1 Kibayã 4 - WẼNNAAM SEBRE 2014

A Zʋʋda yagens a taaba

¹ A Zʋʋda kom-dibli la woto: yaa a Perɛɛze, a Hɛsron, a Karmi, ne a Ʋʋr la a Soballe.

² A Soball biig a Rehaya roga a Yahate, t'a Yahat rog a Ahumayi ne a Lahaade. Bãmb yaa a Soreya buudã nebã.

³ A Etam ba wã yagens la woto: yaa a Yizreyɛlle, a Yisma, ne a Yidbaase. Bãmb dag n tara tão-poak t'a yʋʋr boondẽ t'a Hatselɛlponi.

⁴ A Penuwɛll rag n yaa a Gedoor ba, t'a Ezɛɛr dag n yaa a Uusa ba. Bãmb dag n yaa a Efrata bi-kãseng a Ʋʋr kom-dibli. A Ʋʋr n yaa a Betlehɛm ba.

⁵ A Asewʋʋr sẽn dag n yaa a Tekoa ba wã rag n tara pagb a yiibu: yaa a Eleya ne a Naara.

⁶ A Naara roga yẽnda kom-dibli: yaa a Awuzam ne a Efɛɛr la a Temeni ne a Ahastari.

⁷ A Eleya kom-dibli yaa a Serɛt ne a Sowaar la a Ɛtnan.

⁸ A Kots roga a Anuub ne a Hatsobeba, n paas a Harum biig a Aharɛll roogã nebã.

⁹ B rag n nanda a Yabɛɛs n yɩɩd a ba-biisã. A ma pʋda a yʋʋr t'a Yabɛɛs n yeele: Yaa yẽnda rogmã sẽn yɩ toog ne maamã yĩnga.

¹⁰ A Yabɛɛs pʋʋsame n kos Israyɛll Wẽnnaamã tɩ b ning a zug bark n yalg a soolmã, la b tẽeg b nug n kogl-a, la b zãag-a ne toog la namsg buud fãa. Dẽ, Wẽnnaam maana a sẽn kosã n kõ-a.

¹¹ A Suwa ba-biig a Keluub roga a Meyɩɩr sẽn dag n yaa a Ɛston ba wã.

¹² A Ɛston doga a Rafa buudã, ne a Paseya buudã, la a Teyina buudã. A Teyina rag n yaa a Nahaas ba. Bãmb n dag n yaa Reka tẽngã raopa.

¹³ A Kenaaz kom-dibli yaa a Otniyɛll ne a Seraya. A Otniyɛll roga a Hatate,

¹⁴ t'a Mewonotayi rog a Ofra, t'a Seraya rog a Zoaab sẽn dag n yaa nus-tʋʋm dãmbã tãn-long ba wã. Bala, nin-bãmb dag n yaa nus-tʋʋm dãmba.

¹⁵ A Yefune bi-ribl a Kalɛɛb kom-dibli la woto: yaa a Iru, a Ela, a Naam, n paas a Ela kom-dibli wã ne a Kenaaze.

¹⁶ A Yehalelɛll kom-dibli yaa a Zɩf ne a Zifa, la a Tɩrya ne a Azareyɛlle.

¹⁷ A Ɛsdraas kom-dibli yaa a Yetɛɛre, a Merɛɛde, a Efɛɛre, ne a Yalon. A Merɛɛd pagã roga a Miryam, a Samayi la a Yisba sẽn yaa a Ɛstemoa ba wã.

¹⁸ A Merɛɛd pag a to sẽn dag n yaa Zʋʋde tẽng bi-puglã roga a Yerɛɛd sẽn yaa Gedoor ba wã, ne a Ebɛɛr sẽn yaa a Soko ba wã, la a Yekutiyɛll sẽn yaa a Zanoa ba wã. Nin-bãmb n dag n yaa a Merɛɛd pag a Bitiya sẽn yaa Faarõ bi-puglã kom-dibli.

¹⁹ A Odiya pag ning sẽn yaa a Naham tão-poakã kom-dibli yaa a Keyila ba wã sẽn yaa Garmi nedã, ne Maakat rao a Ɛstemoa.

²⁰ A Sɩmo kom-dibli yaa a Amno, a Rina, la a Bɛn-Anan ne a Tɩlon. A Yiseyi kom-dibli yaa a Zowɛt ne a Ben-Zowɛte.

