1 Kibayã 16 - WẼNNAAM SEBRE 2014

¹ B sẽn tall Wẽnnaam kaoolã koglgã n wa wã zugẽ, b ning-a-la fu-roog ning a Davɩɩd sẽn dag n segl a yĩnga pʋgẽ, la b maana maand sẽn yõogd bugum ne zems-n-taar maand Wẽnnaam taoore.

² A Davɩɩd sẽn maan maoong sẽn yõogd bugmã ne zems-n-taar maoongã n sɛ, a ninga nebã zug bark ne Sẽn-Ka-Saab yʋʋre.

³ Dẽ zugẽ, a pʋɩɩ Israyɛll nebã fãa rɩɩbo. Pag ne rao fãa paama bur-gilg a yembre, tamaaro-gilg a yembre, la reezẽ-koeem-gilg a yembre.

Leevi nebã yɩɩl n waooga Sẽn-Ka-Saabo

⁴ A Davɩɩd kɩtame tɩ Leevi neb kẽer yals Sẽn-Ka-Saab kaoolã koglgã taoore, n yɩɩl n pẽg Sẽn-Ka-Saab sẽn yaa Israyɛll Wẽnnaamã. Nin-bãmb la woto:

⁵ B taoor soabã yaa a Azafe, yiibẽ soab yaa a Zakari, sẽn pʋgd yaa a Yeyiyɛlle, a Semiramote, a Yekiyɛlle, a Matitiya, a Eliyaabe, a Benaya, n paas a Yeyiyɛlle. B rag n wẽeda kʋla, ne pendse. A Azaf rag n wẽeda kɛma.

⁶ Maan-kʋʋdb a Benaya ne a Yakaziyɛll rag n peebda tãntãad Wẽnnaam kaoolã koglgã taoor wakat fãa.

⁷ Yaa badaar la a Davɩɩd kɩt t'a Azaf ne a ba-biisã lebg Sẽn-Ka-Saab yɩɩn-yɩɩndba. B yɩɩllã la woto.

⁸ Bɩ y waoog Sẽn-Ka-Saabo, la y zẽk bãmb yʋʋrã! Kɩt-y tɩ nebã bãng bãmb tʋʋm-kãsemsã!

⁹ Yɩɩl-y bãmb yĩnga, pʋd-y yɩɩl bãmb yĩnga! Tags-y bãmb tʋʋm-kãsemsã fãa yelle!

¹⁰ Maan-y sũ-noog bãmb yʋ-sõngã yĩnga! Bɩ sẽn baood-b Sẽn-Ka-Saabã maan sũ-noogo!

¹¹ Bao-y Sẽn-Ka-Saabo, bao-y bãmb pãngã, bao-y bãmb wakat fãa!

^12-13 Yãmb sẽn yaa b tʋmtʋmd a Israyɛll yagensã, yãmb sẽn yaa a Zakoob yagense, n yaa bãmb nin-tũusdsã! Tẽeg-y bõn-yɛɛsds nins bãmb sẽn maanã yelle, tẽeg-y bõn-kãsemsã ne b bʋ-kaoorã yelle!

¹⁴ Bãmb yaa Sẽn-Ka-Saabo, n yaa tõnd Wẽnnaam. Bãmb yaa dũniyã gill fãa bʋ-kaooda.

¹⁵ Tẽeg-y bãmb kaoolã yell wakat fãa, Tẽeg-y b gomd ning b sẽn yeel zamaan tusr yĩngã yelle.

¹⁶ Tẽeg-y kaool ning b sẽn maan ne a Abrahaamã yelle, la wẽeneg ning bãmb sẽn wẽen ne a Izakã yelle.

¹⁷ Bãmb vigla kaool-kãng tɩ yɩ noor a Zakoob yagensã yĩnga, la kaool Israyɛll nebã yĩng wakat fãa,

¹⁸ N yeele: «Mam na n kõo foom Kana tẽngã tɩ yɩ yãmb pʋɩɩre.»

¹⁹ Yãmb sõorã rag n ka waoog ye, y rag n yaa neb bilf bala. Yãmb dag n yaa sãamb beenẽ.

²⁰ Bãmb dag n yita buud a to pʋga, n kẽng buud a to pʋga, la b yit soolem a to n kẽng neb a taab nengẽ.

²¹ La Sẽn-Ka-Saab ka bas tɩ ned ba a yembr nams-b ye. Bãmb lenga rĩm-dãmb bãmb yĩnga, n yeele:

²² «Da saag-y n sɩɩs-y mam nin-tũusdsã ye, la y ra maan mam no-rɛɛsdbã wẽng ye!

