1 Kibayã 21 - WẼNNAAM SEBRE 2014

A Davɩɩd kɩtame tɩ b sõd Israyɛll nebã

¹ Daar a yembre, bɛ wã baoome n na n maan Israyɛll nebã wẽnga: A tusa a Davɩɩd t'a na n sõd Israyɛll nebã.

² Dẽ, a Davɩɩd yeela a Zoaab ne nebã nanambsã yaa: «Kẽng-y n tɩ sõd-y Israyɛll nebã, sẽn sɩng Bɛɛrseba hal n tɩ tãag Dan, la y lebg n wa wilg-m tɩ m bãng b sõore.»

³ La a Zoaab leokame yaa: «N-na! Bɩ Sẽn-Ka-Saab kɩt tɩ y nebã sõor paas naoor koabg n yɩɩd woto! M dĩm la m soaala, dẽ yĩngã, nin-bãmbã fãa ka yãmb tʋmtʋmdb la? La bõe yĩng tɩ y leb n baood n na n bãng b sõore? Bõe yĩng tɩ Israyɛll nebã na n bao beem n kõ b menga?»

⁴ La rĩmã pẽdgr sẽn dag n yaa wʋsgã, a Zoaab yiime n saag Israyɛll soolmã gilli, n sõd nebã, la a lebg n leb Zeruzalɛm.

⁵ Dẽ, a Zoaab wilga a Davɩɩd nebã b sẽn sõdã sõore. Israyɛll soolmã fãa raop sẽn tõe n kẽng zabr yaa raop tus-kẽemd la tus koabga. La Zʋʋda raop sẽn tõe n kẽng zabr yaa raop tus kobs-naas la pis-yopoe.

⁶ A Zoaab sũurã sẽn sãam ne rĩmã yam-yãkrã yĩnga, yẽnda ka sõd Leevi wall Benzame buudã ned ba a yembr n naag ye.

⁷ Wẽnnaam sũur ka yɩ noog ne a Davɩɩd yam-yãkrã ye. Rẽ kɩtame tɩ b sɩbg Israyɛlle.

Wẽnnaam sɩbga a Davɩɩde

⁸ A Davɩɩd yeela Wẽnnaam yaa: «Mam maana yel-kãseng ne bũmb ning mam sẽn maanã. Moasã, m kot-y lame tɩ y kõ mam sẽn yaa yãmb tʋmtʋmdã sugr a beegrã yĩnga, bala, mam sẽn maanã yaa yalemd meng-menga.»

⁹ La Sẽn-Ka-Saab yeela a Davɩɩd bãngd a Gaad yaa:

¹⁰ Kẽng n tɩ yeel a Davɩɩd tɩ Sẽn-Ka-Saab yetame yaa: Mam ningda tood a tãab fo taoore. Yãk a yembr bãmb sʋkã, tɩ m sɩbg-f ne to-kãnga.

¹¹ Dẽ, a Gaad kẽnga a Davɩɩd nengẽ n tɩ yeel-a yaa: Sẽn-Ka-Saab yetame yaa: «To-bãmbã sʋka, bʋg la f yãkda?

¹² Yʋʋm a tãab kom bɩ? Bɩ f bɛɛbã sẽn na n dig-f kiis a tãab n kɛ-f ne zabr sʋʋg bɩ? Bɩ Sẽn-Ka-Saab sẽn na n zab ne yãmb dasem a tãab ne zabr sʋʋg n kɩt tɩ bã-loangdg kẽ y soolmẽ wã n sãam-a zãnga? Moasã, bɩ f leok tɩ m tɩ taas sẽn tʋm-a maamã.»

¹³ La a Davɩɩd leoka a Gaad yaa: «Sũ-sãan-kãseng n tar maam! Mam sẽn lʋɩt Sẽn-Ka-Saab nugẽ n são m sẽn lʋɩt ninsaalb nusẽ. Bala, Sẽn-Ka-Saab nimbãan-zoeerã yaa wʋsgo.»

¹⁴ Dẽ, Sẽn-Ka-Saab kɩtame tɩ bã-loangdg kẽ Israyɛll soolmẽ wã, n kʋ Israyɛll neb tus pis-yopoe.

¹⁵ Wẽnnaam tʋma malɛɛk Zeruzalɛm t'a kẽng n tɩ sãam tẽngã. La malɛɛkã sẽn sãamd tẽngã wakate, Sẽn-Ka-Saab gesame la b maana b bãngẽ ne to-kãnga. Dẽ, b yeela malɛɛkã sẽn dag n sãamd tẽngã yaa: Bas woto tɩ sekame! Wakat-kãng tɩ Sẽn-Ka-Saab malɛɛkã rag n yɛsa a Zebuus ned a Ornan zɛɛgã sɛɛgẽ.

