1 Korẽnt rãmba 1 - WẼNNAAM SEBRE 2014

Pʋʋsem

¹ Maam a Polle, sẽn paam-a boolg tɩ yɩ a Zeezi Kiris tẽn-tʋmda, wa sẽn zems ne Wẽnnaam daabã, ne ba-biig a Sostɛn n gʋlsd seb-kãngã,

² n na n tʋm Wẽnnaam tẽedbã sẽn be Korẽntã. Bãmb yaa neb sẽn welg toor Kiris maasem yĩnga, tɩ b tõe n yɩ pʋ-peelem dãmba. Sebrã yaa neb nins fãa sẽn pʋʋsd ne tõnd Zu-soab a Zeezi Kiris yʋʋre, baa b sẽn be zĩig ninga yĩnga. A Zeezi Kiris yaa bãmb Zu-soaba, la tõnd me Zu-soaba.

³ Bɩ tõnd ba a Wẽnnaam ne Zu-soab a Zeezi Kiris ning yãmb zut barka, la b kõ yãmb laafɩ.

Bark pʋʋsem, Wẽnnaam Sɩɩg-sõng kũunã yĩnga

⁴ Mam sã n tagsd yãmb yelle, mam pʋʋsda Wẽnnaam bark wakat fãa, b sẽn ning yãmb zut bark a Zeezi Kiris pʋgẽ wã yĩnga.

⁵ Tɩ yãmb paam bũmb fãa wʋsgo, sã n yaa goamã wall bãngr fãa.

⁶ Bala, Kiris kasetã kɩɩ yẽg yãmb pʋgẽ sõama.

⁷ Woto, yãmb sẽn gũud tõnd Zu-soab a Zeezi pukrã, kũun baa a yembr ka paoog yãmb ye.

⁸ Bãmb na n kɩtame tɩ y yals kãenkãe a woto hal tɩ wakat ta, tɩ rõadg kõn zĩnd yãmb zut tõnd Zu-soab a Zeezi Kiris daarã ye.

⁹ Wẽnnaam, sẽn bool-a yãmb tɩ y paam lagem-n-taar ne bãmb Bi-ribl a Zeezi Kiris sẽn yaa tõnd fãagdã, bãmb yaa maan-sɩd soaba.

Dẽ yĩnga, Kiris welgame la?

¹⁰ M ba-biisi, mam bõosda yãmb ne tõnd Zu-soab a Zeezi Kiris yʋʋre, tɩ y kɩt tɩ y goamã tũud taaba, tɩ welgr da zĩnd yãmb sʋk ye. Zems-y taab sõama ne yam a yembre, tagsg a yembr pʋgẽ.

¹¹ Bala, m ba-biisi, a Kolowe nebã wilga maam tɩ ka-wʋm-taab n be yãmb sʋka.

¹² Mam wʋmdame tɩ yãmb ned fãa yetame tɩ yẽnda yaa a Poll neda, wall a Apoloos neda, wall a Sefaas neda, wall Kiris neda.

¹³ Kiris welgame la? Dẽ, b kaa a Poll da-pɩk zug yãmb yĩng la? Bɩ yaa ne a Poll yʋʋr la yãmb paam lisgu?

¹⁴ Mam pʋʋsda Wẽnnaam barka, mam sẽn ka lis yãmb ned baa a yembre, sã n ka a Kirispuus la a Gayuusã.

¹⁵ Woto, ned baa a yembr ka tõe n yeel tɩ b lisa yãmb ne mam yʋʋr ye.

¹⁶ Mam lisa a Ɛstefanas zaka rãmba, la mam ka mi m sã n lisa ned a to me ye.

Kiris yaa Wẽnnaam pãng la b yam

¹⁷ Bala, Kiris ka tʋm maam tɩ m kẽng n lis neb ye, la yaa tɩ moon koe-noogã. Ka tɩ moon-a ne gom-minim, tɩ m ra wa n kɩt tɩ Kiris ra-pɩkã lebg bõn-yaalg ye.

¹⁸ Bala, da-pɩkã koɛɛgã yaa yalemd ne neb nins sẽn sãamd-bã la ne tõnd dãmb sẽn paam fãagrã, a yaa pãng sẽn yit Wẽnnaam nengẽ.

¹⁹ Rẽnda n kɩt tɩ b gʋls n yeele: Mam na n sãama yam dãmba yam, la m kɩt tɩ neb nins sẽn tar bãngr lebg zaalem.

²⁰ Yam soabã bee yɛ? Tõog karen-saambã bee yɛɛnẽ? Zamaan‑kãngã no-koɛɛm wẽedã bee yɛ? Dẽ yĩnga, Wẽnnaam ka kɩt tɩ dũni yam lebg yalemd sɩda?

²¹ Bala, dũni wã sẽn ka tũnug Wẽnnaam yamã n bãng bãmbã, a meng yamã pʋgẽ wã yĩnga, a taa Wẽnnaam yam tɩ tall koe-moonegã yalemda n fãag neb nins sẽn tẽedã.

²² Zʋɩf-rãmbã kotame tɩ b maan bõn-bãna, tɩ Gɛrk-rãmbã baood yam.

²³ La tõnd moonda Kiris ning b sẽn ka da-pɩk zugã. Koe-kãng yaool n yaa bõn-lakdg ne Zʋɩf-rãmbã, la a ya yalemd ne buud a taabã.

²⁴ La sã n yaa ne neb nins sẽn paam-b boolgã, tɩ b yaa Zʋɩf tɩ b yaa Gɛrke, koɛɛgã yaa pãng sẽn yit Wẽnnaam nengẽ, yam sẽn yit Wẽnnaam nengẽ.

²⁵ Bala, bũmb ning sẽn yaa yalemd ne Wẽnnaamã yaa yam n yɩɩd ninsaalbã, la bũmb ning sẽn yaa pãn-komsem ne Wẽnnaam tara pãng n yɩɩd ninsaalbã.

²⁶ M ba-biisi, ges-y yãmb sẽn dag n yaa bũmb nins wakat ning b sẽn bool yãmba, sẽn ya-b yam dãmb wa neb sẽn yetã ka waoog yãmb sʋk ye. Pãng rãmb ka waooga, naam roog neb me ka waooga.

²⁷ La Wẽnnaam yãka dũni bũmb nins sẽn yaa yalemdã n na n ning yam dãmb yãnde. Wẽnnaam yãka dũni bũmb nins sẽn yaa pãn-komsmã n na n ning pãens rãmbã yãnde.

²⁸ Wẽnnaam dɩka dũni bũmb nins sẽn ka yõodã, bũmb nins nebã sẽn ka nandã, bũmb nins sẽn ka be wa, n na n kɩt tɩ sẽn be-bã lebg zaalem,

²⁹ tɩ ned baa a yembr da waoog a meng Wẽnnaam taoor ye.

³⁰ Yaool n yaa Wẽnnaam n kɩt tɩ yãmb be a Zeezi Kiris pʋgẽ, Wẽnnaam kɩtame tɩ Kiris lebg tõnd yam, la d tɩrlem, la d welg-toore, la d fãagre,

³¹ t'a wa b sẽn gʋlsã: Bɩ ned ning sẽn waoogd a menga, waoog a meng Zu-soabã pʋgẽ.