1 Pɩyɛɛr 5 - WẼNNAAM SEBRE 2014

Bɩ y gũ Wẽnnaam piisi

¹ Dẽ, mam sagenda kãsem-dãmbã sẽn be yãmb sʋkã, mam me sẽn yaa kãsem wa bãmbã, la m ya Kiris namsgã kaset soabã, la m ya pʋɩt-n-taag ne Kiris ziirã sẽn na n wa pukã yĩnga.

² Rɩlg-y Wẽnnaam piisã sẽn be ne yãmbã. La ka ne modgr ye, yaa ne yamleoogo wa sẽn zems Wẽnnaam daabã. La ka paoong ratem yĩng ye, yaa ne sũur sẽn yaa sõama.

³ La ka tɩ y soog nebã b sẽn gũnug yãmbã ne pãng ye, la yaa tɩ yãmb na yɩ mamsg wʋsg piisã yĩnga.

⁴ La Pe-kɩɩmbã kãsem sã n wa puki, yãmb na n paama maanf sẽn tar ziiri, la sẽn ka sãamd ye.

⁵ Woto me, kom-bɩɩse, sak-y kãsem-dãmbã. La bɩ yãmb fãa paam sik-m-menga, yãmb ne taab sʋka. Bala, Wẽnnaam kɩɩsda wuk-m-mens rãmbã, la b ningd sik-m-mens rãmbã zut barka.

⁶ Dẽ wã, sik-y y mens Wẽnnaam sẽn yaa pãng soabã taoore, tɩ bãmb tʋlsmã wakat sã n ta, bɩ bãmb zẽk yãmba.

⁷ Sik-y yãmb yɩɩrã fãa n bas ne bãmba, bala, bãmb n get yãmb yelle.

⁸ Yɩ-y neb sẽn tar yam! Gũus-y-yã! Yãmb bɛyã sẽn ya a Sʋtãan gõodame n kelemd wa gɩgemde, n baood a sẽn tõe n paam a soab n sãame.

⁹ Kɩɩs-y-yã-a, n yals tẽebã pʋg kãenkãe, la y bãng tɩ namsg a woto buud me namsda yãmb ba-biisã sẽn be dũniyã pʋgã.

¹⁰ Yãmb sã n nams wakat bilf pʋgẽ, Wẽnnaam sẽn so bark fãa wã, sẽn bool-a yãmb tɩ y wa paam pʋɩɩr ne ziir ning sẽn kõn sa a Zeezi Kiris maasem yĩngã, bãmb menga na n zãmsa yãmba, n paas yãmb pãnga, n kɩt tɩ yãmb kɩ yẽga, la b kɩt tɩ yãmb yɩ neb sẽn ka vigsd ye.

¹¹ Bɩ pãngã yɩ bãmb dẽnd zamaan woo zamaane! Ãmina.

Yaoolem pʋʋsem

¹² Yaa ne tõnd ba-biig a Sɩlvẽ sẽn yaa sɩd soabã nug la mam gʋlsd seb-bi-kãngã n na n tʋm yãmba, la m sagl-yã, la m wilg-y tɩ yãmb sẽn be bark ning pʋgã n ya Wẽnnaam bark meng-menga.

¹³ A Kiris tẽedbã sẽn be Babilondã, ne m biig a Mark me pʋʋsda yãmba.

¹⁴ Pʋʋs-y taab n mok taab ne nonglem mokre. Bɩ Yãmb fãa sẽn tũud Kirisã paam laafɩ!