¹⁶ A Davɩɩd zẽka a nenga, n yãnd Sẽn-Ka-Saab malɛɛkã sẽn be yĩngr ne tẽng sʋka, n wõog a sʋʋg n tees Zeruzalɛm tẽngã sẽnẽ. La a Davɩɩd ne kãsem-dãmbã pila boto, n lʋɩ n fõgneg b neng tẽnga.

¹⁷ A Davɩɩd yeela Wẽnnaam yaa: «Ka maam n yeel tɩ b sõd nebã la? Yaa maam n maan yel-wẽnde, n maan sẽn yaa wẽngã. La nin-bãmbã maana bõe? Sẽn-Ka-Saab sẽn yaa mam Wẽnnaam, m yõkd-y-la sɛɛga. Bɩ y sɩbg maam ne m yirã rãmb bala, la y ra kɩt tɩ toog paam y nebã ye!»

A Davɩɩd mee tẽn-kugr Sẽn-Ka-Saab yĩnga

¹⁸ Sẽn-Ka-Saab malɛɛkã rag n yeela a Gaad t'a yeel a Davɩɩde, t'a kẽng n tɩ me tẽn-kugr Zebuus rao a Ornan zɛɛgẽ wã, Sẽn-Ka-Saab yĩnga.

¹⁹ La a Davɩɩd kẽngame n tɩ maan wa Sẽn-Ka-Saab sẽn dag n yeel a Gaad t'a yeel-a wã.

²⁰ Wakat-kãng t'a Ornan dag n be a zɛɛgẽ wã n pãbd koodo. Yẽnda wẽnemdame n yãnd malɛɛkã. La yẽnda kom-dibli a naasã sẽn dag n be ne yẽnda wã zoeeme n tɩ solge.

²¹ A Davɩɩd sẽn ta a Ornan nengẽ, a Ornan gesame n yãnd yẽnda. Dẽ, yẽnda yi a zɛɛgẽ wã, n fõgen a neng tẽng n wõgemd a Davɩɩd taoore.

²² A Davɩɩd yeela a Ornan yaa: Kõ maam zĩ-kãngã, kõ maam zɛɛgã tɩ m me tẽn-kugr n kõ Sẽn-Ka-Saabo, tɩ bã-loangdgã sẽn tar nebã sɛ. M na n yao-f-la wa sẽn zems a ligdi.

²³ A Ornan leoka a Davɩɩd yaa: M dĩm la m soaala, reeg-y-yã-a n maan y sẽn date. Ges-y-yã, mam kõta yãmb niigã tɩ y maan maoong sẽn yõogd bugmã, la ra-vuudsã tɩ y maan bugum daado, la koodã tɩ y maan zom kũunã. Mam kõta yãmb bõn-kãensã fãa.

²⁴ La rĩm a Davɩɩd yeela a Ornan yaa: Ayo! Mam na n da-a-la wa sẽn zems a ligdã sẽn yaa to-to wã. Mam ka na n deeg zaalem bũmb n maan maoong sẽn yõogd bugum, n kõ Sẽn-Ka-Saab ye!

²⁵ Dẽ, a Davɩɩd kõ a Ornan sãnem kɩlo piiga, la a reeg zĩigã.

²⁶ A Davɩɩd mee tẽn-kugr beenẽ n kõ Sẽn-Ka-Saabo, la yẽnda maana maand sẽn yõogd bugum ne zems-n-taar maando. Yẽnda pʋʋsa Sẽn-Ka-Saabo, la b leoka yẽnda pʋʋsgã n kɩt tɩ bugum yi yĩngr n sig maandã sẽn be tẽn-kugrã zugã.

²⁷ Dẽ, Sẽn-Ka-Saab goma ne malɛɛkã, la malɛɛkã lebsa a sʋʋgã n sui a wʋʋgẽ wã.

²⁸ Wakat-kãnga, a Davɩɩd sẽn mik tɩ Sẽn-Ka-Saab leoka yẽnda pʋʋsgã Zebuus rao a Ornan zɛɛgẽ wã, a maana maand beenẽ.

²⁹ Wakat-kãnga, Sẽn-Ka-Saab sɛk roogã ne maand sẽn yõogd bugmã a Moyiis sẽn dag n maan we-raoogẽ wã rag n bee maoong kʋʋb zĩigẽ wã Gabawõ.

³⁰ La a Davɩɩd dag n ka tõe n kẽng n tɩ yõk Wẽnnaam sɛɛg ye. Bala, Sẽn-Ka-Saab malɛɛkã sʋʋg kẽesa yẽnda rabeem-kãsenga.