1 Kibayã 27 - WẼNNAAM SEBRE 2014

Soolmã tãb-biis ne b sula

¹ Ad Israyɛll buudã kãsem-dãmba, ne b tãb-biis tusr-tusr la b tãb-biis koabg-koabg nanambse, ne b seb-gʋlsdbã sẽn dag n tʋmd rĩmã yĩnga, la b get sul toay-toayã sẽn let taab kiuug-kiuugã yell yʋʋmdã pʋgẽ wã sõore: Sull fãa yaa raop tus pisi la a naase.

² Pipi kiuugã pʋgẽ, yaa a Zabdiyɛll biig a Yasobeyam n get pipi sullã yelle. Yẽnda sullã neb sõor yaa raop tus pisi la a naase.

³ Yẽnda rag n yaa a Perɛts kom-dibli wã sʋk ned a yembre, la yẽnda n dag n yaa pipi kiuugã tãb-biisã nanambs fãa naaba.

⁴ Kiuug a yiibẽ soabã pʋgẽ, yaa Akoka tẽng rao a Dodayi n dag n get sull a yiibẽ soabã yelle, la a Miklot n dag n yaa sullã naaba. A Dodayi sullã neb sõor yaa raop tus pisi la a naase.

⁵ Kiuug a tãabẽ soabã pʋgẽ, yaa a Zehozada biig a Benaya sẽn yaa maan-kʋʋr kãsmã n dag n get sull a tãabẽ soabã yelle. Yẽnda sullã neb sõor yaa raop tus pisi la a naase.

⁶ Benaya-kãng dag n yaa gãndaad pis-tã wã sʋk ned a yembre, la yẽnda n dag n yaa b taoor soaba. Yẽnda biig a Amizabaad dag n bee sul-kãng pʋga.

⁷ Kiuug a naasẽ soabã pʋgẽ, yaa a Zoaab ba-biig a Azayɛll n dag n get sull a naasẽ soabã yelle. Yẽnda biig a Zebadiya n wa n led yẽnda zĩigẽ. Yẽnda sullã neb sõor yaa raop tus pisi la a naase.

⁸ Kiuug a nu soabã pʋgẽ, yaa Yisrak tẽng rao a Samwut sẽn yaa naabã n dag n get sull a nu soabã yelle. Yẽnda sullã neb sõor yaa raop tus pisi la a naase.

⁹ Kiuug a yoob soabã pʋgẽ, yaa Tekoa tẽng rao a Ikɛɛs biig a Yira n dag n get sull a yoobẽ soabã yelle. Yẽnda sullã neb sõor yaa raop tus pisi la a naase.

¹⁰ Kiuug a yopoe soabã pʋgẽ, yaa Palon tẽng rao a Elɛts sẽn yaa Efrayiim yagensã sʋk ned a yembrã n dag n get sull a yopoe soabã yelle. Yẽnda sullã neb sõor yaa raop tus pisi la a naase.

¹¹ Kiuug a nii soabã pʋgẽ, yaa Husa tẽng rao a Sibkayi sẽn yaa Zerak buudã ned a yembrã n dag get sull a nii soabã yelle. A Sibkayi sullã neb sõor yaa raop tus pisi la a naase.

¹² Kiuug a wɛ soabã pʋgẽ, yaa Anatot tẽng rao a Abiyezɛɛr sẽn yaa Benzame buudã ned a yembrã n dag n get sull a wɛ soabã yelle. A Abiyezɛɛr sullã neb sõor yaa raop tus pisi la a naase.

¹³ Kiuug piig soabã pʋgẽ, yaa Netofa tẽng rao a Maharayi sẽn yaa Zerak buudã ned a yembrã n dag get sull piig soabã yelle. A Maharayi sullã neb sõor yaa raop tus pisi la a naase.

¹⁴ Kiuug piig la a yembr soabã pʋgẽ, yaa Piraton tẽng rao a Benaya sẽn yaa Efrayiim yagensã sʋk ned a yembrã n dag n get sull piig la a yembr soabã yelle. Yẽnda sullã neb sõor yaa raop tus pisi la a naase.

¹⁵ Kiuug piig la a yiib soabã pʋgẽ, yaa Netofa tẽng rao a Ɛldayi sẽn yaa Otniyɛll buudã ned a yembrã n dag n get sull piig la a yiib soabã yelle. Yẽnda sullã neb sõor yaa raop tus pisi la a naase.

Soolmã yõgnego: Buudã nanambse

¹⁶ Israyɛll buudã nanambs la woto: Rubɛn buudã pʋgẽ, yaa a Zikri biig a Eliyezɛɛr n yaa b naaba. Sɩmyõ buudã pʋgẽ, yaa a Maaka biig a Sefatiya.

