1 Kibayã 26 - WẼNNAAM SEBRE 2014

Rigno-gũudbã ne b sula

¹ Rigno-gũudbã sul nebã yʋy la woto: Koore buudã pʋga, yaa a Koore biig a Meselemiya sẽn yaa a Azaf yagensã sʋk ned a yembrã.

² A Meselemiya roga kom-dibli a yopoe: Bi-kãsengã yaa a Zakari, yiibẽ soabã yaa a Yediyayɛlle, tãabẽ soabã yaa a Zebadiya,

³ naasẽ soabã yaa a Yatiniyɛlle, nu soabã yaa a Elam, yoobẽ soabã yaa a Yohanan, tɩ yopoe soabã yaa a Eliyoenayi.

⁴ A Obɛɛd-Edom doga kom-dibli a nii: Pipi soabã yaa a Semaya, yiibẽ soabã yaa Yehozabaade, tãabẽ soabã yaa Yowake, naasẽ soabã yaa a Sakaare, nu soabã yaa a Netaneyɛlle,

⁵ yoobẽ soabã yaa a Amiyɛlle, yopoe soabã yaa a Isakaare, tɩ nii soabã yaa a Pewultayi. Bala, Wẽnnaam dag n ning-a-la barka.

⁶ A Meselemiya biig a Semaya roga kom-dibli sẽn dag n yaa nin-kãsems b buudã sʋka. B rag n yaa gãndaado.

⁷ A Semaya kom-dibli wã la woto: yaa a Otini, a Refayɛlle, a Obɛɛde, a Ɛlzabaad ne yaopã sẽn yaa gãndaadã: a Elihu ne a Semakiya.

⁸ Nin-kãensã fãa rag n yaa a Obɛɛd-Edom yagense. Bãmb ne b kom-dibli wã ne b saam-biisã rag n yaa gãndaado, n tar pãng tʋʋmdã yĩnga. B fãa sõorã rag n yaa neb pis-yoob la a yiibu.

⁹ A Meselemiya rag n tara kom-dibli la ba-biis sẽn yaa gãndaado, la b sõorã rag n yaa neb piig la a nii.

¹⁰ A Meraari yageng a Ooza rag n tara kom-dibli a naase: Pipi soabã yaa a Simri. Baa ne yẽnda sẽn dag n ka bi-kãsengã, a ba a Meraari kõ-a-la naamã.

¹¹ Yiibẽ soabã yaa a Ilkiya, tãabẽ soabã yaa a Tebaliya, tɩ naasẽ soabã yaa a Zakari. A Oosa ne a kom-dibli wã fãa ne a saam-biisã sõor dag n yaa neb piig la a tãabo.

¹² Rigno-gũudbã sul-kãens sẽn yaa nanambs wa b ba-biisã rag n be b zĩigẽ n maand b tʋʋmd Sẽn-Ka-Saab roogã pʋgẽ.

¹³ B maana poeer buud fãa pʋgẽ, sẽn sɩng ne kãsem n tãag yao-zʋʋga, n wilg buud fãa sẽn na n gũ rignoor ninga.

¹⁴ Poeerã yãka rignoor ning sẽn be-a yaang sẽnẽ wã, n kõ a Selemiya. B leb n maana poeere, n yãk yẽnda biig a Zakari sẽn yaa sagend sẽn tar yamã, t'a na n gũ nug-rɩtg sẽnẽ rignoorã.

¹⁵ Poeerã wilgame t'a Obɛɛd-Edom n na n gũ rignoor ning sẽn be-a goabg sẽnẽ wã, tɩ yẽnda kom-dibli wã gũ teedã bĩngr doto.

¹⁶ A Supim ne a Oosa n na n gũ rignoor ning sẽn be-a nin-taoor sẽnẽ, n tees Salekɛt sor ning sẽn dʋʋd tãngã. Sull fãa rag n tota a to.

¹⁷ Daar fãa, yaa Leevi neb a yoob n dag n be yaang n gũudẽ, t'a naas be nug-goabga, t'a naas be nug-rɩtgo. Teedã bĩngr zĩisẽ, b ning-b-la yiib-yiibu, zĩis toor-toore.

