1 Kibayã 11 - WẼNNAAM SEBRE 2014

A Davɩɩd lebga Israyɛll dĩma

¹ Israyɛll nebã fãa tigma taab a Davɩɩd nengẽ Ebrõ n yeel-a yaa: «Tõnd ne yãmb yaa bũmb a yembre.

² A Sayull sẽn dag n yaa rĩmã wakate, yaa yãmb n dag n luɩt Israyɛll nebã taoor wakat fãa tɩ b kẽnd n zabdẽ, la y lʋɩt b taoor tɩ b lebg n wa.» Sẽn-Ka-Saab sẽn yaa yãmb Wẽnnaamã yeela yãmb yaa: «Foom n na n yɩ Israyɛll sẽn yaa mam nebã pe-kɩɩma. Foom n na n lebg Israyɛll sẽn yaa mam nebã naaba.»

³ Woto, Israyɛll kãsem-dãmbã fãa waa rĩm a Davɩɩd nengẽ Ebrõ, la a Davɩɩd maana kaool ne bãmb Sẽn-Ka-Saab taoor Ebrõ. Bãmb pʋdga a Davɩɩd zug rĩung kaam t'a lebg Israyɛll rĩmã, wa Sẽn-Ka-Saab sẽn dag n yeel a Sãmwɛll t'a togsã.

A Davɩɩd zab n deega Zeruzalɛm

⁴ A Davɩɩd ne Israyɛll nebã fãa kẽname n na n tɩ kẽ Zeruzalɛm, sẽn dat n togs tɩ Zebuusi. Yaa beenẽ la Zebuus nebã rag n be.

⁵ Zebuus nebã yeela a Davɩɩd yaa: «Yãmb ka na n kẽ ka ye!» La a Davɩɩd zab n deega Sɩyõ tẽngã pãng zĩiga, sẽn dat n togs t'a Davɩɩd tẽngã.

⁶ A Davɩɩd dag n yeelame: «Ned ning sẽn na n yɩ-a pipi n tõog Zebuus nebã, yẽnda soab n na n lebg tãb-biisã naaba.» Dẽ, a Seruya biig a Zoaab n yɩ pipi n yik zabrã, la a lebga tãb-biisã naaba.

⁷ A Davɩɩd zĩnda tẽngã pãng zĩigẽ. Yaa rẽ yĩng n kɩt tɩ b bool tẽn-kãng t'a Davɩɩd tẽnga.

⁸ Yẽnda meeme n gilg tẽngã, sẽn sɩng ne Milo zĩigã ne zĩis nins sẽn pẽ be wã. A Zoaab n lebs n me tẽngã zĩis a taabã.

⁹ A Davɩɩd dag n paamda pãng n paasdẽ, la Saasẽ-Pãng-Soabã rag n bee ne yẽnda.

A Davɩɩd gãndaadã

¹⁰ Ad a Davɩɩd gãndaadã nanambse. Bãmb dag n naaga Israyɛll nebã fãa n sõng yẽnda a naamã baoob wakat t'a lebg rĩmã, wa sẽn zems Sẽn-Ka-Saab sẽn dag n gom Israyɛll wɛɛngẽ wã.

¹¹ A Davɩɩd gãndaadã la woto: Yaa a Hakmoni biig a Yasobeyam sẽn yaa gũudbã naabã. Yaa a Yasobeyam n dag n dɩk a kãnd n kʋ neb kobs-tã wakat a yembrã.

¹² Sẽn pʋgd yaa Akoka tẽng rao a Dodo biig a Eleyazaar sẽn yaa gãndaad a tãabã sʋk ned a yembrã.

¹³ Yẽnda n dag n be ne a Davɩɩd Pas-Damim sẽn yaa zĩig ning Filistẽ-dãmbã sẽn tigim taab zabrã yĩngã. Oorz pʋʋg n dag n be zĩ-kãngã. Israyɛll nebã rag n zoetame n na n põs Filistẽ-dãmbã.

¹⁴ A Eleyazaar ne a nebã yalsa pʋʋgã tẽn-sʋk n zab n deeg-a, la b tõoga Filistẽ-dãmbã. Sẽn-Ka-Saab kɩtame tɩ bãmb paam tõog-kãsenga.

¹⁵ Nanambs pis-tã wã sʋk neb a tãab kẽnga a Davɩɩd nengẽ pĩisã sẽn be Adulam tãngã bokẽ wã sʋka, la rẽ tɩ Filistẽ-dãmbã rag n tilga b tãb-sikã Refayim tãn-longẽ wã.

¹⁶ Wakat-kãng t'a Davɩɩd bee tãmsã pẽgsẽ. Filistẽ-dãmbã rag n tara b tãb-biis zĩig Betlehɛm.

¹⁷ Ko-yũud wa n yõka a Davɩɩd t'a yeele: Ãnda n na n kẽng ko-baoor ning sẽn be Betlehɛm tẽngã noorã n tɩ yõng koom n wa kõ-m tɩ m yũ?

