1 Kibayã 13 - WẼNNAAM SEBRE 2014

A Davɩɩd talla kaoolã koglgã n kẽng Zeruzalɛm

¹ A Davɩɩd tigma tãb-biis tusr-tusr ne tãb-biis koabg-koabg nanambsã, ne kãsem-dãmbã fãa.

² La a Davɩɩd yeela Israyɛll nebã fãa yaa: «Sã n nooma yãmba, la sã n taa Sẽn-Ka-Saab sẽn yaa tõnd Wẽnnaamã yam, bɩ d tʋm neb tɩ b tɩ bool tõnd ba-biis a taabã sẽn ket Israyɛll ween-vɩɩs a naasã pʋgẽ, n paas maan-kʋʋdbã ne Leevi nebã sẽn be bãmb tẽn-kɩremsã, tɩ b wa naag tõnd n tigme.

³ Woto, tõnd na n talla d Wẽnnaamã kaoolã koglgã n kuil d tẽngẽ, bala a Sayull wakatẽ wã, tõnd dag n ka ges a yell neer ye.»

⁴ Yam-yãkrã taa Israyɛll nebã fãa yam, la b sakame tɩ b na n maan a woto.

⁵ Dẽ, a Davɩɩd tigma Israyɛll nebã fãa, sẽn sɩng ne Sihoor sẽn be Ezɩptã, n tãag Hamat tẽngã noore, n na n kɩt tɩ b kẽng Kiryat-Yeyarim n tɩ tall Wẽnnaam kaoolã koglgã n wa.

⁶ A Davɩɩd ne Israyɛll nebã fãa kẽnga Baala sẽn be Kiryat-Yeyarim, Zʋʋda soolmẽ wã, n na n tɩ tall Wẽnnaam kaoolã koglgã sẽn be serubẽ-rãmbã zut tɩ b boond Sẽn-Ka-Saab yʋʋrã a zugã, n wa.

⁷ Dẽ, bãmb dɩka Wẽnnaam kaoolã koglgã sẽn dag n be a Abinadaab zakẽ wã, n dogl terok-paall zugu. La a Uuza ne a Akiyo n dag n kẽnd n yegd terokã la b get a yelle.

⁸ Wakat-kãng t'a Davɩɩd ne Israyɛll nebã fãa rag n wɩsga b meng n wẽed pends ne kʋla, sɩlsãgse, kɛma, la ne tãntãado, la b yɩɩnd Wẽnnaam taoore.

⁹ La bãmb sẽn ta Kidon zɛɛgẽ wã, niigã salgame tɩ koglgã rag n na n lʋɩ, la a Uuza tẽega a nug n na n gãd-a.

¹⁰ Sẽn-Ka-Saab sũur puuga ne a Uuza, a sẽn tẽeg a nug n na n gãd koglgã yĩnga, la Sẽn-Ka-Saab kɩtame t'a ki zĩig pʋgẽ Wẽnnaam taoore.

¹¹ A Davɩɩd sũur sãamame, Sẽn-Ka-Saab sẽn kɩt t'a Uuza ki wã yĩnga. Yaa rẽ n so tɩ b boond zĩ-kãng tɩ Perɛɛz-Uuza, sẽn dat n togs t'a Uuza kũum zĩiga, hal tɩ ta rũndã.

¹² Badaare, a Davɩɩd zoee Wẽnnaam dabeem, la a yeelame: «Mam na n yɩ a wãn n tall Wẽnnaam kaoolã koglgã n kẽng m zakẽ wã?»

¹³ Dẽ, a Davɩɩd ka tall koglgã n kẽng a zakẽ wã, a Davɩɩd tẽngẽ wã ye. A kɩtame tɩ b tall-a n kẽng Gat rao a Obɛɛd-Edom yirã.

¹⁴ Koglgã pa a Obɛɛd-Edom zakẽ wã kiuug a tãabo, la Sẽn-Ka-Saab ninga a Obɛɛd-Edom zakã ne bũmb nins fãa yẽnda sẽn dag n so wã barka.