1 Kibayã 18 - WẼNNAAM SEBRE 2014

A Davɩɩd tõoga Israyɛll yagsã

¹ Dẽ poore, a Davɩɩd tõoga Filistẽ-dãmbã, n ning-b yãnde, n deeg Gat ne a tẽn-kɩremsã fãa.

² Yẽnda zab n tõoga Moaab nebã, n kɩt tɩ b lebg a yembse, la a kɩt tɩ b yao yẽnda yõor yaoodo.

³ Wakat ning a Davɩɩd sẽn wa n kẽng n tɩ soog Efrat kʋɩlgã, yẽnda zaba ne a Hadadezɛɛr sẽn yaa Soba rĩmã Hamat tẽngã sẽnẽ, n tõog-a.

⁴ A Davɩɩd deega a Hadadezɛɛr saar-dãmb tusri, la a yõg a wed-rʋʋdb tus a yopoe, ne tãb-biis tus pisi sẽn ka zao wiidi. A Davɩɩd yãka wiid koabg sẽn tat saar-dãmbã, la a kɛ wiid a taabã fãa nao-gĩin n pase.

⁵ Siiri nebã yii Damaas n wa n na n sõng Soba rĩm a Hadadezɛɛre, la a Davɩɩd kʋʋ Siiri neb tus pisi la a yiibu.

⁶ A Davɩɩd tilga tãb-sigs Siiri nebã nengẽ Damaase, n kɩt tɩ Siiri nebã lebg a yembse, la a kɩt tɩ b yaood yẽnda yõor yaoodo. Zĩig ning fãa a Davɩɩd sẽn kẽngẽ, Sẽn-Ka-Saab kɩtdame t'a paam tõogre.

⁷ A Davɩɩd deega sãnem logd nins a Hadadezɛɛr nebã sẽn dag n bobã, n tall n kẽng Zeruzalɛm.

⁸ Tibat ne Kũn sẽn yaa a Hadadezɛɛr tẽmsã pʋse, a Davɩɩd leb n deega zũud wʋsgo. Yaa zũud-kãng la a Salmo tall n maan zũud ko-baoorã ne ra-lugdsã, la teed a taabã sẽn maan ne zũudã.

⁹ Hamat rĩm a Towu sẽn wʋm t'a Davɩɩd tõoga Soba rĩm a Hadadezɛɛr tãb-biisã fãa wã,

¹⁰ yẽnda tʋma a biig a Hadoram t'a kẽng n tɩ pʋʋs rĩm a Davɩɩd n pẽg-a, a sẽn zab n tõog a Hadadezɛɛrã yĩnga. Bala, a Towu rag n zabda ne a Hadadezɛɛre. A Towu leb n kɩsa sãnem teedo, wanzuri teedo, la zũud teed buud toor-toor tɩ b tɩ kõ a Davɩɩde.

¹¹ Rĩm a Davɩɩd rɩka wanzuri wã ne sãnemã yẽnda sẽn dag n deeg buud a taabã fãa nengẽ wã, Edom, Moaabe, Amo nebã, Filistẽ-dãmbã ne Amalɛk nebã nengẽ wã, n kõ Sẽn-Ka-Saabo.

¹² A Seruya biig a Abisayi tõoga Edom neb tus piig la a nii, yamsem tãn-longẽ wã.

¹³ A vigla tãb-sigs Edom, la a kɩtame tɩ Edom nebã fãa lebg a yembse. Zĩig ning fãa a Davɩɩd sẽn dag n kẽngdẽ, Sẽn-Ka-Saab kõt-a-la tõogre.

A Davɩɩd nanambsã yʋya

¹⁴ A Davɩɩd sooga Israyɛll soolmã fãa. Yẽnda rag n maanda sẽn zemse, la sẽn yaa tɩrg ne a soolmã nebã fãa.

¹⁵ A Seruya biig a Zoaab n dag n yaa tãb-biisã naaba. A Ayiluud biig a Zozafat n dag n yaa seb-bĩngda.

¹⁶ A Akituub biig a Sadoke, ne a Abiyataar biig a Abimelɛk n dag n yaa maan-kʋʋdba, la a Savsa rag n yaa seb-gʋlsda.

¹⁷ A Yoyiyaada biig a Benaya sẽn yaa Kerɛt ne Pelɛt nebã naabã, ne a Davɩɩd kom-dibli wã n dag n so pipi zĩig rĩmã sɛɛgẽ.