1 Pɩyɛɛr 4 - WẼNNAAM SEBRE 2014

Wẽnnaam kũun yel-gɛtba

¹ Dẽ wã yĩnga, Kiris sẽn nams b yĩnga pʋgẽ wã yĩnga, bɩ yãmb me paam tagsg a yembr ne bãmba. Bala, ned ning sẽn nams a yĩngã pʋg basa yel-wẽnã,

² tɩ wakat ning sẽn ket yẽnda sẽn na n vɩɩmd a yĩngã pʋgã, yẽnda kõn leb n vɩ wa sẽn zems ninsaal datem ye, la a na n vɩɩmda wa sẽn zems Wẽnnaam datem.

³ Sɩd me, wakat sẽn looge, yãmb dag n maanda wa neb nins sẽn ka pʋʋsd Wẽnnaamã sẽn maandã. Yaa n sekame. Yãmb dag n kẽnda raglem pʋga, ratem wẽnse la yũ rãam n tuumdẽ wã pʋga, la rã-tɩgrã ne yão-beedã pʋga, la wẽn-naandsã pʋʋsg sẽn yaa bõn-wẽng wʋsgã pʋga.

⁴ Yãmb sẽn ka leb n naagd neb nins sẽn ka pʋʋsd Wẽnnaamã n maand tʋʋm-dẽgd kãensã, a linga bãmb tɩ b kãnegd yãmba.

⁵ Bãmb na n yals n togsa b yɛlã soab ning sẽn segl n sɛ n na n kao nin-vɩɩs la kũum bʋʋdã taoore.

⁶ Sɩd me, yaa rẽ yĩng n kɩt tɩ b moon koe-noogã neb nins sẽn ki wã me, tɩ ninsaalbã sẽn kao bãmb bʋʋd wa sẽn zems yĩngã rẽndã, bɩ Wẽnnaam nifẽ bãmb na vɩ sɩɩg pʋgẽ.

⁷ Bũmb fãa sɛɛb wakat kolgame. Dẽ wã yĩnga, yɩ-y neb sẽn tar yam la gũus-m-mens-rãmba, n kẽng taoor ne pʋʋsgo.

⁸ La sẽn deng bũmb fãa, nong-y taab daar fãa. Bala, nonglem luta yel-wẽn wʋsgo.

⁹ Maan-y taab sãando, tɩ yẽgeng kaẽ ye.

¹⁰ Yãmb ned kam fãa sẽn deeg kũunã, rɩk-y-b n tʋm n sõng neb a taaba, wa Wẽnnaam barkã kũun toay-toayã yel-gɛtb sẽn yaa sõama.

¹¹ Ned sã n gomda, bɩ a gom wa sẽn zemsd Wẽnnaam goamã sẽn yetã. Ned sã n sõngdẽ, bɩ a sõng wa sẽn zemsd pãng ning Wẽnnaam sẽn kõ-a wã, tɩ Wẽnnaam sẽn so ziiri la pãng wakat sẽn kõn sa wã paam waoogr bũmba fãa pʋga, a Zeezi Kiris maasem yĩnga. Ãmina!

Namsgo, fo sẽn yaa Wẽnnaam nedã yĩnga

¹² Mam zo-nongdse, ra sak-y tɩ nams-toaag ning sẽn be yãmb sʋk n makd yãmbã yɩ lingr ne yãmba, tɩ yaa wa yaa yel-sãang n paamd yãmb ye.

¹³ Ka tog n yɩ a woto ye, maan-y sũ-noogo, yãmb sẽn paam pʋɩɩr ne Kiris namsgã yĩnga, tɩ yãmb tõe n maan sũ-noog n kɩdem wakat ning bãmb ziirã sẽn na n pukã.

¹⁴ Bark bee yãmb zugu, nebã sã n nams yãmb Kiris yʋʋrã yĩnga, bala, Sɩɩg ning sẽn be ziirã sẽn yaa Wẽnnaam Sɩɩgã bee yãmb zutu.

¹⁵ Bɩ yãmb ned baa a yembr da paam namsg a sẽn yaa nin-kʋʋd yĩnga, wall wagdr yĩnga, wall tʋʋm-wẽns maand yĩnga, wall a sẽn yaa ned sẽn kẽed yɛl sẽn ka pak-a yĩng ye.

¹⁶ La ned sã n paamd namsgo, a sẽn yaa Kiris tẽed yĩnga, bɩ a ra zoe yãnd ye, a pẽg Wẽnnaam, b sẽn boond yẽnda tɩ Kiris tẽedã yĩnga.

¹⁷ Bala, moasã yaa wakat b sẽn na n sɩng bʋʋdã kaoob ne Wẽnnaam nebã. La sã n mikame tɩ yaa ne tõnd la b na n sɩng bʋʋdã kaoobo, neb nins sẽn ka sakd-b Wẽnnaam koe-noogã baoosg na yɩɩ a wãna?

¹⁸ La sã n yaa tɩ nin-tɩrg fãagr paoong yaa toogo, dẽ ned ning sẽn yaa wẽn-kɩɩsd la yel-wẽn-maandã yell na n yɩɩ a wãna?

¹⁹ Rẽ wã yĩnga, bɩ neb nins sẽn paamd namsg wa sẽn zems Wẽnnaam tʋlsmã rɩk b sɩɩsã n bas Wẽnnaam sẽn yaa naanda la sɩd soabã nugẽ, n kell n maan neere.