TAITAS 1 - ITHAR CHONGHAK

¹ Thangnang ameenae vokhehkho Jesu Khrista achongthang Pol ki ing, ichen naemah iringniichu ningmanden mangomsa ingka, Thangnang ing aateer ae enthacha khaena vokhehkho Thangnang emanden ichumchu icheep ing emanghuwnii khaena,

² havana iringnii ringkum i ynchaenii omahdeh ing ajae tuna pharnungna basenka chongreep om vasahchu,

³ atii apha ichachak nache ama ing achongjeer nache amandangpa. Havi kaningna imansirka, amanche Thangnang chonghak inuwzii inche ki ing amachu katongva.

⁴ Chukhaenache thacha tahna aanghakjaeh ichumpak kasiti Taitas naningna: Apa Thangnang re inuw Eekar Jesu Khrista ningtanii tungsiih vokhehkho idaechu om ynsuwhrasiing.

Kret na Taitas ing nong atu

⁵ Nang ing ivaeh chaapchu ningkuur maensa manae taniika iseemnii khaena vokhehkho khuwruung siirna ruwrthiing puhvachii upa aechu ki ing naningna kariir vaangkhe pham ithinnii khaenache Kret na kamahvachii:

⁶ Achuw yngkheh mee isamahna athang isimah, rupanuw yngkhehpang fhuwsar vokhehkho asiti aechu thachafhuw ing om amanche enthang isamah omah changmahka chongriir ynjiimah ing omah ae, changchii meechu pham thinva nachiiva.

⁷ Akhaechuve aapuh mee inche Thangnang changdenna rukuumtu mee vaang isamahna athang isimah, ataksah khaenapang amandenmah, abarung isiisiimah, juw ainmah, meethoh ynnamah, seerna ikaammah,

⁸ changvakonchu ipitahna isa mee, isachu aadik, abarungriir asuwrcheh, ichum, ynthiing, chongriir derna isi acheh mee,

⁹ amanche ichumchu amanchuwna mee ae barungriir ynthohsahnii, chong areeh mee aechu enraar yndangnii khaenache, ichum thachachu icheep ing bachuw vachiiva.

¹⁰ Akhaechuve mee derna sinungka enchiimah mee inem omnae, abur ichah chongpang ichong ae, vokhehkho emare om meepae, enuw ae chuve athurfhuw ing vinchiip ruwr aepae;

¹¹ enuw aekha chongmah vachiipae, hangchii ae inge seer baarna engkaam tahnache mee ae ningna itongfhuwmah thamin tong aeka, eengkuwna inempak ningsiih hunganpimah hungomsa; chukhaenache enuw ing mee ynchuwnii ruwreng omah.

¹² Enuw entaksah kaartanii laksii yngkheh ing jinge ichii ing ariirsa, “Kret mee ae chuve apha vakhaena emare tamna, isamah lampa shapae vokhehkho empeehbuwr iruung thaachah mee aepae.”

¹³ Havi ichumva. Chukhaenache enuw aekha ipirpak ing ichah aera, amachuvaang naka enuw ichum thacha nache ompeh vaatae,

¹⁴ akhaechuve enuw ing ichumchu reeh aeka, Jehudi ae tunanii thamin ting vokhehkho mee ae nerna embarungriir empeehpa.

¹⁵ Ynthiing ae ningnache peeh aangkhenglaang manthiing chirna; changvakonchu imaang ae vokhehkho enthacha omah ae ningnache ynthiing omah; akhaechuve enuw envakhar vokhehkho enrathuwhchu manthiing mahsa.

¹⁶ Enuw ing Thangnang kemanghuwsa ta aeka enriirnah, changvakonchu enongtu nachembe Aafhuw chu rumahsae; enuw chuve yntirsuwh, chongriir ynjiimah ae, vokhehkho isa nongtunii khaena ikanii omahdeh meepae.