1 Kibayã 10 - WẼNNAAM SEBRE 2014

ISRAYƐLL DĨM A DAVƖƖD KIBARE A Sayull kũum

¹ Filistẽ-dãmbã yika zabr ne Israyɛll nebã Gilboa tãngã zugu, la yɩɩ tɩlɛ ne Israyɛll nebã tɩ b zoe sẽn na yɩl n põs Filistẽ-dãmbã. Israyɛll neb wʋsg kii tãngã zugu.

² Filistẽ-dãmbã kolg n dɩdga a Sayull ne a kom-dibli wã, n kʋ a Zonatã ne a Abinadaab la a Malki-Suwa sẽn yaa a Sayull kom-dibli wã.

³ Sẽn sɩng ne wakat-kãnga, zabrã wa n lebga a Sayull bal la b baooda. Tãb-tãoodbã yãnd-a lame, la rabeem yõk-a lame t'a rigda.

⁴ La a Sayull yeela bi-bɩɩg ning sẽn dag n zãad-a yẽnda zab-teedã yaa: «Wõog f sʋʋgã n kõs-m n kʋ, tɩ nin-bãmbã sẽn ka kẽ bãongã ra wa yaal-m n yaool n kʋ-m ye.» La bi-bɩɩg ning sẽn dag n zãad-a yẽnda zab-teedã ka sak ye. Bala, rabeem dag n tar-a lame. Dẽ, a Sayull dɩka a sʋʋgã n tilg n bas a meng n lʋɩ a zugu.

⁵ Bi-bɩɩg ning sẽn dag n zãad-a a Sayull zab-teedã sẽn yã t'a Sayull kiime, yẽnda me rɩka a sʋʋgã n tilg n bas a meng n lʋɩ a zug n ki.

⁶ Yɩɩ woto la a Sayull ne a kom-dibli a tãabã la yirã fãa naag taab n ki.

⁷ Israyɛll neb nins fãa sẽn dag n be tãn-longẽ wã yãame tɩ Israyɛll nebã zoeeme. Bãmb me zoe n basa b tẽmsã, tɩ Filistẽ-dãmbã wa zĩnd be.

⁸ Vẽkembeoogo, Filistẽ-dãmbã wa n wʋka sẽn ki-bã teedo, la bãmb yãnda a Sayull ne a kom-dibli wã sẽn ki n dɩg Gilboa tãngã zugu.

⁹ La bãmb wʋka b teedã, la b fiuug a zugã, la b wʋk a zab-teedã. Dẽ poore, b kɩtame tɩ b saag Filistẽ-dãmbã tẽng n togs b bõn-naandsã ne nebã fãa kiba-noogã.

¹⁰ B bĩnga a Sayull zab-teedã b wẽnnaamã roogẽ, la b yagl a zu-wangã a Dagõ roogẽ wã.

¹¹ Yabɛɛs tẽngã sẽn be Galaad soolmẽ wã neb sẽn wʋm bũmb nins fãa Filistẽ-dãmbã sẽn maan a Sayullã,

¹² gãndaadã fãa tɩ rɩka a Sayull ne a kom-dibli wã kũumã, n tall n kẽng Yabɛɛs tẽnga. Bãmb muma b kõabã terebẽnt tɩɩg tẽngr Yabɛɛse, la b loe noor dasem a yopoe.

¹³ A Sayull kiime, a sẽn beeg Sẽn-Ka-Saabã yĩnga. Bala, yẽnda kɩɩsa Sẽn-Ka-Saab noore, n tol n bao kinkir-bagb sõngre.

¹⁴ Yẽnda sẽn ka bao Sẽn-Ka-Saab sõngrã yĩnga, Sẽn-Ka-Saab kɩtame t'a ki, la b kɩt t'a Izayi biig a Davɩɩd led a zĩigẽ n lebg rĩmã.