1 Korẽnt rãmba 8 - WẼNNAAM SEBRE 2014

Yi-kãadem yelle

¹ Sã n yaa ne maand nins sẽn kʋ tẽn-kugã nemdã yelle, tõnd fãa miime tɩ d tara bãngre. (Bãngr wata ne wuk-m-menga, la nonglem sõngdame.

² Ned sã n tagsd t'a mii bũmbu, a ket n ka mi tɩ sek ye.

³ La ned sã n nong Wẽnnaam, Wẽnnaam mi-a lame).

⁴ Sã n yaa ne maandã b sẽn kʋ wẽn-naandsã nemd wãbr yelle, tõnd miime tɩ wẽn-naandg ka be dũni ye, la tɩ Wẽnnaam a yembr bal n be.

⁵ Bala, baa ne bũmb nins sẽn be yĩngr wall tẽng zug tɩ b boond tɩ wẽnnaam-dãmbã (la wẽnnaam-dãmbã ne zu-soben-dãmba sõor waooga).

⁶ Ne tõndo, Wẽnnaam a yembr bal n be, n yaa ba. Bũmb fãa yita bãmb nengẽ, tõnd yaa bãmb dẽnda. La zu-soab a yembr tãa n be, a Zeezi Kirisi, soab ning maasem yĩng bũmb fãa sẽn be, la tõnd sẽn be.

⁷ La ka nebã fãa n mi bõn-kãng ye. Sɩd me, neb kẽer yam sẽn ket n togl wẽn-naandsã wãbda nem-kãens sẽn yɩ maoongã. La bũmb‑kãng rẽgemda bãmb sũ-bãngrã sẽn ka pãngã.

⁸ Ka rɩɩb n na n pẽneg tõnd ne Wẽnnaam ye: Tõnd sã n ka rɩt-a, bũmb ka paoog tõnd ye. La tõnd sã n dɩt-a, a ka paasd tõnd fʋɩ.

⁹ Baoosgo, bɩ y gũus tɩ yãmb lohormã da wa n lebg kug-lakdg neb nins sẽn ka pãnga yĩng ye.

¹⁰ Bala, ned sã n yãnd foom a tar bãngrã tɩ f zĩ wẽn-naandg karen-doogẽ n dɩtẽ, rẽ yĩnga, a sũ-bãngrã sẽn ka pãngã ka na n kɩt t'a me wãb maand sẽn kʋ wẽn-naandsã nemdo?

¹¹ Woto, fo bãngrã kɩtame tɩ ka pãng soabã, ba-biig ning Kiris sẽn ki a yĩngã sãame.

¹² Fo sã n maan yel-wẽnd a woto n beeg f ba-biisã, tɩ b sũ-bãngrã sẽn ka pãngã lak foom, fo beega Kirisi.

¹³ Yaa woto n kɩt tɩ rɩɩb sã n yaa kug-lakdg m ba-biig yĩnga, mam kõn leb n wãb nemd lae-lae, tɩ m da wa n kɩt tɩ m ba-biig lʋɩ ye.