²³ Bɩ dũniyã gill nebã yɩɩl Sẽn-Ka-Saab yĩnga! Moon-y bãmb fãagr koe-noogã daar fãa!

²⁴ Togs-y bãmb ziirã bu-zẽmsã sʋka! Togs-y bãmb tʋʋm-kãsemsã nebã fãa sʋka!

²⁵ Bala, Sẽn-Ka-Saab yaa kãsenga, la b zemsa ne pẽgr buud fãa, bãmb seka zoees n yɩɩd wẽnnaam-dãmbã fãa.

²⁶ Bala, buud a taabã wẽnnaam-dãmbã fãa yaa zĩrẽ wẽnnaam-dãmbã, la yaa Sẽn-Ka-Saab n naan saasã.

²⁷ Sẽn-Ka-Saab nengã tara ziir n pɩnda. Bãmb sẽn beẽ wã pida ne pãng la sũ-noogo.

²⁸ Buud toay-toayã roto, pẽg-y Sẽn-Ka-Saabo! Kõ-y bãmb waoogre, wilg-y b pãngã!

²⁹ Kõ-y Sẽn-Ka-Saab yʋʋrã waoogre! Tall-y kũun n wa bãmb taoore. Wõgemd-y Sẽn-Ka-Saab taoore, b sõmblmã sẽn wat n pukdẽ wã.

³⁰ Bɩ dũniyã neb fãa rig bãmb taoor ne rabeem! Bãmb naana dũniyã t'a yas kãenkãe n ka vigsdẽ ye.

³¹ Bɩ saasẽ maan sũ-noogo, la bɩ dũniyã kɩdme! Bɩ b moon n yeel buudã fãa, tɩ Sẽn-Ka-Saab n yaa rĩmã!

³² Bɩ ko-kãsengã ne bũmb nins fãa sẽn be a pʋgẽ wã maan dãamde! Bɩ weoogã ne bũmb nins fãa sẽn be a pʋgẽ wã kɩdme!

³³ Bɩ weoogã tɩɩs kaas ne sũ-noog Sẽn-Ka-Saab taoore, bala, bãmb watame! Bãmb wat n na n kaoo dũniyã bʋʋdo.»

³⁴ Pẽg-y Sẽn-Ka-Saab tɩ b yaa sõngo. Bala, bãmb nonglmã paada wakat fãa!

³⁵ Bɩ y yeele: Wẽnnaam sẽn yaa tõnd fãagda, bɩ y fãag-do, tigm-y tõnd n fãag-d bu-zẽmsã nugẽ, tɩ d tõe n balem yãmb yʋ-sõngã, la tɩ tõnd zu-zẽkrã yɩ yãmb waoogr yĩnga!

³⁶ Bɩ Sẽn-Ka-Saab sẽn yaa Israyɛll Wẽnnaamã paam pẽgr zamaan woo zamaane! Dẽ, nebã fãa yeelame: «Ãmina!» La bãmb pẽga Sẽn-Ka-Saabo.

³⁷ Dẽ, a Davɩɩd basa Sẽn-Ka-Saab kaoolã koglgã ne a Azaf la a ba-biisã, tɩ b tõe n maan b tʋʋmd koglgã taoor wakat fãa, wa sẽn zems daar fãa tõogã.

³⁸ A yãka a Yedutun biig a Obɛɛd-Edom, ne a Ooza, n paas b saam-biis pis-yoob la a nii wã, tɩ b yɩ rigno-gũudba.

³⁹ La a basa maan-kʋʋd a Sadok ne maan-kʋʋdb a taabã sẽn yaa yẽnda saam-biisã Gabawõ zĩ-sõngẽ wã,

⁴⁰ tɩ wakat fãa bɩ b maand maoong sẽn yõogd bugmã beenẽ yibeoog la zaabr Sẽn-Ka-Saab yĩnga, la b maand bũmb nins fãa sẽn gʋls tõog ning Sẽn-Ka-Saab sẽn vigl Israyɛll nebã yĩngã.

⁴¹ Neb nins sẽn dag n be beenẽ ne bãmb yaa a Eman ne a Yedutun, n paas neb a taabã b sẽn dag n yãk tɩ b yɩɩl n pẽg Sẽn-Ka-Saabo, b nonglmã sẽn paad wakat fãa wã yĩnga.

⁴² A Eman ne a Yedutun dag n peebda bardo, la b wẽed kɛma, n paas Wẽnnaam yʋʋr waoogr yʋʋm-teed a taabã. A Yedutun kom-dibli wã la b rag n yãk tɩ b yaa rignoorã gũudba.

⁴³ Dẽ poore, ned fãa kuila a yiri, la a Davɩɩd me lebg n kuila a yir n na n tɩ ning a yirã rãmb barka.