1 Korẽnt rãmba 6 - WẼNNAAM SEBRE 2014

Ba-biis ne taab yell welgre

¹ Yãmb ned sã n tar yell ne ned a to, a saagd n kẽnda neb nins sẽn ka sakd Wẽnnaamã nengẽ n bʋ ne-a bɩ, bɩ yaa Kiris tẽedbã nengẽ?

² Yãmb ka mi tɩ nin-sõamyã na n kaoo dũni bʋʋd la? La sã n yaa tɩ yaa yãmb n na n kao dũni wã bʋʋdo, dẽ yĩnga, yaa paoogr ne yãmb tɩ kao yɛl sẽn ka a woto bʋʋd sɩda?

³ Yãmb ka mi tɩ tõnd na n kaoo malegsã bʋʋd la? Bõe tɩ tõnd ka na n kao vɩ-kãngã yɛlã bʋʋdo?

⁴ Yãmb sã n yaool n tar yɛl ne taab vɩ-kãngã yɛl poorẽ, yaa neb nins wẽnd doogã sẽn ka gomd b yellã la yãmb kɩtd tɩ b kao bʋʋdã.

⁵ Mam yeta woto n na n ning yãmb yãnde. Dẽ, ned ba a yembr ka be yãmb sʋkã n tar yam n tõe n bʋ yɛl nins sẽn be a ba-biisã sʋkã bʋʋd wɛ?

⁶ Ba-biig bʋʋda ne ba-biig a to neb sẽn ka tẽedb taoore.

⁷ Yãmb sẽn bʋʋd ne taabã zoe n yaa kongr yãmb yĩnga. Bõe tɩ yell sã n ka zemse, yãmb ka yõkd y mens n tʋk-a? Bõe tɩ yãmb ka basd bal tɩ b rɩk bũmb yãmb sẽn so?

⁸ Yaa yãmb n maand sẽn ka zemse, la y fãad neb a taaba, la yaa yãmb ba-biisi.

⁹ Yãmb zɩ tɩ neb nins sẽn maand sẽn ka zemsã ka na n paam Wẽnnaam soolem wa b rogem-pʋɩɩr la? Da belg-y y mens ye. Tʋʋm-dẽgd maandbã, wẽn-naands pʋʋsdbã, nin-yoaadbã,

¹⁰ wẽng maandbã, raopã wall pagb sẽ gãe taabã, wagda wã, yão-beed dãmba, sẽn yũud-b rãam n tuumdẽ wã, nin-tʋʋdbã, fãadbã, baa a yembr kõn paam Wẽnnaam soolma wa a rogem-pʋɩɩr ye.

¹¹ Yãmb neb kẽer yaool n dag n yaa a woto. La yãmb paama pekre, b kɩtame tɩ yãmb lebg sõama, b kɩtame tɩ yãmb zemse, tõnd Zu-soab a Zeezi Kiris yʋʋrã maasem yĩnga, la ne tõnd Wẽnnaamã Sɩɩg pãnga.

Yoob bʋʋdo

¹² Mam tara noor tɩ maan bũmb fãa, la ka bũmba fãa n be yõod ye. Mam tara noor tɩ maan bũmb fãa, la mam ka na n sak n kẽ bũmb baa a yembr yembdẽ ye.

¹³ Rɩɩb yaa pʋg yĩnga, la pʋg yaa rɩɩb yĩnga. La Wẽnnaam na n sãama b yiibã fãa. Yĩngã ka tʋʋm-dẽgd yĩng ye, a yaa Zu-soabã yĩnga, la Zu-soabã yaa yĩngã yĩnga.

¹⁴ Wẽnnaam, sẽn vʋʋg-a Zu-soabã na n vʋʋga tõnd me ne b meng pãngã.

¹⁵ Yãmb zɩ tɩ yãmb yĩnga yaa Kiris will la? Dẽ wã, mam na n dɩka Kiris wilã n kɩt tɩ lebg pʋg-yoodr willi?

¹⁶ No-koeemd ka be tɩ yaa ayo ye. Yãmb zɩ tɩ ned sẽn lagem ne pʋg-yoodr lebga yĩng a yembr ne-a la? Bala, b yeelame tɩ: Bãmb b yiibã na n lebga yĩng a yembre.

¹⁷ La ned ning sẽn loe ne Zu-soabã lebgda sɩɩg a yembr ne bãmba.

¹⁸ Zoe-y yoobo. Yel-wẽnd a to ninsaal sẽn maand ka be a yĩngã pʋgẽ ye. La ned ning sẽn maand yoob beegda a meng yĩnga.

¹⁹ Yãmb zɩ tɩ yãmb yĩnga yaa Sɩɩg-sõng roogo, Sɩɩg-sõng yãmb sẽn deeg Wẽnnaam nengẽ, la tɩ yãmb ka leb n so y meng la?

²⁰ Bala, b lebs n daa yãmb toogo. Woto yĩnga, waoog-y Wẽnnaam ne y yĩngã [la ne Sɩɩgã sẽn yaa Wẽnnaam dẽndã.]