1Tesalonik Rãmba 3 - WẼNNAAM SEBRE 2014

A Poll tʋʋm Tesalonik

¹ Tõnd wa n ka leb n tõe n gũ yɛs ye. Dẽ n kɩt tɩ tõnd yãk yam tɩ yaa tõnd bal n na pa Atɛn.

² La tõnd tʋma d ba-biig a Tɩmote sẽn yaa tõnd tʋmd-n-taag Wẽnnaam tʋʋmdã pʋgẽ, n moond Kiris koe-noogã, t'a wa n paas yãmb raoodo, la a sagl yãmb y tẽebã sõngr yĩnga,

³ tɩ yel-pakr ning sẽn paamd yãmb moasã wã da wa n vigs ned baa a yembr ye. Bala, yãmb mens miime tɩ nams-kãens yaa tõnd pʋɩɩre.

⁴ Wakat ning tõnd sẽn dag n be ne yãmbã, tõnd pĩnd n yeela yãmb tɩ d na n paama namsgo. La yãmb miime tɩ yaa rẽ n wa wã.

⁵ Dẽ n kɩt tɩ mam sẽn ka leb n tõe n gũ n kaoosã yĩnga, mam tʋma a Tɩmote t'a wa n sok yãmb tẽebã yelle, mam sẽn zoet dabeem tɩ makdã na n mak yãmb tɩ tõnd tʋʋmdã lebg zaalmã yĩnga.

⁶ La moasã, a Tɩmote yii yãmb nengẽ n lebg n wa tõnd nengẽ, la a waa ne yãmb tẽebã la y nonglmã koe-noodo, la koe-nood tɩ yãmb ket n tẽra tõnd yell sõama, la y raab tɩ leb n yãnd tõndo, wa tõnd me sẽn dat n yã yãmbã.

⁷ Woto, m ba-biisi, baa ne tõnd sẽn be sũ-sãang-kãseng la yel-pakr pʋgẽ wã, tõnd paama belsg ne yãmb kibarã, y tẽebã yĩnga.

⁸ Moasã, tõnd vɩɩme, yãmb sẽn paad Zu-soaba pʋgẽ kãenkãe wã yĩnga.

⁹ Tõnd ka tõe n pʋʋs Wẽnnaam bark n sa yãmb yĩnga, sũ-noog ning tõnd sẽn maand Wẽnnaam taoor yãmb yĩngã yĩng ye.

¹⁰ Yʋng ne wĩndga, tõnd bõosda Wẽnnaam ne d sũyã fãa tɩ d tõe n yãnd yãmb nengã, la d kɩt tɩ y paam bũmb ning sẽn paoog yãmb tẽebẽ wã.

¹¹ Bɩ Wẽnnaam meng sẽn yaa tõnd ba wã, la tõnd Zu-soab a Zeezi pak d sorã tɩ d ta yãmb nengẽ.

¹² Bɩ Wẽnnaam kɩt tɩ yãmb nonglem taab yĩnga, la nebã fãa yĩngã lebg kãseng n puugi, wa nonglem ning tõnd sẽn tar yãmb yĩngã.

¹³ Woto, bɩ Wẽnnaam paas yãmb raoodo, tɩ y ra paam rõdb y sũyã pʋsẽ ye, la y zĩnd sõmblem tõnd ba a Wẽnnaam taoore, daar ning tõnd Zu-soab a Zeezi sẽn na n wa ne nin-sõamyã wã.