1 Korẽnt rãmba 4 - WẼNNAAM SEBRE 2014

Tẽn-tʋmdbã tʋʋmde

¹ Woto yĩnga, ges-y tõnd wa Kiris tʋmtʋmdba, Wẽnnaam sẽn ning b yel-soalmã yell b nusẽ.

² B sẽn dat bũmb ning yel-gɛtb nengẽ bala, yaa tɩ b yãnd tɩ b maanda sɩd ne b tʋʋmde.

³ Ne maam, ka yell ne maam tɩ yãmba, wall dũni bʋ-kaoodb bʋ mam bʋʋd ye. Mam me ka kaood n meng bʋʋd ye. Bala, bũmb ka zɩsg mam sũurã ye.

⁴ La ka rẽnda yĩng la mam zemsr ye. Sẽn kaood-a mam bʋʋd yaa Zu-soabã.

⁵ Woto yĩnga, da kao-y bũmb baa fɩ bʋʋd tɩ wakatã nan ka ta ye, tɩ Zu-soabã waoong nan ka ta ye. Bãmb sã n wa, b na n puka bũmb ning sẽn solg lik pʋgẽ wã, la b na n kɩtame tɩ bũmb nins nebã sẽn dag n saag b sũyã pʋsẽ wã pugsi. Wakat-kãnga, Wẽnnaam n na n pẽg ned kam fãa.

⁶ M ba-biisi, mam dɩka mams‑kãens n bilg maam ne a Apoloos yellã, yãmb wʋmb yĩnga. Woto, tõnd yĩnga, yãmb na zãms n bãnge, n da wa n maan tɩ yõsg bũmb ning sẽn gʋlsã ye, la yãmb ned baa a yembr ka na n tong ned a yembr poore, n wa waoog a menga, n paoog ned a to wã ye.

⁷ Bala, bõe n welgd foom ne f taabã? Bõe la fo tar tɩ ka ned n kõ foom? La sã n yaa tɩ yaa ned n kõ foom, bõe tɩ f waoogd f meng wa f ka reeg-a ned nengẽ?

⁸ Yãmb zoee n tɩgame, yãmb zoee n yaa arzegs rãmba, yãmb sɩngame n dɩt naam tɩ tõnd kaẽ ye. Wẽnd na kɩt tɩ y sɩd rɩ naam, tɩ tõnd me tõe n naag yãmb n dɩ naamã.

⁹ Bala, mam tẽedame tɩ Wẽnnaam kɩtame tɩ tõnd sẽn ya tʋmtʋmdba yɩ nebã fãa zʋʋre, la neb bʋʋd sẽn kao tɩ b zems kũum, b sẽn kɩt tɩ tõnd lebg bõn-gets dũni rãmb yĩnga, la malegs yĩnga, la ninsaalb yĩngã yĩnga.

¹⁰ Kiris yĩnga, tõnd yaa yalemba, la yãmb yaa yam dãmb Kiris pʋgẽ, tõnd yaa pãn-komsem dãmba, la yãmb tara pãnga. Yãmb bee waoogre, la tõnd paamda paoogre.

¹¹ Hal tɩ ta moasã, kom la ko-yũudu, la naongo, la pãbre, la yeebg tara tõndo.

¹² Tõnd tʋmda ne d nus n yaadẽ. Nebã tʋʋda tõndo, la tõnd ningd-b‑la barka. Neb namsda tõndo, la tõnd sakda rẽnda.

¹³ Hal tɩ ta moasã neb kãnegda tõndo, la tõnd belsda nebã. Tõnd lebga wa sagd dũni neb nifẽ, ned baa a yembr sẽn ka rata.

¹⁴ Mam ka gʋlsd yãmb yõwã n na n ning yãmb yãnd ye. Mam keoogda yãmba, yãmb sẽn yaa m kom-nongdsã yĩnga.

¹⁵ Sɩd me, ba yãmb sã n paam tɛtb tus piig Kiris pʋgẽ, yãmb ka tar ba-rãmb wʋsg ye. Bala, yaa maam n dog yãmb a Zeezi Kiris pʋgẽ, koe-noogã maasem yĩnga.

¹⁶ Woto yĩnga, mam sagenda yãmba: Yɩ-y mam togs-n-taase.

¹⁷ Bõn-kãng yĩnga, mam tʋma m bi-nongr a Tɩmote sẽn maand sɩd Zu-soabã pʋgẽ wã yãmb nengẽ. Yẽnda na n tẽega yãmb so-tũuds nins sẽn be Kiris pʋgẽ tɩ mam zãmsd nebã, zĩig fãa, wẽnd dotã fãa pʋsã.

¹⁸ Neb kẽer wuka b mense, wa mam sã n da ka tog n wa yãmb nengẽ ye.

¹⁹ La sã n taa Zu-soabã raabo, bilf sã n paase, mam na n waa yãmb nengẽ. Mam na n gesa wuk-m-mens rãmb kãens pãnga, la ka b goamã yell ye.

²⁰ Bala, Wẽnnaam soolma ka goam ye, la yaa pãnga.

²¹ Bõe la y rata? Y ratame tɩ m wa y nengẽ ne sãbsg bɩ, bɩ ne nonglem la ne sũ-bʋgsem yam?