1 Kibayã 14 - WẼNNAAM SEBRE 2014

A Davɩɩd bee Zeruzalɛm

¹ Tɩɩr dĩm a Hiram tʋma neb a Davɩɩd nengẽ ne sɛɛdr daado, la a kɩt tɩ tãn-metb ne ra-wãadb kẽng n tɩ me zak n kõ a Davɩɩde.

² Woto, a Davɩɩd bãngame tɩ yaa Sẽn-Ka-Saab n yãk yẽnda n kɩt t'a lebg Israyɛll dĩma, la a rĩungã rag n paamda pãng n paasdẽ, Israyɛll sẽn yaa bãmb nebã maasem yĩnga.

³ A Davɩɩd dɩka pagb a taab Zeruzalɛm, la b roga kom-dibli ne kom-pugli a taab n kõ-a.

⁴ Kamb nins a Davɩɩd sẽn dog Zeruzalɛmã yʋy la woto: yaa a Simeya ne a Sobaabe, la a Natã ne a Salmo,

⁵ A Yibaare, a Elisuwa, a Ɛlpelɛte,

⁶ a Noga, a Nefɛɛge, a Yafiya,

⁷ a Elisama, a Beeliyada, ne a Elifelɛte.

A Davɩɩd tõoga Filistẽ-dãmbã

⁸ Filistẽ-dãmbã sẽn wʋm tɩ b pʋdga a Davɩɩd zug rĩung kaam t'a lebg Israyɛll soolmã fãa rĩmã, bãmb fãa kẽngame n tɩ baood-a n na n yõke. La a Davɩɩd bãngame n na n yi n seg bãmba.

⁹ Filistẽ-dãmbã kẽng n tɩ sũu tãp Refayim longẽ wã.

¹⁰ Dẽ, a Davɩɩd soka Wẽnnaam yaa: «Mam tog n kẽngame n tɩ zab ne Filistẽ-dãmbã bɩ? Yãmb na n kɩtame tɩ mam tõog Filistẽ nebã bɩ?» La Sẽn-Ka-Saab leoka yẽnda yaa: «Kẽng tɩ m na n kɩtame tɩ f tõog-ba.»

¹¹ Dẽ, Filistẽ-dãmbã kẽng n tɩ zaba ne a Davɩɩd nebã Baall-Peratsim, la a Davɩɩd tõoga bãmba. A Davɩɩd yeelame: Sẽn-Ka-Saab maana sor tɩ mam wẽdg m bɛɛbã n looge, wa koom sẽn kaoog bɛoongo. Yaa rẽ yĩng tɩ b boond zĩ-kãng tɩ Baall-Peratsim, sẽn dat n togs tɩ bɛoongã soaba.

¹² La Filistẽ-dãmbã zoeeme n bas b wẽn-naandsã beenẽ. La a Davɩɩd kɩtame tɩ b wʋk wẽn-naandsã n yõog bugum.

¹³ Dẽ poore, Filistẽ-dãmbã leb n kẽng n tɩ sũu tãp longẽ wã.

¹⁴ La a Davɩɩd leb n soka Wẽnnaam, la Wẽnnaam yeela yẽnda yaa: «Ra kẽng n tɩ seg-b ye. Gilg b poorẽ wã, n tɩ paam-b tɩɩsã neng taoore.»

¹⁵ Fo sã n wa wʋm bʋrg sẽn yit tɩɩsã zut sẽn wẽnd neb sẽn kẽnd rãamde, bɩ f sɩng zabrã tɩ yaa Wẽnnaam n lʋɩt fo taoor n na n sõng foom n zab ne Filistẽ-dãmbã.

¹⁶ Dẽ, a Davɩɩd maana wa Wẽnnaam sẽn yeel yẽnda wã. Yẽnda zaba ne Filistẽ-dãmbã, sẽn sɩng ne Gabawõ hal n tãag Gezɛɛre.

¹⁷ A Davɩɩd yʋʋrã yii tẽmsã fãa pʋgẽ. La Wẽnnaam kɩtame tɩ buudã fãa zoe bãmb dabeem.