²¹ Zʋʋda kom-dibli wã sẽn yaa Sela yagensã la woto: yaa a Ɛɛr sẽn yaa a Leka ba wã, ne a Laada sẽn yaa a Maresa ba wã, la sẽn wʋgd-b gĩs-bãanesã sẽn yaa a Asbeya buudã roogo,

²² la a Yokim, ne Kozeba neb a Zoaas ne a Saraf sẽn dag n zab n deeg Moaab soolmã, ne Yasubi-Lehɛm. Kiba-kãens fãa yaa kiba-kʋda.

²³ Bãmb dag n yaa yagba, n vɩ zẽed ne yãg zĩisẽ, la b rag n bee ne rĩmã n tʋmd a tʋʋmã.

A Sɩmyõ yagense

²⁴ A Sɩmyõ kom-dibli yaa a Nemuwɛlle, a Yamin, a Yariibi, a Zeera, n paas a Sayulli.

²⁵ A Sayull doga a Salum, t'a Salum dog a Mibsam, t'a Mibsam dog a Misma.

²⁶ A Misma roga a Hamuwɛlle, t'a Hamuwɛll dog a Zakʋʋre, t'a Zakʋʋr dog a Simeyi.

²⁷ A Simeyi roga kom-dibli piig la a yoobe, la kom-pugli a yoobe. Yẽnda ba-biisã ka rog kamb wʋsg ye. Dẽ kɩtame tɩ bãmb buudã ka fɩɩg wa Zʋʋda kom-dibli wã ye.

²⁸ Bãmb dag n bee Bɛɛr-Seba, Molaada, Hasaar-Suwalle,

²⁹ Bila, Ɛtsɛm, Tolaade,

³⁰ Betuwɛlle, Orma, Siklaage,

³¹ Bɛt-Markabote, Atsaar-Susim, Bɛt-Bireyi, ne Saarayim. Yaa tẽn-bãmb pʋs la bãmb zĩnd hal n tãag a Davɩɩd rĩungã wakate,

³² n paas ne tẽn-bãooneg a nu wã bãmb sẽn so wã: yaa Etam ne Ayin la Rimon ne Tokɛn la Aaza n,

³³ n paas ne tẽn-bãooneg nins sẽn dag n karg n gũbg tẽn-kãensã, hal n tãag Baalle. Tẽms nins bãmb sẽn zĩndã, ne b buudã neb nins yʋy sẽn be sõadgã sɛb pʋsẽ wã la woto.

³⁴ Nanambsã ne b buudã neb yʋy la woto: yaa a Mesobaabe, a Yamlɛke, a Amatsɩya biig a Yosa,

³⁵ a Zowɛlle, a Aziyɛll biig a Seraya biig a Yosibiya biig a Zehu,

³⁶ la a Eliyohenayi, a Yakoba, a Yesohaya, a Aazaya, a Adiyɛlle, a Yesimiyɛlle, a Benaya,

³⁷ a Semaya biig a Simri biig a Yedaya biig a Alõ biig a Sifeyi biig a Ziiza.

³⁸ Neb nins yʋy b sẽn sõdgã rag n yaa b buudã rot nanambse, la b buudã fɩɩga hal wʋsgo.

³⁹ Bãmb kẽnga Gedoor tẽngã rignoor sẽnẽ, hal n tɩ tãag tãn-longã yaanga, n na n tɩ bao wãbneg zĩis b rũm-bãoonegã yĩnga.

⁴⁰ Bãmb kẽng n tɩ yãnda wãbneg zĩis sẽn yaa sõama, ne tẽng sẽn yalem wʋsgo, n tar laafɩ la bãane. Neb nins sẽn dag n zĩnd tẽn-kãng pʋgẽ wã rag n yaa a Sam yagense.

⁴¹ La Zʋʋda rĩm a Ezekɩyaas wakatẽ wã, b sẽn gʋls neb nins yʋy sebrã pʋgã wa n sãama fu-rotã ne b soondgã zĩis sẽn dag n be beenẽ wã, la b kʋ tẽngã neb gill tɩ b menem hal tɩ ta rũndã. Dẽ, b reega bãmb zĩig n zĩnd beenẽ, bala, wãbneg zĩis rag n bee beenẽ b rũm-bãoonegã yĩnga.

⁴² A Sɩmyõ buudã neb kobs-nu me rag n kẽnga Seyɩɩr soolem ning sẽn be tãms sʋkã. A Yiseyi kom-dibli wã n dag n yaa bãmb taoor dãmba: yaa a Pelatiya, a Neyariya, la a Refaya ne a Uziyɛlle.

⁴³ Bãmb kʋʋ Amalɛk yagens nins sẽn dag n põsã, la b reeg b tẽngã n zĩnd be hal tɩ ta rũndã.