1 Kibayã 24 - WẼNNAAM SEBRE 2014

Maan-kʋʋdbã ne b sula

¹ A Aarõ yagensã ne b sul la woto: A Aarõ kom-dibli la woto: yaa a Nadaab ne a Abiyu la a Eleyazaar ne a Itamaare.

² A Nadaab ne a Abiyu renga b ba n ki, n ka rog kamb ye. A Eleyazaar ne a Itamaar n dag n get maan-kʋʋrã tʋʋmd yelle.

³ A Davɩɩd ne a Eleyazaar yageng a Sadoke, la a Itamaar yageng Ayimelɛke, n welg a Aarõ kom-dibli wã n kõ ned fãa ne a tʋʋmde.

⁴ A Eleyazaar buudã sʋka, kom-dibli nins sẽn dag n yaa kãsem-dãmbã sõor dag n yɩɩda a Itamaar kom-dibli wã. Yaa rẽ yĩng tɩ b pʋɩ a Eleyazaar yagensã sul piig la a yoobe, la b pʋɩ a Itamaar yagensã sul a nii.

⁵ B maana poeer n yãk ned fãa ne a sulli, bala, yaa a Eleyazaar ne a Itamaar kom-dibli wã n dag n yaa zĩ-sõngã nanambse, n yaa nanambs Wẽnnaam sẽn yãke.

⁶ A Netaneyɛll biig a Semaya sẽn yaa Leevi buudã ned a yembrã yaa gʋlsda. Yẽnda gʋlsa bãmb yʋyã rĩmã ne na-biisã taoore, la maan-kʋʋd a Sadok ne a Ayimelɛk sẽn yaa a Abiyataar biigã taoore, la maan-kʋʋdbã ne Leevi buudã kãsem-dãmb taoore. B yãka a Eleyazaar buudã kãsem a yembre, la b yãk a Itamaar buudã me kãsem a yembre.

⁷ Kãsem-dãmb nins b sẽn yãkã la woto: Pipi poeerã yãka a Yehoyariibi, yiibẽ soabã yãka a Yedaya,

⁸ tãabẽ soabã yãka a Harim, naasẽ soabã yãka a Seyorim,

⁹ nu soabã yãka a Malkiya, yoobẽ soabã yãka a Miyamindi,

¹⁰ yopoe soabã yãka a Hakoose, nii soabã yãka a Abiya,

¹¹ wɛ soabã yãka a Zozoe, piig soabã yãka a Sekaniya,

¹² piig la a yembr soabã yãka a Eliyasɩɩbe, piig la a yiibẽ soabã yãka a Yakim,

¹³ piig la a tãabẽ soabã yãka a Hupa, piig la a naasẽ soabã yãka a Yesebaabe,

¹⁴ piig la a nu soabã yãka a Bilga, piig la a yoobẽ soabã yãka a Imeere,

¹⁵ piig la a yopoe soabã yãka a Ezɩɩre, piig la a nii soabã yãka a Hapisɛtse,

¹⁶ piig la a wɛ soabã yãka a Petakiya, pisi soabã yãka a Ezekɩyɛlle,

¹⁷ pisi la a ye soabã yãka a Yakẽ, pisi la a yiibẽ soabã yãka a Gamulli,

¹⁸ pisi la a tãabẽ soabã yãka a Delaya, tɩ pisi la a naasẽ soabã yãk a Maaziya.

¹⁹ Yaa woto la b pʋɩ ned kam fãa ne a tʋʋmde, tɩ b na n kẽed Sẽn-Ka-Saab roogẽ wã, wa sẽn zems noor ning b sẽn dag n tũnug bãmb ba a Aarõ n kõ bãmbã, la wa sẽn zems Sẽn-Ka-Saab sẽn yaa Israyɛll Wẽnnaamã sẽn dag n yeelã.

A Leevi yagens a taaba

²⁰ A Leevi kom-dibli a taabã yʋy la woto: a Amram kom-dibli wã sʋka, yaa a Subayɛlle. A Subayɛll kom-dibli wã sʋka, yaa a Yedeya.

²¹ A Rehabiya kom-dibli wã sʋka, yaa a Yisiya sẽn yaa a buudã naabã.

²² A Yitsaar kom-dibli wã sʋka, yaa a Selomote. A Selomot kom-dibli wã sʋka, yaa a Yakate.

²³ A Ebrõ kom-dibli wã sʋka, yaa a Yeriya sẽn yaa a buudã naabã. Kãsem-pʋgdg yaa a Amariya, tãabẽ soab yaa a Yakaziyɛlle, naasẽ soab yaa a Yekamyam.

²⁴ A Uziyɛll bi-ribl yaa a Mika. A Mika kom-dibli wã sʋka, yaa a Samiiri.

²⁵ A Mika ba-biig a Yisiya kom-dibli wã sʋka, yaa a Zakari.

²⁶ A Meraari kom-dibli yaa a Makli ne a Musi la a Yaaziya.

²⁷ A Meraari bi-ribl a Yaaziya kom-dibli yaa a Soham ne a Zakʋʋr la a Ibri.

²⁸ A Makli kom-dibli yaa a Eleyazaare. A Eleyazaar ka paam bi-ribl ye.

²⁹ A Kiis bi-ribl yaa a Yerameyɛlle,

³⁰ a Musi kom-dibli yaa a Makli ne a Edɛɛr la a Yerimote. Leevi buudã ned fãa ne a roog la woto.

³¹ Bãmb me ne b ba-biisã sẽn yaa a Aarõ kom-dibli wã maana poeer dĩm a Davɩɩd ne a Sadok la a Ayimelɛk ne maan-kʋʋdbã buudã kãsem-dãmba, la Leevi buudã kãsem-dãmb taoore. B maana a woto ne buud fãa kãsma, la hal baa ne sẽn yaa-a yao-zʋʋg b saam-biisã sʋkã.