fãa. La sokr baa a yembr ka zĩnd rĩm a Salmo sẽn ka tõog n leok ye.

⁴ Seba tẽng rĩm-poakã sẽn yãnd rĩm a Salmo sẽn tar yam to-to wã, la a yã roog ning rĩmã sẽn me wã,

⁵ ne rɩ-nood nins sẽn be rĩmã taabl zugã, la rĩmã tʋmtʋmdbã rotã sẽn yaa to-to wã, ne sõgen-kambã sẽn tʋmd to-to wã, la b yer fut ninsã, ne b sẽn get rĩmã bõn-yũudlã yell to-to wã, la maand sẽn yõogd bugmã rĩmã sẽn maand Sẽn-Ka-Saab roogã pʋgã, a maka goam n konge.

⁶ Dẽ, a yeela rĩmã yaa: «Mik mam sẽn dag n bee m tẽngẽ wã n wʋmd b sẽn gomd yãmb yellã, ne y yamã yellã sɩd yaa sɩda!

⁷ Sã n ka mam sẽn wa tɩ m ninã yãndã, mam dag n ka sak n deeg tɩ yaa sɩd ye. Mam sẽn dag n wʋmdã ka ta mam sẽn yã wã pʋɩ-sʋk meng ye. Yãmb yamã ne y arzegsã yɩɩda mam sẽn dag n wʋm tɩ b gomd to-to wã.

⁸ Neb nins sẽn be ne yãmbã, ne neb nins sẽn tʋmd ne yãmb daar fãa wã yaa zu-nood-rãmba. Bala, bãmb bee ne yãmb n wʋmd yãmb yam goamã wakat fãa!

⁹ Bɩ Sẽn-Ka-Saab sẽn yaa yãmb Wẽnnaamã paam pẽgre, bala, taa bãmb yam tɩ b yãk yãmb n kɩt tɩ y yɩ Israyɛll rĩmã! Yaa Sẽn-Ka-Saab sẽn nong Israyɛll nebã wakat fãa yĩngã n kɩt tɩ bãmb yãk yãmb tɩ y yɩ rĩmã, n kaood bʋʋdã ne sɩda, la ne tɩrlem.»

¹⁰ Rẽ poore, Seba tẽng rĩm-poakã kõo rĩm a Salmo sãnem kɩlo tus a naas la kobessi, ne parfẽ-rãmb wʋsg sẽn tar yũ-noog wʋsgo, la kug-sõama. Ned ka tol n leb n wa ne parfẽ-rãmb wʋsg sẽn tar yũ-noog a woto wa Seba tẽng rĩm-poakã sẽn wa n kõ rĩm a Salmo wã ye.

¹¹ A Hiram koom kogl-bɛdã sẽn da kẽnd Ofɩɩr tẽng n wat ne sãnemã me talla ra-sõama ne kug-sõama wʋsg n wa kõ rĩm a Salmo.

¹² Rĩm a Salmo rɩka ra-sõmy wã n pees ra-kʋgs Sẽn-Ka-Saab roogã ne na-yirã yĩnga, la b maana kʋl buud toay-toayã, yɩɩn-yɩɩndbã yĩnga. La hal tɩ ta rũndã, b ka tol n leb n wa ne ra-sõmy wʋsg a woto buud Israyɛlle, la ned me ka leb n yãnd a buud ye.

¹³ Rĩm a Salmo kõo Seba rĩm-poakã bũmb nins fãa a sẽn date, la a sẽn kose, n paas kũun a taaba, wa sẽn zems rĩm sẽn ta yẽnda a Salmo wã sẽn tog n kõ. Rẽ zugẽ, Seba rĩm-poakã ne a poorẽ dãmbã lebg n kuila b tẽngẽ.

Rĩm a Salmo arzegse

¹⁴ Yʋʋmd fãa, b rag n wat n kõta rĩm a Salmo sãnem kɩlo tus pisi la a tãab la kobs-tã la piiga,

¹⁵ n paas ne yaood nins yẽnda sẽn deegd toandbã ne lɛɛbdbã nengẽ wã, la ne soolem-dãmb a taabã rĩm-dãmba, wall tẽngã kombɛɛmbã sẽn wat n yaood yaood ninsã.