¹⁸ Dẽ, nanambs a tãabã pɩʋʋga Filistẽ-dãmbã tãb-sikã n tɩ yõng koom ko-baoor ning sẽn be Betlehɛm tẽngã noorã, n wa kõ a Davɩɩde. La a Davɩɩd ka sak n yũ koomã ye. A rɩk-a lame n daag tẽng Sẽn-Ka-Saab yĩnga.

¹⁹ A Davɩɩd yeelame: Abada! Bɩ mam Wẽnnaamã ra sak tɩ mam maan bũmb a woto ye! Nin-kãensã gẽnega b yõor n tɩ yõng koomã n wa kõ maam. Dẽ wã, mam sã n yũ ko-kãngã, a na n yɩɩ wa mam sẽn yũud bãmb zɩɩm. Woto, a Davɩɩd ka sak n yũ koomã ye. Neb a tãabã sẽn maan la woto.

²⁰ A Zoaab yao a Abisayi n dag n yaa neb a tãabã taoor soaba. Yaa yẽnda n dag n dɩk a kãnd n kʋ neb kobs-tã daar a yembre, t'a yʋʋrã yi n yɩɩg neb a yiibã.

²¹ Sull a yiibẽ soabã pʋgẽ, a Abisayi n paam waoogr neb a tãabã sʋka, la yẽnda n yɩ b naaba. La a ka ta neb a tãabã ye.

²² A Zoyiyada biig a Benaya sẽn yaa Kabtseyɛll tẽng raoã rag n yaa nin-kãsenga. Yẽnda maana bõn-kãsems wʋsgo. Yẽnda n dag n kʋ Moaab gãndaad a yiibã. Leb n yaa yẽnda n sig tãng bokẽ n kʋ gɩgemd sapɩlem daarã.

²³ Yẽnda n leb n kʋ Ezɩpt tẽng rao a yembr woglem sẽn ta kãntɩɩg a nu wã. Ezɩpt raoã rag n zãada kãnd sẽn yaa bedr wa koeer-bõanga. Yẽnda sega Ezɩpt raoã ne dasaare, la yẽnda reega raoã kãnde, n wẽneg n kʋ-a.

²⁴ Dẽ, a Zoyiyada biig a Benaya sẽn maanã la woto, la gãndaad a tãabã sʋka, yẽnda yʋʋrã n dag n yi n yɩɩda.

²⁵ Nanambs pis-tã wã sʋka, yẽnda n paam waoogr n yɩɩda. La yẽnda ka ta gãndaad a tãabã ye. Dẽ, a Davɩɩd kɩtame t'a lebg a gũudbã naaba.

²⁶ Gãndaadã yʋy la woto: A Zoaab ba-biig a Azayɛlle, Betlehɛm dao a Dodo biig a Ɛlhana,

²⁷ Haroa tẽng rao a Samote, Pelõ tẽng rao a Elɛtse,

²⁸ Tekoa tẽng rao a Ikɛɛs biig a Ira, Anatot tẽng rao a Abiyezɛɛre,

²⁹ Husa tẽng rao a Sibekayi, Akoka tẽng rao a Ilayi,

³⁰ Netofa tẽng rao a Maharayi, Netofa rao a Baana biig a Helɛɛde,

³¹ Gibeya sẽn yaa Benzame nebã tẽng rao a Ribayi biig a Itayi, Piratõ tẽng rao a Benaya,

³² Gaas tẽng ko-soodẽ dao a Urayi, Tẽn-nabd-koɛɛngẽ dao a Abɩyɛlle,

³³ Baharum dao a Azmavɛte, Salbon rao a Eliyaaba,

³⁴ Giizõ rao a Bene-Asɛm, Haraar dao a Sage biig a Zonatã,

³⁵ Haraar dao a Sakaar biig a Ahiyam, a Uur biig a Elifalle,

³⁶ Mekera rao a Efɛɛre, Pelõ rao a Ahiya,

³⁷ Karmell tẽng rao a Ɛtsron, Ɛɛzbayi biig a Naarayi,

³⁸ A Natã ba-biig a Zowɛlle, a Hagri biig a Mibhaare,

³⁹ Amo rao a Selɛke, Beerot dao a Narayi sẽn dag n zãad a Seruya biig a Zoaab zab-teedã.

⁴⁰ A Yetɛɛr buudã ned a Ira, a Yetɛɛr buudã ned a Garɛɛbe,

⁴¹ a Hɛt buudã ned a Uuri, a Alayi biig a Zabaade,

⁴² a Rubɛn buudã naabã, la tãb-biis pis-tã wã naab a Siiza biig a Adina,

⁴³ a Maaka biig a Hanan, Mitni buudã ned a Zozafate,

⁴⁴ Astarot tẽng rao a Uziya, Arowɛɛr dao a Otam kom-dibli a Sama ne a Yeyiyɛlle,

⁴⁵ A Simri biig a Yediyayɛlle, ne a ba-biig a Yoha sẽn yaa Tids tẽng rao nedã,

⁴⁶ Mahava tẽng rao a Eliyɛlle, a Ɛlnaam kom-dibli a Yeribayi ne a Yosaviya, Moaab tẽng rao a Yitma,

⁴⁷ N paas a Eliyɛll ne a Obɛɛd la a Yaasiyɛll-Metsobaya.