1 Korẽnt rãmba 15 - WẼNNAAM SEBRE 2014

A Zeezi Kiris vʋʋgre

¹ M ba-biisi, mam tẽegda yãmb koe-noog ning mam sẽn moon yãmb tɩ yãmb deege, n yas a pʋgẽ kãenkãe wã.

² Koe-no-kãng maasem yĩnga yãmb paama fãagre, yãmb sã n tall-a wa mam sẽn togs-a yãmbã. Sã n ka yɩ a woto, yãmb tẽe zaalem bala.

³ Koɛɛg ning mam sẽn taas yãmbã, yaa mam me sẽn deege: Yaa tɩ wa Wẽnnaam gʋls-sõamyã sẽn yetã, Kiris kii tõnd yel-wẽnã yĩnga.

⁴ B mum-b lame, la wa Wẽnnaam gʋls-sõamyã sẽn yetã, b vʋʋga rasem a tãab daare,

⁵ la a Sefaas yãnda bãmba, tɩ karen-biisã piig la a yiibã me yã bãmba.

⁶ Rẽ poore, tõnd ba-biis sẽn yɩɩd bãmb kobs-nu yãa bãmb wakat a yembre. Bãmb neb wʋsg ket n vɩɩme, la kẽer me kiime.

⁷ Rẽ poore, a Zak yãnda bãmba, la tẽn-tʋmdbã fãa yãa bãmba.

⁸ Bãmb fãa poore, b puka b meng ne maam tɩ m yãnd-ba, baa mam sẽn yaa wa biig sẽn dog n pa ta wã.

⁹ Bala, tẽn-tʋmdbã sʋka, maam n ka ta m taaba, la mam ka zems tɩ b bool maam tɩ tẽn-tʋmd ye. Bala, mam namsa Wẽnnaam nin-tũusdsã.

¹⁰ Wẽnnaam barkã yĩnga, mam yaa m sẽn yaa a soaba, la bãmb nimbãan-zoeer mam yĩngã ka yɩ zaalem ye. Ayo! Mam tʋmame n yɩɩd tẽn-tʋmdbã fãa. La ka mam mengã n tʋm ye, yaa Wẽnnaam barkã sẽn be mam pʋgẽ wã.

¹¹ Woto yĩnga, tɩ yaa maam, tɩ yaa bãmba, bũmb ning tõnd sẽn moondã la woto, la yaa bõn-kãng la yãmb sẽn tẽ wã.

¹² La sã n yaa tɩ b moondame tɩ Kiris vʋʋgame n yi kũum sʋka, yɩta a wãn tɩ neb kẽer yãmb sʋk yetẽ tɩ kũum vʋʋgr ka be?

¹³ Sã n yaa tɩ kũum vʋʋgr ka be, rẽnd Kiris me ka vʋʋg ye.

¹⁴ La sã n yaa tɩ Kiris ka vʋʋge, rẽnd tõnd koe-moonegã yaa tʋʋm zaalle, la yãmb tẽebã me ka võor ye.

¹⁵ Sã n yaa tɩ kũum ka vʋʋgda, kɩtame meng tɩ tõnd yagd zĩrẽ ne Wẽnnaam yelle. Bala, tõnd yagda zĩrẽ n yetẽ tɩ Wẽnnaam vʋʋga Kiris tɩ b yaool n ka vʋʋg-b ye.

¹⁶ Bala, kũum sã n ka vʋʋgdẽ, rẽnd Kiris me ka vʋʋg ye.

¹⁷ La sã n yaa tɩ Kiris ka vʋʋge, rẽnd yãmb tẽebã ka yõod ye, la yãmb ket n bee y yel-wẽnã pʋgẽ.

¹⁸ La neb nins sẽn ki Kiris tũudum pʋgẽ wã yell sãamame.

¹⁹ Sã n yaa vɩ-kãngã pʋgẽ yĩng bal la tõnd be ne Kirisã, ned ka be t'a nimbãaneg leb n ta tõnd ye.

²⁰ La moas-moasã wã yẽ, Kiris vʋʋgame n yi kũum sʋka. Bãmb n yɩ pipi soab Wẽnnaam sẽn vʋʋge, sẽn ki-bã sʋka.

