1 Korẽnt rãmba 16 - WẼNNAAM SEBRE 2014

Nonglem kũun ba-biisã sõngr yĩnga

¹ Sã n yaa ne nonglem kũunã y sẽn na n kõ Kiris tẽedbã sẽn be Zeruzalɛmã yĩngã, bɩ yãmb me maan wa mam sẽn yeel Galasi soolem wẽnd-dotã tɩ b maanã.

² Dasem a yopoe wã pipi daarã, bɩ yãmb ned kam fãa bĩng bũmb ning a sẽn tõe n kõ wã kɛɛnga, a yiri, tɩ y da wa yals n gũ mam waoong n na n yaool n tigs kũunã ye.

³ La mam sã n wa, mam na n kõo neb nins yãmb sẽn yãk tɩ b tall y kũunã n kẽng Zeruzalɛmã kaset sɛb tɩ b zã n kẽnge.

⁴ La sã n yaa tɩlɛ tɩ mam mengã kẽng Zeruzalɛm, b na tũ maam n kẽnge.

⁵ Mam sã n pɩʋʋg Masedoane, mam na n waa yãmb nengẽ, bala, mam na n pɩʋʋga Masedoan.

⁶ Daar ninga, mam na n zĩnda ne yãmb bilfu, wall m na n zĩnda yãmb nengẽ hal tɩ waoodã wẽnd looge, tɩ yãmb na kɩt tɩ b tall maam n kẽng zĩig ning mam sẽn na n kẽngã.

⁷ So-kãngã wã, mam ka rat n pɩʋʋg bal n ges yãmb la m loog ye. Mam saagdame tɩ Zu-soabã sã n sake, mam na n zĩnda ne yãmb bilfu.

⁸ Baoosgo, mam na n paa Efɛɛs hal tɩ ta Pãntekotã.

⁹ Bala, dignoor n pak hal yalenga, mam tʋʋmdã yĩnga, la sẽn kis-b maamã sõor waoogame.

¹⁰ A Tɩmote sã n ta, bɩ y maan y sẽn na maan t'a sẽn be yãmb sʋkã, bɩ a pɛlg yɩ kãenkãe, bala, a tʋmda Zu-soabã tʋʋmd wa mam me sẽn maandã.

¹¹ Woto yĩnga, bɩ ned baa a yembr da get-a n pa nandẽ ye. Kɩt-y tɩ b yãag-a t'a lebg n wa mam nengẽ ne laafɩ, bala, mam gũuda yẽnda ne ba-biisã.

¹² Ne ba-biig a Apoloos yelle, mam keng-a-la sõama n yeel-a t'a tũ ba-biisã n wa yãmb nengẽ, la a dag n ka yãk yam tɩ wa be moasã ye. A sã n wa paam weere, a na wa.

¹³ Neend-y-yã! Yals-y kãenkãe tẽebã pʋgẽ! Yɩ-y raopa, keng-y y mense.

¹⁴ Bɩ bũmb nins fãa sẽn maand yãmb sʋkã yɩ ne nonglem.

¹⁵ M ba-biisi, bũmb a yembr la mam leb n dat n yeel yãmb tɩ y maane. Yãmb miime t'a Ɛstefanas zaka rãmb n yɩ pipi tẽedb Akayi soolmã pʋga, la tɩ b tʋmdame n sõngd Kiris tẽedbã.

¹⁶ Sak-y neb a woto, la y sak neb nins fãa sẽn naag tʋʋmdã pʋgẽ n tʋmdẽ wã.

¹⁷ Mam sũur yaa noog ne a Ɛstefanas la a Fortunatuus la a Akayikuus sẽn wa mam nengẽ wã. B yiisa yãmb velem sẽn dag n tar maamã,

¹⁸ bala, b kɩtame tɩ maam ne yãmb sɩɩsã gãande. Bãng-y neb a woto yõod sẽn zem to-to.

¹⁹ Wẽnd-dot nins sẽn be Aazi soolmã neb pʋʋsda yãmba. A Akɩlaas ne a Pirsill la Wẽnnaam nebã sẽn tigimd bãmb zakẽ wã toonda yãmb pʋʋsem Zu-soabã pʋgẽ.

²⁰ D ba-biisã fãa toonda yãmb pʋʋsem. Pʋʋs-y taab ne mok-sõngo.

²¹ Yaa maam a Poll mengã nug n gʋls pʋʋsmã.

²² Ned sã n ka nong Zu-soabã, bɩ kãab-wẽng zĩnd a zugu. Maaranata

²³ Bɩ Zu-soab a Zeezi Kiris barkã zĩnd ne yãmba!

²⁴ Mam nonga yãmb fãa a Zeezi Kiris pʋgẽ.