ROMIO 5 - ITHAR CHONGHAK

Thangnang thoh Ichum Ympha

¹ Atii thacha jaarnache inuwchu ymmanchum vakhaka, Jesu Khrista jaarnache Thangnang thoh idae ing ongsamuw.

² Thangnang tungsiih tingche inuwchu thacha inche ynghenruw vakhaka, Thangnang alaar isachu phavataruw ichii khaena ningmanden omchu eenpahniisa.

³ Inuw ing ijachaam ympha nachenkho rotha manrohtaruw. Ijachaam inche ikhaangchehnii ahenreensa,

⁴ ikhaang-cheh inche isa suwhnii ahenreensa, amanche isa suwhnii inche ning-manden ahenbasuwsa.

⁵ Havana ningmanden inge ningmandenchu bakhii mahnii. Ynthiing laetha kikthuur jaarnache Thangnang ing aningsiihchu ymbarungriir nache ajechirpa.

⁶ Inuw ing eentuursah raenche, Khrista ing Thangnang amandenmah ae khaena apha ichachak nache jungthiksa.

⁷ Ichum ynthiing mee yngkheh khaena achuw yngkheh ing ithii omthaang thaangmah. Changvakonchu isa mee khaena achuw yngkheh ing ithiknii khaena thona isakho om arusa.

⁸ Inuw ing isii icher mee eensuwh raensiimche, Khrista ing inuw yngkhaena ithii inche Thangnang ing aning ymmansiihchu amandangpa.

⁹ Chukhaenache Khrista ing ngareh ing ynthikpeeh inge inuwchu ymman-chum vakhaka, Thangnang barungsii tanii ama ing ikarvaata.

¹⁰ Inuw ing Thangnang ijeehniichu eensuwh raenche, asapa ithii ajaarnache Thangnang thoh aanrunii atupa, havi athiseh ing aanrunii om khaena asapa ringkum ing inuwchu ikarvaata.

¹¹ Amachupang mahka Jesu Khrista jaarna Thangnang ningnache rotharoh omna, akhaechuve asapa ajaarnache atii aanruniichu ymphapa.

Adam re Khrista

¹² Mee yngkheh ningna isii iruwh inche laaruw paam aangkheng isii chersa. Ama ing arang isii inche ithiichu aphapa vokhehkho mee vakhaena ithiichu ynjarka isii cherchirsa.

¹³ Vajeer chonghakchu ympimahri raenche laaruw paamna isiichu om, changvakonchu vajeer chonghak aommahri raenche isiichu teenpeehmah.

¹⁴ Changvakonchu Adam na ing Mosi ipha ing ithii inche iruwng vaang mee vakhae taklinache ihungpaar. Adam ing chonghak abakhiithoh aanghak ing isii atumah ae taklina khomba; Adam ichuve Khrista jungtheng vachii buwtiniiva.

¹⁵ Ynniimeh havi yntinmahnii, Thangnang tanii ngareh kikthuur re Adam isiichu yntinmah. Ama mee yngkheh inche isii arangtah nache mee vakhae ithiichu phanave, Thangnang tungsiih vokhehkho mee yngkheh ajaarna, ichiichuve, Jesu Khrista tungsiih ajaarna ympeeh kikthuurchu mee aanemna athar vokheh athiseh ing ynriimjor ing sipsa.

¹⁶ Thangnang tanii kikthuur re mee yngkheh taklina isiichu yntinmahnii, isii yngkhehpang araar chukho vajeer inche amanraarva, changvakonchu isii icher aajaehtanii ngareh kikthuur inche chumsa ichii ing ynteenpa.

¹⁷ Changvakonchu mee yngkheh ajaarna ithii inche iruwng vaang ing paarnave, tungsiih re ichum ynthiing kikthuur ing isip apha mee aenche Jesu Khrista jaarna iringnii tingche athar athiseh ing iruwng vaang paarvaatae.

¹⁸ Isii icher mee yngkhehpang khaenache mee vakhae isii icher ting ibuw vaangkhe, ichum ynthiing mee yngkheh ajaarnache mee vakhaena aanghaksiir ing iringniichu ympeehpa.

¹⁹ Chong areeh mee yngkheh khaenache mee vakhae isii icher ynsuwhvaang, chongriir amanjii yngkheh ajaarnache mee vakhaechu ichum ynthiing mee basuw vaata.

²⁰ Ichummah nong ahenthi sehsehnii khaena vajeer chonghakchu omsa, changvakonchu isii ahenthi sehseh ithi ing Thangnang tungsiih chukho ahenthi sehsehva.

²¹ Isii inche ithii nache iruwng vaang ipaarvaang, tungsiih chukho ichum ynthiing ajaar inche iruwng vaang ichen naemah ringkum ing Aafhuw Jesu Khrista ajaarna apaarnii khaenava.