²¹ Bala, a wa kũumã sẽn tũnug rao a yembr tãa n wa wã, kũum vʋʋgrã me tũnuga rao a yembr tãa n wa.

²² La a wa nebã fãa sẽn kiid a Ãdem maasem yĩngã, woto me, nebã fãa na n vʋʋgame, Kiris maasem yĩngã.

²³ La ned fãa na n talla a zĩiga: Kiris n na n yɩ dẽenem soaba, a Zeezi waoongã raare. Neb nins bãmb sẽn so wã na yaool n pʋgle.

²⁴ Kiris sã n sɛɛs naam fãa, la pãn-soaadb fãa, la pãng fãa, b na n dɩka soolmã n lebs ba a Wẽnnaam. Dẽ, bũmb fãa saab taame.

²⁵ Bala, yaa tɩlɛ tɩ Kiris rɩ naam, hal tɩ ta daar ning b sẽn na n kɩt tɩ b tab b bɛɛbã fãa n zĩẽ.

²⁶ Yaoolem bɛ Kiris sẽn na n sãam yaa kũumã.

²⁷ Sɩd me, Wẽnnaam kɩtame tɩ Kiris soog bũmba fãa. La b sã n yet tɩ Wẽnnaam kɩtame tɩ Kiris soog bũmbã fãa, rat n yeelame tɩ ned ning sẽn kɩt tɩ bãmb soogã ka naag tɩ bãmb soẽ ye.

²⁸ La Wẽnnaam sã n kɩt t'a Zeezi soog bũmba fãa n sɛ, a Zeezi mengã na n saka ned ning sẽn kɩt tɩ bãmb soog bũmb fãa wã, sẽn na yɩl la Wẽnnaam yɩ taoor soab bũmb fãa pʋgẽ.

²⁹ Sã n ka yɩ a woto, neb nins sẽn deegd kiidbã zĩig tɩ b lisd-bã na n maana a wãna? Kũum sã n ka vʋʋgd lae-lae, bõe yĩng tɩ nebã kɩtd tɩ b lis-b kiidbã yĩngã?

³⁰ La yaa bõe yĩng tɩ tõnd gẽnegd d yõor wakat fãa?

³¹ M ba-biisi, mam yeta yãmb ne waoogr ning yãmb ya mam yĩng tõnd Zu-soab a Zeezi pʋgẽ wã, tɩ daar fãa, kũum n be mam taoore?

³² Sã n yaa ninsaalb gesg yĩng la mam mao ne we-rũms Efɛɛsã, a yõod yaa bõe ne maam? Sã n yaa tɩ kũum ka vʋʋgda, bɩ d rɩ la d yũ. Bala, beoogo, d na n kiime.

³³ Da belg-y y mens ye: Tũud-n-ta-wẽng sãamda minim-sõamyã.

³⁴ Teem-y nao-kẽndre, n kẽn wa nin-tɩrse, la y ra maan yel-wẽn ye. Yaa yãmb yãnde, la mam yetame tɩ yãmb neb kẽer ka mi Wẽnnaam ye.

Sẽn vʋʋg-bã yĩns sẽn na n yɩ to-to

³⁵ La nina na n sokame tɩ sẽn ki-bã na n vʋʋga wãn-wãna, la b na n talla yĩn-bʋg buudu?

³⁶ Ka-yam soaba! Tẽeg tɩ bũmb ning fo sẽn bʋd ka yita, a sã ka ki ye.

³⁷ La fo sẽn dɩk bũmb ning n bʋdã, a ka yit n ket n ya a woto ye. Yãmb bʋta bõn-buugu, wa bɩle wall bũmb a to.

³⁸ La Wẽnnaam kõt-a la yĩng ning bãmb sẽn data, la kood buud fãa tara a tɩɩg buudu.

³⁹ Bõn-vɩɩlɩ wã fãa nemd ka wẽnd taab ye. Ninsaal nemd yaa toore, rũms nemd yaa toore, bõn-pɩgs nemd yaa toore, zĩm nemd yaa toore.

