1 Korẽnt rãmba 12 - WẼNNAAM SEBRE 2014

Sɩɩg-sõng kũunã

¹ M ba-biisi, mam ka rat tɩ yãmb zĩnd zɩɩlem pʋgẽ Sɩɩg-sõng kũunã yell wɛɛngẽ ye.

² Yãmb mii yãmb sẽn dag n ket n yaa nin-zaalse, tɩ yãmb sũyã loe ne wẽn-naands sẽn yaa mugsi, tɩ y ka tõe n lak ne-bã.

³ Yaa rẽ yĩng tɩ mam yet yãmb tɩ ned ka be, Wẽnnaam Sɩɩgã sẽn na n tus-a t'a yeel tɩ kãab wẽng n be a Zeezi zug ye. La ned baa a yembr me ka tõe n yeel t'a Zeezi yaa Zu-soaba, sã n ka Sɩɩg-sõng n kɩt t'a yeel ye.

⁴ Kũunã yaa toay-toaya, la yaa Sɩɩg a yembr n kõte.

⁵ Tʋʋmã sẽn tʋmd to-to wã yaa toay-toaya, la yaa Zu-soab a yembr yĩng la b tʋmda.

⁶ Tʋʋmã yaa toay-toaya, la yaa Wẽnnaam a yembr n tʋmd fãa nebã fãa pʋse.

⁷ Sɩɩgã belem pukda ned kam fãa vɩɩmẽ, nebã fãa sõngr yĩnga.

⁸ Sɩd me, Wẽnnaam Sɩɩgã kõta ned a yembr yam gomde, n kõ ned a to bãngr gomde, la yaa Sɩɩg a yembr n maand rẽ.

⁹ Sɩ-kãng kõta ned a to tẽebo, n kõ ned a to maagr kũuni, la yaa Sɩɩg a yembre.

¹⁰ Wẽnnaam Sɩɩgã kõta ned a to bõn-bãn maaneg kũuni, n kõ ned a to pĩnd-n-bãngr gomde, n kõ ned a to pãn-tõog tɩ bãng sɩɩsã n welg taaba, n kõ ned a to gom-zẽn buud toay-toaya, la ned a to gom-zẽn deesgo.

¹¹ Yaa Sɩɩg a yembr tãa n maand bõn-kãensã fãa, n pʋɩt kũunã n kõt ned kam fãa wa b sẽn data.

¹² Sɩd me, a wa yĩng sẽn yaa yembr n yaool n tar wil wʋsgã, la tɩ yĩngã wilã, baa ne b sẽn yaa wʋsgã b yaa yĩng a yembr balã, Kiris me yaa a woto bala.

¹³ Bala, yaa Sɩɩg a yembr pʋgẽ la b lis tõnd fãa, Zʋɩf-rãmba, sẽn ka-b Zʋɩf-rãmba, yembse, burkĩmba, tɩ d tõe n lebg yĩng a yembre. La tõnd fãa yũu Sɩɩg a yembr n yiis d ko-yũudu.

¹⁴ Woto, yĩng ka will a yembr bal ye, yaa wil wʋsgo.

¹⁵ Naoor sã n yeel tɩ yẽnda sẽn ka nugã yĩnga, yẽnda ka yĩngã willi, rẽ ka kɩtd t'a ka yĩngã will ye.

¹⁶ La tʋbr sã n yeel tɩ yẽnda sẽn ka nifã yĩnga, yẽ ka yĩngã willi, rẽ ka kɩtd t'a ka yĩngã will ye.

¹⁷ Yĩngã tõr sã n dag n yaẽ nifu, tʋbr da na n bee yɛ? La fãa sã n dag n yaẽ tʋbre, yõor da na n bee yɛ?

¹⁸ Ad Wẽnnaam ninga wilã yĩngã pʋgẽ wa b sẽn data.

¹⁹ Yĩngã tõr sã n dag n yaẽ will a yembre, yĩngã meng da na n beẽ la yɛɛnẽ?

²⁰ Woto wã, yĩngã wil yaa wʋsgo, la yaa yĩng a yembre.

²¹ Nif ka tõe n yeel nug t'a ka rat a sõngr ye, la zug ka tõe n yeel nao t'a ka rat b sõngr ye.

²² Ayo, ka woto ye, yĩngã wil nins sẽn wẽnda b pãngã ka ta b taabã, n tar yõod yĩngã pʋgẽ.

²³ La wil nins tõnd sẽn get tɩ b ka be waoogr n ta b taabã, tõnd waoogd-b lame n yɩɩda. Woto, yĩngã wil nins sẽn ka togd ne gesgã, tõnd geta b yell sõama,

²⁴ la wil nins sẽn sakd gesgã ka baood tɩ d ges b yell woto ye. Wẽnnaam sẽn ning yĩngã wilã to-to wã, b kɩtame tɩ wil nins sẽn ka tar waoogrã na paam waoogre,

²⁵ tɩ welgr da wa n zĩnd yĩngã pʋgẽ ye, la tɩ wilã me na ges taab yelle.

²⁶ Yĩngã will a yembr sã n namsdẽ, wil a taabã fãa naaga yẽnda n namsdẽ. La a yembr sã n paam waoogre, b fãa naagda yẽnda n kɩdemdẽ.

²⁷ Yãmb yaa Kirisã yĩnga, la yãmb ned kam fãa yaa bãmb yĩngã wila.

²⁸ Wẽnnaam ninga neb b roogẽ wã: pipi rãmb yaa tẽn-tʋmdbã, tɩ Wẽnnaam no-rɛɛsdbã ya yiib rãmba, tɩ karen-saam-dãmbã ya tãab rãmba. Rẽ poore, bõn-bãn maaneg kũun n be, tɩ maagr kũuni, sõngr kũuni, lʋɩ neb taoor kũuni, gom-zẽn buud toay-toay kũun n pʋgda.

²⁹ Dẽ yĩnga, nebã fãa yaa tẽn-tʋmdb la? B fãa yaa Wẽnnaam no-rɛɛsdb la? B fãa yaa karen-saam-dãmb la? B fãa maanda bõn-bãn la?

³⁰ B fãa tara maagr kũun la? B fãa gomda gom-zẽn la? B fãa reesda gom-zẽn la?

³¹ Bao-y kũun nins sẽn yaa sõama n yɩɩdã. La mam na n wilga yãmb sor sẽn yɩɩd a taaba fãa.