¹⁷ Leevi buudã pʋgẽ, yaa a Kemuwɛll biig a Aazabiya n yaa b naaba. A Aarõ buudã pʋgẽ, yaa a Sadok n yaa b naaba.

¹⁸ Zʋʋda buudã pʋgẽ, yaa a Eliyu sẽn yaa a Davɩɩd ba-biisã sʋk ned a yembrã n yaa b naaba. Yisakaar buudã pʋgẽ, yaa a Misɛll biig a Omri n yaa b naaba.

¹⁹ Zabulõ buudã pʋgẽ, yaa a Abdyaas biig a Yismaya n yaa b naaba. Neftali buudã pʋgẽ, yaa a Azriyɛll biig a Yerimot n yaa b naaba.

²⁰ Efrayiim buudã pʋgẽ, yaa a Azaziya biig a Ooze n yaa b naaba. A Manaase buudã pʋɩ-sʋk a yembr pʋgẽ, yaa a Pedaya biig a Zowɛll n yaa b naaba.

²¹ Manaase pʋɩ-sʋk ning sẽn dag n be Galaad pʋgẽ wã, yaa a Zakari biig a Yido n yaa b naaba. Benzame buudã pʋgẽ, yaa a Abneer biig a Yaasɩyɛll n yaa b naaba.

²² Dan buudã pʋgẽ, yaa a Yerokam biig a Azareyɛll n yaa b naaba. Nin-bãmbã fãa n yaa Israyɛll buudã nanambse.

²³ A Davɩɩd ka kɩt tɩ b sõd neb nins sẽn dag n tar yʋʋm pisi la sẽn yɩɩd woto wã ye. Bala, Sẽn-Ka-Saab rag n yeelame tɩ b na n kɩtame tɩ Israyɛll buudã fɩɩg n lebg wʋsg wa yĩngr ãdsã.

²⁴ A Seruya biig a Zoaab sɩnga nebã sõadga, la a ka baas ye. Sõadgã yĩng kɩtame tɩ Sẽn-Ka-Saab sũurã puug ne Israyɛll nebã. La b ka gʋls nimbuiidã sõor dĩm a Davɩɩd kibayã sebr pʋgẽ ye.

²⁵ A Adiyɛll biig a Azmavɛt n dag n get rĩmã kood bĩngr yelle. A Oozɩyaas biig a Zonatã n dag n get rĩmã koodã b sẽn bĩng pʋtẽ wã, tẽn-bɛdẽ wã, la tẽn-bãoonegẽ wã ne gãsdã pʋsẽ wã yelle.

²⁶ A Keluub biig a Ezri n dag n get tʋmtʋmdb nins sẽn dag n be pʋtẽ wã n koodã yelle.

²⁷ Rama tẽng rao a Simeyi n dag n get reezẽ pʋtã yelle. Neb nins sẽn dag n be-b reezẽ pʋtẽ wã n get reezẽ rãamã bĩngr yellã, yaa a Sefam biig a Zabdi n dag n yaa b naaba.

²⁸ Gedɛɛr tẽng rao a Baall-Hanan n dag n get oliiv tɩɩsã ne wom-seesã sẽn be tẽngã nug-goabgã yelle. A Yoaas n dag n get kaamã bĩngr yelle.

²⁹ Saaron tẽng rao a Sitrayi n dag n get rũm-bɛdã wãbneg yell Saaron tẽnga. A Adlayi biig a Safat n dag n get rũm-bɛdã wãbneg yell tãn-londẽ wã.

³⁰ Ismayɛll buudã ned a Obill n dag n get yʋgma wã yelle. Meronot tẽng rao a Yekdeya n dag n get bõensã yelle.

³¹ Hagaar buudã ned a Yaziiz n dag n get rũm-bãoonegã yelle. Yaa nin-bãmbã fãa n dag get rĩm a Davɩɩd laogã yelle.

A Davɩɩd zakã nebã

³² A Davɩɩd yɛsb a Zonatã rag n yaa sagenda. A Zonatã rag n yaa ned sẽn tar bãngre, la a rag n yaa gʋlsda. A Hakmoni biig a Yekiyɛll n dag n get rĩmã kamb yelle.

³³ A Ayitofɛll n dag n yaa rĩmã sagenda. Ark tẽng rao a Usayi rag n yaa rĩmã zoa.

³⁴ A Ayitofɛll loogr zugẽ, yaa a Benaya biig a Yoyada ne a Abiyataar n led yẽnda zĩigẽ. A Zoaab n dag n yaa rĩmã tãb-biis naaba.