⁴⁰ Arzãn yĩns me beeme tɩ tẽng zug yĩns me beẽ. Arzãn yĩnga neerem yaa toor ne tẽng zug ka yĩngã.

⁴¹ Wĩntoog vẽenem toore, kiuug vẽenem toore, ãds vẽenem toore. Bala, ãdsã mens vẽenem ka zems taab ye.

⁴² Yaa woto me ne kũumã vʋʋgre. B sã n na n mum ninsaala, rẽ t'a yaa bõn-põaagdga. La a sã n wa na n vʋʋge, a ka lebd n yɩ bõn-põaagdg ye.

⁴³ B sẽn wat n na n mum-a wã, ka be sẽn get ye. La a sã n wa na n vʋʋge, na n yɩɩ ne ziiri. B sẽn wat n na n mum-a wã, rẽ t'a ka pãng ye. La a sã n wa na n vʋʋge, a pida ne pãnga.

⁴⁴ B sẽn wa n mumd-a wakatã, rẽ t'a yaa ninsaal yĩnga, la a sã n wa na n vʋʋge, a na n yaa sɩɩga. Ninsaal yĩng sã n beẽ, sɩɩg yĩng me beeme.

⁴⁵ Rẽnda n kɩt tɩ b gʋls n yeel tɩ: Pipi rao a Ãdem lebga nin-vɩɩga. La yaoolem Ãdmã lebga sɩɩg sẽn kõt vɩɩm.

⁴⁶ Ka sɩɩg yĩngã n deng ye, yaa ninsaal yĩngã, tɩ sɩɩg rẽndã yaool n pʋgda.

⁴⁷ Pipi raoã b sẽn yãk tẽng tom n naanã yaa tẽng bũmbu. La yiib soabã yita arzãna.

⁴⁸ Tẽng nedã sẽn yaa bũmb ningã, tẽng nebã fãa me yaa a woto. La arzãn nedã sẽn yaa bũmb ningã, arzãn nebã me yaa a woto.

⁴⁹ A wa tõnd sẽn tall tẽng nedã wẽnegã, tõnd na n talla arzãn nedã me wẽnego.

⁵⁰ M Ba-biisi, mam sẽn dat n yeelã, yaa tɩ ninsaal yĩng la zɩɩm ka tõe n paam Wẽnnaam soolmã ye, la bõn-põaagdg ka paamd n lebg sẽn ka põogd ye.

⁵¹ Ad mam togsda yãmb yel-solemde: Tõnd fãa ka na n ki ye. Tõnd fãa na n paama tedgr

⁵² wakat a yembre, nif kamsg pʋgẽ, yaoolem baorg peebgã wakate. Bala, a na n peebame, la neb nins sẽn ki wã na n vʋʋgame n tar yĩns sẽn ka põogd ye, la tõnd me na n paama tedgre.

⁵³ Sɩd me, yaa tɩlɛ tɩ yĩn-põaagdgã tek n lebg yĩng sẽn ka põogda, tɩ yĩn-kiidgã tek n lebg yĩng sẽn ka kiid ye.

⁵⁴ Yĩn-põaagdgã sã n wa lebg yĩng sẽn ka põogda, tɩ yĩn-kiidgã lebg yĩng sẽn ka kiida, wakat-kãng la bũmb ning b sẽn gʋlsã na n pidsi. B yeelame yaa: Tõogr n vel kũum.

⁵⁵ Kũum, fo tõogrã bee yɛ? Kũum, fo toogã bee yɛ?

⁵⁶ Yaa yel-wẽnã la kũumã toolem, la yaa tõogã n kõt yel-wẽnã pãnga.

⁵⁷ La bark Wẽnnaam! Bãmb kɩtdame tɩ tõnd paam tõogre, tõnd Zu-soab a Zeezi maasem yĩnga.

⁵⁸ Woto yĩnga, m ba-bi-nongdse, yals-y kãenkãe, tɩ bũmb da tõog n vigs yãmb ye. Kẽng-y taoor Zu-soabã tʋʋmd pʋgẽ wakat fãa, yãmb sẽn mi tɩ tʋʋmd ning yãmb sẽn tʋmd Zu-soabã yĩngã ka na n yɩ zaalmã yĩnga.