¹⁸ Ro-bilã sẽn be nin-taoorã sẽnẽ, yaa Leevi neb a naase, tɩ sorã sẽnẽ yaa neb a naase, tɩ ro-bilã sẽnẽ yaa neb a yiibu.

¹⁹ Dẽ, a Koore ne a Meraari kom-dibli nins sẽn yaa rigno-gũudbã ne b sulã la woto.

Tʋʋm b sẽn kõ Leevi neb kẽere

²⁰ Leevi ned a Ahiya n dag n get Wẽnnaam doogã laogo, ne laog nins sẽn welg toor Sẽn-Ka-Saab yĩngã yelle.

²¹ Sã n yaa ne Gersom buudã ned a Ladã kom-dibli wã, bãmb kãsem-dãmbã yaa Yeyiyɛll buudã nebã,

²² Yeyiyɛll buudã neb ne b kom-dibli wã, ne a Zetam ne a yao a Zowɛlle, bãmb n get Wẽnnaam doogã laog yelle.

²³ Sã n yaa ne a Amram ne a Yitsaare, la a Ebrõ ne a Uziyɛll yagensã,

²⁴ yaa a Moyiis biig a Gersom biig a Sebuwɛlle, n dag n get laogã yelle.

²⁵ Yẽnda saam-biisã sẽn dag n yaa a Eliyezɛɛr buudã la woto: A Eliyezɛɛr doga a Rehabiya, t'a Rehabiya rog a Ezayi, t'a Ezayi rog a Zoram, t'a Zoram dog a Zikri, t'a Zikri rog a Selomiti.

²⁶ Laog nins fãa ne bũmb nins rĩm a Davɩɩd ne buudã kãsem-dãmb la tãb-biis tusr-tusr ne tãb-biis koabg-koabg nanambse, la tãb-biisã nanambs sẽn dag n welg toor Sẽn-Ka-Saab yĩngã, yaa Selomot-kãng ne a ba-biisã n dag n get b yelle.

²⁷ Rag n yaa teed b sẽn wʋk zabrã zĩigẽ wã la b yãk n welg toore, Sẽn-Ka-Saab roogã manegr yĩnga.

²⁸ Bũmb nins fãa bãngd a Sãmwɛll ne a Kiis biig a Sayulli, la a Neer biig a Abneere, ne a Seruya biig a Zoaab sẽn dag n welg toor Sẽn-Ka-Saab yĩngã, la bũmb nins fãa sẽn dag n welg toorã, rag n yaa a Selomit ne a ba-biisã n dag n get b yelle.

²⁹ A Yitsaar buudã sʋka, rag n yaa a Kenaniya ne a kom-dibli wã la b rag n yãk tɩ b get Israyɛll nimbuiidã yɛl welgr yelle, la b leb n yaa seb-gʋlsdb ne bʋ-kaoodba.

³⁰ A Ebrõ buudã sʋka, yaa a Aazabiya ne a ba-biisã sẽn yaa gãndaadã la b rag n yãk tɩ b get Sẽn-Ka-Saab tʋʋmdã ne rĩmã tʋʋmd fãa yell Israyɛll pʋgẽ, Zʋrdẽ kʋɩlgã rʋʋnde, nin-taoor sẽnẽ, bãmb sõorã rag n yaa neb tusr la kobs-yopoe.

³¹ A Ebrõ buudã sʋka, yaa a Yeriya n dag n yaa a roogã ne a buudã naabã. A Davɩɩd sẽn deeg a naamã tɩ yʋʋm pis-naaslẽ, b maana vɛɛsgo, n yãnd tɩ gãndaad sẽn yaa a Yeriya buudã neb n dag n be Yazɛɛre, Galaad soolmẽ.

³² Gãndaadã sẽn yaa a Yeriya ba-biisã sõor dag n yaa neb tus a yi la kobs-yopoe. Bãmb fãa rag n yaa b buudã kãsem-dãmba. Rĩm a Davɩɩd yãka bãmb tɩ b yaa Rubɛn ne Gaad la Manaase buudã pʋɩ-sʋkã taoor dãmba, tɩ b get Wẽnnaam yɛlã fãa ne rĩmã yɛl yelle.