1 Kibayã 25 - WẼNNAAM SEBRE 2014

Yɩɩn-yɩɩndbã ne b sula

¹ A Davɩɩd ne a tãb-biisã nanambs welga a Azaf ne a Eman la a Yedutun kom-dibli wã toore, tʋʋmdã yĩnga. Nin-bãmb dag n yɩɩnda ne kʋl la pends ne kɛma, n togsd pĩnd-n-bãngr goamã. Neb nins sẽn dag n tar tʋʋmã yʋy la woto:

² A Azaf kom-dibli wã sʋka, yaa a Zakʋʋre, a Zozɛfe, a Netaniya, ne a Azareyela. Bãmb ba a Azaf n dag n lʋɩt bãmb taoor n togsd pĩnd-n-bãngr goamã, wa sẽn zems rĩmã sẽn datã.

³ A Yedutun kom-dibli wã yaa bãmb b yoobe: yaa a Gedaliya, a Seeri, a Ezayi, a Simeyi a Aazabiya, la a Matitiya. Bãmb ba wã n dag n lʋɩt taoor n maand no-rɛɛsdb manesem, la a wẽed pɛndg n pẽgd la a waoogd Sẽn-Ka-Saabo.

⁴ A Eman kom-dibli wã yaa a Bukiya, a Mataniya, a Uziyɛlle, a Sebuwɛlle, a Yerimote, a Hananiya, a Anani, a Eliyata, a Gidalti, a Romamti-Ezɛɛre, a Yosbekasa, a Maloti, a Otiiri, la a Mahaziyote.

⁵ Nin-bãmbã fãa yaa a Eman kom-dibli. A Eman dag n yaa rĩmã bãngda, sẽn kẽed ne Wẽnnaam yɛlã wɛɛngẽ, sẽn na yɩl n wilg bãmb pãn-kãsengã. Wẽnnaam dag n kõ a Eman kom-dibli piig la a naase, la kom-pugli a tãabo.

⁶ Nin-bãmbã ba wã n dag n lʋɩt b fãa taoore, tɩ b yɩɩnd Wẽnnaam doogã yɩɩla, la b wẽed kɛm ne pends la kʋl Wẽnnaam doogã pʋgẽ tʋʋmd yĩnga. A Azaf ne a Yedutun la a Eman dag n tʋmda rĩmã yĩnga.

⁷ Nin-bãmbã ne b saam-biisã sẽn yaa yɩɩn-mitb sẽn waoogd Sẽn-Ka-Saabã sõor dag n yaa neb kobessi la pis-nii la a nii. B fãa yaa neb sẽn paam zãmsgo.

⁸ B maana poeer n yãk ned fãa ne a tʋʋmde, sẽn sɩng ne kãsem tɩ ta yao-zʋʋga, ne karen-saam-dãmb la karen-biisi.

⁹ Pipi poeerã yãka a Azaf buudã ned a Zozɛfe. A yiibẽ soabã yãka a Gedaliya ne a saam-biisã, la a kom-dibli wã. Bãmb yaa neb piig la a yiibu.

¹⁰ A tãabẽ soabã yãka a Zakʋʋr ne a kom-dibli wã la a saam-biisã. Bãmb yaa neb piig la a yiibu.

¹¹ A naasẽ soabã yãka a Yitseri ne a kom-dibli wã la a saam-biisã. Bãmb yaa neb piig la a yiibu.

¹² A nu soabã yãka a Netaniya ne a kom-dibli wã la a saam-biisã. Bãmb yaa neb piig la a yiibu.

¹³ A yoobẽ soabã yãka a Bukiya ne a kom-dibli wã la a saam-biisã. Bãmb yaa neb piig la a yiibu.

¹⁴ A yopoe soabã yaa a Yesareyela ne a kom-dibli wã la a saam-biisã. Bãmb yaa neb piig la a yiibu.

¹⁵ A nii soabã yãka a Ezayi ne a kom-dibli wã la a saam-biisã. Bãmb yaa neb piig la a yiibu.

¹⁶ A wɛ soabã yãka a Mataniya ne a kom-dibli wã la a saam-biisã. Bãmb yaa neb piig la a yiibu.

¹⁷ Piig soabã yãka a Simeyi ne a kom-dibli wã la a saam-biisã. Bãmb yaa neb piig la a yiibu.

¹⁸ Piig la a yembr soabã yãka a Azareyɛlle, ne a kom-dibli wã la a saam-biisã. Bãmb yaa neb piig la a yiibu.

¹⁹ Piig la a yiibẽ soabã yãka a Hasabiya, ne a kom-dibli wã la a saam-biisã. Bãmb yaa neb piig la a yiibu.

²⁰ Piig la a tãabẽ soabã yãka a Subayɛlle, ne a kom-dibli wã la a saam-biisã. Bãmb yaa neb piig la a yiibu.

²¹ Piig la a naasẽ soabã yãka a Matitiya, ne a kom-dibli wã la a saam-biisã. Bãmb yaa neb piig la a yiibu.

²² Piig la a nu soabã yãka a Yerimote, ne a kom-dibli wã la a saam-biisã. Bãmb yaa neb piig la a yiibu.

²³ Piig la yoobẽ soabã yãka a Hananiya, ne a kom-dibli wã la a saam-biisã. Bãmb yaa neb piig la a yiibu.

²⁴ Piig la a yopoe soabã yãka a Yosbekasa, ne a kom-dibli wã la a saam-biisã. Bãmb yaa neb piig la a yiibu.

²⁵ Piig la a nii soabã yãka a Anani ne a kom-dibli wã la a saam-biisã. Bãmb yaa neb piig la a yiibu.

²⁶ Piig la a wɛ soabã yãka a Maloti ne a kom-dibli wã la a saam-biisã. Bãmb yaa neb piig la a yiibu.

²⁷ Pisi soabã yãka a Eliyata ne a kom-dibli wã la a saam-biisã. Bãmb yaa neb piig la a yiibu.

²⁸ Pisi la a yembr soabã yãka a Otiir ne a kom-dibli wã la a saam-biisã. Bãmb yaa neb piig la a yiibu.

²⁹ Pisi la a yiibẽ soabã yãka a Gidalti ne a kom-dibli wã la a saam-biisã. Bãmb yaa neb piig la a yiibu.

³⁰ Pisi la a tãabẽ soabã yãka a Makaziyot ne a kom-dibli wã la a saam-biisã. Bãmb yaa neb piig la a yiibu.

³¹ Pisi la a naasẽ soabã yãka a Romamti-Ezɛɛr ne a kom-dibli wã la a saam-biisã. Bãmb yaa neb piig la a yiibu.