¹⁶ Rĩm a Salmo kɩtame tɩ b kud sãnem gãn-bɛd kobessi, la a yembr fãa yaa sãnem zɩslem sẽn tat kɩlo a yoob la b tall n maane.

¹⁷ La rĩm a Salmo leb n kɩtame tɩ b kud sãnem gãn-bãooneg kobs-tã, la a yembr fãa yaa sãnem zɩslem sẽn tat kɩlo a ye la pʋɩ-sʋk la b tall n maane. La a bĩnga bãmb roog ning b sẽn boond tɩ Libã tɩɩs roogã pʋga.

¹⁸ Rĩm a Salmo kɩtame tɩ b maan geer sẽn yaa bedre, ne wobd yẽna, n bolg-a ne sãnem halaale.

¹⁹ Geerã dag n tara rʋʋdg sẽn tar kogs a yoobe. Geerã rellgã zĩigẽ dag n yaa gilga. B maana nus rogends geerã kɩrems a yiibã fãa, la b maan gɩgma a yiib tɩ b yas yĩngr n yegl nus rogendsã, a yembr goabga, a yembr dɩtgo.

²⁰ La b maana gɩgma piig la yiibu, tɩ b yas yĩngri. Rʋʋdgã koak fãa zugu, gɩgma a yiib n yas goabg la a rɩtgo. Soolem a to ka tol n maan bũmb a woto buud ye.

²¹ Lagd nins rĩm a Salmo sẽn dag n tar n yũudã maana ne sãnem, la teed nins fãa sẽn dag n be roog ning b sẽn boond tɩ Libã tɩɩs roogã pʋgẽ wã maana ne sãnem halaale. Bũmb dag n ka be beenẽ sẽn maan ne wanzuri ye. Bala, rĩm a Salmo zamaanẽ wã, b rag n ka geelgd wanzuri wa bũmb sẽn tar yõod wʋsg ye.

²² Bala, rĩmã rag n tara koom kogl-bɛd sẽn yit Tarsɩɩs yʋʋm a tãab fãa, n tũud a Hiram koom kogl-bɛdã n wat ne sãnem, wanzuri, wobd yẽna, la wãams ne bulwãado.

²³ Rĩm a Salmo arzegsã ne a yamã rag n yɩɩda dũniyã rĩm-dãmbã fãa.

²⁴ Dũniyã ween-vɩɩs a naasã fãa neb rag n baood n yãnda rĩm a Salmo, sẽn na yɩl n wʋm a yam goamã Wẽnnaam sẽn kõ-a wã.

²⁵ La yʋʋmd fãa, nin-kãensã ned kam fãa sã n dag n watẽ, a zãada a kũuni. Yaa wanzuri teedo, sãnem teedo, futu, zab-teedo, parfẽ-rãmb sẽn tar yũ-noogo, la wiid ne bõense.

Rĩm a Salmo wiid ne a saar-dãmba

²⁶ Rĩm a Salmo tigma saar-dãmb ne wiid wʋsgo. A Salmo rag n tara saar-dãmb tusr la kobs-naase, la wed-rʋʋdb tus piig la a yiibu. Rĩm a Salmo yãka tẽms tɩ yaa saar-dãmbã ne wiidã bĩngr zĩiga, la a ning kẽer Zeruzalɛm pʋgẽ n pẽneg a menga.

²⁷ Rĩmã kɩtame tɩ wanzuri wã lebg wʋsg wa kug Zeruzalɛm pʋgẽ, la a kɩt tɩ sɛɛdr tɩɩsã raad lebg wʋsg wa wom-seesã sẽn be kunkubẽ wã.

²⁸ Rĩm a Salmo rag n tara toandb tɩ b tũud taab sull-sull n kẽnd Ezɩpt ne Silisi tẽng n daad wiidã n watẽ. B rag n daad-b-la wa b ligdã sẽn zem to-to wã.

²⁹ Saar a yembr ligd yaa wanzuri kɩlo a nu la pʋɩ-sʋka, la weef a yembr ligd yaa wanzuri kɩlo a yiib la pʋɩ-sʋka. Rĩmã toandb rag n wata ne wiid me n koosd ne Hɛt la Siiri rĩm-dãmbã.