ROMIO 9 - ITHAR CHONGHAK

Thangnang re Amee ae

¹ Ki ing Khrista rumingna ichum kariirnah, kabarungriirna ynthiing laetha ing saarkhiina manchaemah ningchuw.

² Kapeeh irikthoh barungriir ija ing ongning.

³ Hakchaang thoh sii yntinfhuw kamee ae khaena ki ing Thangnang siraap tanii re Khrista ningtanii asik ing yngkhae ningka kachiisahnah.

⁴ Enuw Thangnang meepae, asiti aepae, amanche eningna alaar isachu amandang vasahva, ama ing enuw thoh chongiir rika vokhehkho vajeer chonghakchu ening-nache apeehpa; Thangnang nongtu vokhehkho chongreep vakhae empha vasahva;

⁵ Empa aechu ening taniiva, vokhehkho hakchaang nachembe Khrista chuve ening taniiva; Aafhuw chuve aangkheng taklina ichen naemah ing mampah vaanchii Thangnang va.

⁶ Thangnang chongsaechu yntanga mahva ichii ing kariirmahva, Isrel mee ae chupang Thangnang mee mahpae,

⁷ Abraham tuti aangkhengkho Thangnang siti mahpae. Thangnang ing Abraham ningna ariir, “Ki ing naningna chongreep katunah, Isak ajaarna nang natuti ompeh vaata.”

⁸ Hakchaang siti chuve Thangnang siti mahnii, changvakonchu chongreep derna om naepang chuve ichum tuti chuva.

⁹ Haviva chongsae chong-reepchu, “Apha ahenphachak nache ki juwng ningka Sara ing sapa deenvaata.”

¹⁰ Havipang mahva, Rebika kho ampa yngkhehpang Isak ningtanii sapa deenvaata.

¹¹ Naepang ae engommahrirae vokhehkho isa isamah entumahrirae aateer vasah inuwzii ing, Thangnang ing amandenchu angiirnii khaenava, nong ingmahva; a-eenpeeh

¹² Rebika ningna ariir, “Upa inche naepangchu rukuum tuvaata.”

¹³ “Jakop chuve kaning amansiihpa, changvakonchu Iso chuve kabatirpa taka ynziihka omna.”

¹⁴ Chunuwcha Thangnang chu chummah tavaanchiiva? Changmahva.

¹⁵ Mosi ningna amanthang chuve, “Ki ing kamandenchu kaning mansiihva kata, ki ing kamanden ningnache kaning manchuwhva kata.”

¹⁶ Chang-tahnache, laaruw mee amanden namahva, Thangnang ing amanden chirnava.

¹⁷ Ynthiing chongsae ing Pharo ningna ki ing kamandenchu haviva taka amanthang, “Nang ing iruwng puhnana karuwrengchu laaruw paam aangkhengna mandangla achii.”

¹⁸ Chutahnache amanden aechu aning mansiihka, amandenmah aechu embarungriir amanpirnah.

Thangnang Barungsii vokhehkho Aningchuwh

¹⁹ Amachu vanave nenuw ing kaningna tavanenta, “Thangnang ing yngkhaena miraar ahenbasuwva? Achuw inche Thangnang ing amanden-chu manghuwcheh vachiiva?”

²⁰ Laaruw mee nangcha achuw vachii, Thangnang taklina nabasangcheh nang achuw vachii? Pir bukam ing aaseem ningna yngkhaena kichu jinge ichii ing ynseem vachii tachehmah.

²¹ Aaseem kikna omchirna, pir yngkheh tanii bukam asae ynniimeh iseem arusa, yngkheh ing isaseh ikanii om ing vokhehkho yngkheh inche icham chamnii ing aseemchehsa.

²² Thangnang chu jinge tana, athir fhuwrnii re aruwrengchu mandang ningka takhangle, thirfhuwrnii beerchu maangvachii khaenache apha iseehpak ing akhaangva.

²³ alaar isa chukho aning amansiih ae ningna mandang ningka achiinah, alaar isa phavachii ama ing thoraang atuvasah mee ae ningnakho mandang ningka achiinah.

²⁴ Jehudi ae pangmahka, Reentaang mee aekho ama ing yngeennah.

²⁵ Thangnang ing Hosia ningna jinge ichii ing ajeer, “Ki kameemah aechu kameepae taningka eenva katae, Kaning kamansiihmah aechu kaning mansiihpak kajaati ae tava katae.”

²⁶ “Nenuwchu kamee mahvachuw taningka kariir ae nache, enuwchu Iring Thangnang siti tavakatae.”

²⁷ Isaia ing Isrel khaena ichap, “Isrel mee vakhaechu chifhuw kuurna om siihdii thoh aanghak khang nakho, ikarpeeh aphachuve tuumvaata.”

²⁸ Aafhuw ing anong manchivaata vokhehkho mantom vaata, akhaechuve laaruw paam khaena Thangnang ing nong manchivaata.

²⁹ Mamaenna Isaia ing ajeer vasah vaang, “Aachehchir Aafhuw ing yntuti imapeehmah nave inuw i Sodom vaangkhe tavaanchiiva vokhehkho Gomora thoh aanghak vaanchiiva.”

Pol ing Isrel ae khaena Athamsah

³⁰ Chunuwcha inuw ynchii riirtaruw? Ichum ynthiingchu enjongmah reen-taang mee aeng ichum ynthiingchu enthacha ajaarnache emphapa.

³¹ Changvakonchu ichum ynthiing vajeer chonghak enjong Isrel aeng vajeer chonghakchu mapung mampha mahsae.

³² Yngkhaenava? Enuw ing thacha ajaarnache ichum ynthiingchu jongmah ae, changvakonchu nongtu ajaar inche enjong. Chutahnache khi mansiinii nache engkhi emansiipa.

³³ Ynziih ynthiing chongsae ing ariir: “Enruw, Zaion nache rung kaphinsa, mee aenche engkhi mansiinii vaatae, amanche achuw yngkheh ing aningnache thacha nave ningjak phamahnii.”