1 Kibayã 17 - WẼNNAAM SEBRE 2014

Kãab-noog a Davɩɩd ne a yagensã yĩnga

¹ Wakat ning rĩm a Davɩɩd sẽn kẽ a na-yirã, a yeela Wẽnnaam no-rɛɛs a Natã yaa: «Ade, mam sẽn be roog ning pʋgã maana ne sɛɛdr daado, tɩ Sẽn-Ka-Saab kaoolã koglgã yaool n be fu-roog tẽngre.»

² La a Natã yeel a Davɩɩd yaa: «Bũmb nins fãa sẽn be fo tagsgẽ bɩ f maane, tɩ Wẽnnaam bee ne-fo.»

³ Badaar yʋng bala, koɛɛg n yi Wẽnnaam nengẽ n yeel a Natã yaa:

⁴ «Kẽng n tɩ yeel m tʋmtʋmd a Davɩɩd tɩ Sẽn-Ka-Saab yetame yaa: ‹Ka foom n na n me roog ning mam sẽn na n zĩnd a pʋgẽ wã ye.

⁵ Sẽn paas me, hal sẽn sɩng ne daar ning mam sẽn yiis Israyɛll nebã Ezɩpt tẽngã tɩ ta rũndã, mam ka tol n zĩnd roog pʋgẽ ye. Yaa fu-rot pʋgẽ bal la m dag n be n kẽnd zĩig fãa.

⁶ Rẽ yĩnga, zĩis nins fãa mam sẽn tũ Israyɛll nebã fãa n kẽngã, mam tol n yeela Israyɛll bʋ-kaoodb nins mam sẽn kõ noor tɩ b ges m nebã yellã ned ba a yembre, tɩ yaa bõe tɩ b ka maand sɛɛdr doog n kõ maam?›

⁷ Dẽ wã, yeel m tʋmtʋmd a Davɩɩde, tɩ Saasẽ-Pãng-Soabã yetame yaa: ‹Yaa mam meng n yãk foom wakat ning fo sẽn wa n gũud rũmsã, n kɩt tɩ f lebg Israyɛll sẽn yaa mam nebã naaba.

⁸ Zĩig ning fãa fo sẽn kẽngẽ, mam zĩnda ne foom, la m sãam f bɛɛbã fãa fo taoore. Mam na n kɩtame tɩ fo yʋʋrã yi, wa dũniyã nin-kãsems yʋy sẽn yi to-to wã.

⁹ Mam na n yãka zĩig n kõ Israyɛll sẽn yaa mam nebã, n kɩt tɩ b zĩnd ne bãane, tɩ nin-wẽnsã ra leb n nams-b wa pĩndã ye.

¹⁰ Sẽn sɩng ne wakat ning mam sẽn yãk bʋ-kaoodb n kɩt tɩ b soog Israyɛll sẽn yaa mam nebã, mam ninga f bɛɛbã fãa yãnde, la mam yeela foom tɩ yaa Sẽn-Ka-Saab na n kõ-f roogo.

¹¹ Fo daarã sã n wa n ta a tɛk tɩ f sak f saam-dãmba, mam na n yãka fo yagensã sʋk ned a yembr sẽn yit fo pendẽ wã, n kɩt t'a led fo zĩigẽ n yɩ rĩmã, la m na n kɩtame t'a rĩungã paam pãnga.

¹² Yaa yẽnda n na n me roog mam yĩnga, la m na n kɩtame t'a naamã paam pãng wakat fãa yĩnga.

¹³ Mam na n yɩɩ yẽnda ba, la yẽnda na n yɩɩ mam biiga. Mam ka na n tol n bas kɩs-sɩd ning mam sẽn dag n maan ne yẽnda wã, wa m sẽn bas kɩs-sɩd ning mam sẽn dag n maan ne rĩm ning sẽn deng-a foomã ye.

¹⁴ Mam na n kɩtame tɩ yẽnda zĩnd mam doogã ne m soolmã pʋg wakat fãa, la yẽnda rĩungã na n paama pãng wakat fãa.› »

¹⁵ Dẽ, a Natã rɩka gom-kãensã fãa ne vẽneg-kãngã fãa, n tɩ togs a Davɩɩde.

A Davɩɩd pʋʋsgo

¹⁶ Rĩm a Davɩɩd kẽng n tɩ yalsa Sẽn-Ka-Saab taoor n yeele: «Wẽnnaam Sẽn-Ka-Saabo, mam yaa ãnda, la m doogã bee yɛ tɩ y tall maam hal n ta zĩig ning mam sẽn beẽ dũndã wã?

¹⁷ Wẽnnaam, rẽ ket n ka sek ye, tɩ y leb n gomd y sẽn tar saagr ning ne mam sẽn yaa yãmb tʋmtʋmdã yagens wɛɛngẽ, wakat sẽn wat yĩnga? Wẽnnaam Sẽn-Ka-Saabo, y get-m-la wa nin-kãsenga!

¹⁸ Mam na n leb n yeela yãmb tɩ bõe yɛsa, ziir ning yãmb sẽn kõt maamã poorẽ? Yaa yãmb n yãk maam.

¹⁹ Sẽn-Ka-Saabo, yaa maam, yãmb tʋmtʋmdã sẽn ta yãmb yamã yĩng la y sẽn maan bõn-kãsems a woto n na n kɩt tɩ nebã yãndã.

²⁰ Sẽn-Ka-Saabo, sã n yaa ne tõnd sẽn wʋmd tɩ b gomdã, ned ka be n zem yãmb ye, la Wẽnnaam a to ka be sã n ka yãmb bala.

²¹ Dẽ yĩngã, buud bee dũniyã zug wa Israyɛll sẽn yaa yãmb nebã, tɩ b Wẽnnaamã fãag-b n kɩt tɩ b lebg a neb sɩda? Yãmb maana bõn-kãsems ne bõn-yɛɛsdse, n kɩt tɩ nebã bãng tɩ y yaa kãsenga. Yãmb kɩtame tɩ buud toay-toay zoe neb nins yãmb sẽn yiis Ezɩptã taoore.

²² Yãmb kɩtame tɩ Israyɛll nebã lebg yãmb neb wakat fãa yĩnga, tɩ yãmb a Sẽn-Ka-Saab lebg bãmb Wẽnnaam.

²³ Moasã, Sẽn-Ka-Saabo, kɩt-y tɩ gomd ning yãmb sẽn gom mam sẽn yaa yãmb tʋmtʋmdã ne a yagensã wɛɛngẽ wã paam pidsg wakat fãa. Maan-y wa y sẽn yeelã.

²⁴ Bɩ y pids y gomdã, tɩ y yʋʋrã yi wakat fãa tɩ nebã yeele: ‹Saasẽ-Pãng-Soabã yaa Israyɛll Wẽnnaam!› Bɩ maam a Davɩɩd sẽn yaa yãmb tʋmtʋmdã roog paam pãng yãmb taoore!

²⁵ Bala, yãmb meng n wilg maam tɩ y na n kɩtame tɩ m yageng a yembr ledg maam m zaoorẽ wã. Yaa rẽ yĩng n kɩt tɩ m sũur keemẽ tɩ m yas yãmb taoor n pʋʋsdẽ.

²⁶ Moasã, Sẽn-Ka-Saabo, yãmb n yaa Wẽnnaam, la yaa yãmb n kãab maam bõn-kãnga.

²⁷ Taa yãmb yam tɩ y na n ning m doogã barka, t'a tõe n kaoos yãmb taoor wakat fãa. Bala yaa yãmb n so barka, la yãmb sã n ning barka, yaa wakat fãa yĩnga!»