TAITAS 2 - ITHAR CHONGHAK

Khristian Meechaap ing Manjiivachii

¹ Changvakonchu nang chuve ichum thachachu manchuwva nachiipae.

² Amachuve upa chaap ing juw ainmah, barungriir idim, vokhehkho barungriir asuwrcheh, thachana, ningsiihna, ikhaangchehna ichum meechu ynsuwh ae rasii.

³ Havivange rupanuw upa aenche ynthiing ing omvachiipae, ichummah yngensiimahnii chongmah vachiipae vokhehkho vomrip chiina suwh ing ongvachii mahpae. Enuw ing isachu aanchuw mee ynsuwh ae naka,

⁴ rakhiiniipeh rupanuw ae inche etaksahsah enfhuwsar vokhehkho ensiti aechu ening emansiihnii ing,

⁵ barungriir asuwrcheh, ynthiing rupanuw, eengkuw paarnii amanghuw, isa rumee, enfhuwsarsah ae derna ong engaansuwhnii ing manchuw vachiipae. Amana chembe Thangnang chongsae taklina ithipak ing chongmahnii ae.

⁶ Havivaange rakhii iniipeh pasar chaap ing embarungriir ensuwrchehnii ing riirla.

⁷ Chukhaenache aangkheng-laangna nataksah ing isa nong tunache ynjiifhuw ing mandangla, namanchuw ae nakhe nabarungriir manthiingrasii, manruwtherla,

⁸ amanche nachongchu embasangniimah ing isa ing chongla, amana chembe ynrumah aechu ningjak phaniivaatae, vokhehkho nataklina isamah chong riirmahnii ae.

⁹ Suwh vakhae ing engafhuw derna ongva chiipae vokhehkho aangkhengna empennii tuvachiipae; enuw ing chong reehmahva chiipae,

¹⁰ vokhehkho baruk mahva chiipae changvakonchu anasiirna isa ing vokhehkho thachafhuw omnae ichiichu enuw ing mandangva chiipae, amana chembe aangkhenglaangna eekarpeeh Thangnang chongchu entu enri chaap inche mansak vaata.

¹¹ Yngkhaena ynchii imbe Thangnang ing laaruw mee vakhaechu ikarpeehnii khaena atungsiihchu amandangpa.

¹² Thangnang irumah vokhehkho laaruw paam inungae yndikchu bathen manuwka, barungriir asuwrcheh, ichum ynthiing ing vokhehkho Thangnang ynden nache ataraennii laaruw paamne ipaarnii khaena tungsiih inge inuwchu ymmanchuwva.

¹³ Inuw ing rotharohniipak ningmanden inii vokhehkho ipirpak Thangnang re Eekarpeeh Aafhuw Jesu Khrista enlaar isa ing jungindangva enchiichu inuw ing ynghahsahva.

¹⁴ Chutahnache yntaklina isii icher omchaap tanii ikarnii khaena, vokhehkho inuwchu ynthiing amee ibasuwnaka amanche isa nong itunii khaenache, Aafhuw ing inuw yngkhaenache ataksahrap ympidehsa.

¹⁵ Hava chongsae i riirnana ithohsa aera amanche aatuaricheh aangkheng thoh ichah aera. Mee achuw ingkho nangchu ijuummah rasii.