ROMIO 4 - ITHAR CHONGHAK

Abraham taklina Ynghuwnii

¹ Hakchaang inuwzii ing apa ynsuwh Abraham khaena ynchii riirtaruw?

² Nong ing Abraham chu manchum nave ama aruungsahnii omna, changvakonchu Thangnang maana mahva.

³ Havi khaene ynthiing thiimziih ing ynchii ariirsa? Abraham ing Thangnang chu athachapa, chutahnache ichum ynthiingva taka ateenpeehpa.

⁴ Nong atu mee ningna-che aruthamenchu kikthuurva ichii ing ympimah, changvakonchu ama ing iphapham asuwhtah nava.

⁵ Nongcha atumah achuw yngkheh inche ynraarchu amanchum aningnache thacha nave, ama athacha inche chumsa ichii ing ateenpa.

⁶ Nong ynvaeru ing Thangnang ing chumsa taka ateenpeeh meechu bor aphava, havi Devit atakrap ingkho ariirsa:

⁷ “Enraarchu akuhpeeh ae amanche isiicher abaruwpeeh aechu bor aphapae;

⁸ Aafhuw ing isiicher teenpeehmah vachii meechu bor aphava.”

⁹ Hava bor ichu vinchiip mee ae khaena pangva? Changmahka vinchiipmah mee ae khaena khomva? Inuw ing ynchiinah, Abraham chu athacha inche ichum ynthiingva taka ateenpeehpa.

¹⁰ Ynsaang khenche aningna ateenpeehva? Ama ing vinchiip atumahri raenva chang-mahka atu aanuwtingva? Vinchiip atu aanuwting mahva, vinchiip atumahri raenva.

¹¹ Ama ing vinchiip atumah rirae aningna om athacha inche ichum ynthiingva ichii ahak namka vinchiipsa ichii buwtinniichu aphapa. Havi enuw ing vinchiip tumahkhang ae nare, thacha mee vakhae aechu ichum ynthiingpae ichii ing iteenpeehnii ampa ynsuwhnii khaenava.

¹² Amanche vinchiip atu aepang mahka, inuw apa Abraham ing vinchiipmah ing aomlae, ama athacha nache aanuw enjii vakhae ae ningnakho vinchiip ampa ynsuwhnii khaenava.

Thangnang Chongreep Thacha jaarna Ymphava

¹³ Abraham vokhehkho atuti ae ningna laaruw paam thungva nenta taka chongreep atuchu vajeer chonghak ajaarna mahva, ichum ynthiing thacha ajaarnava.

¹⁴ Thangnang chongreep-chu vajeer chonghak amanjii vakhae aenche ruwkuum vaatae tanave, thachachu ikaniimah ynsuwhsa vokhehkho Thangnang chongreepchu yntangamahsa.

¹⁵ Thangnang barung-siichu vajeer chonghak ing ahenreenva, vajeer chonghak omah nave vajeer chonghak amanjii omahnii.

¹⁶ Chukhaenache Thangnang borchu ynning nache thacha ajaar ing ngareh kikthuur vaang ympipa; vajeer chonghak amanjii ae khaenapang mahva, inuw vakhae apa Abraham thacha vaang ichii ae ningna khomba.

¹⁷ Ama khaenache ynthiing thiimziih ing ariirsa, “Ki ing nangchu jaati vakhae ampa kabasuw pachii.” Chu-khaenache omahchu achonghak ing mangomka vokhehkho ithii amanring Thangnang Abraham ing athacha mik en nache chongreepchu inempak saksa.

¹⁸ Abraham ing thachaka ningmanden fhuwmahna ningmanden mangomka ama ing jaati aanem ampa ynsuwhsa. Havi ynziih ing ariirsa, “Nang natuti aechu aesii tangbang aevaang nemvaatae.”

¹⁹ Ama ing athacha takrudeh ing, kum chaama vakhae ahenpha ithii vasahvaang ichii ahakchaang om vokhehkho Sara ing venchivachii omahchu akhar.

²⁰ Changvakonchu Thangnang chongreep om khaenache ithachamah turu ing Thangnang chu manpahka,

²¹ Thangnang ing chongreep atupeeh vasahchu yntupeehkho achehsa ichii ing abarungriirna mangiirka, athacha hungpir sehsehsa.

²² Ama khaenache athachachu ichum ynthiingva ichii ing ateenpeehpa.

²³ Abraham chu ichum ynthiingva taka arupeeh chongsaena ynziihchu ama akhaena-pang mahva.

²⁴ Jesu Khrista ithii tanii amanring ningnache athacha chukho ichum ynthiingva tanaka irupeeh vachii inuw yngkhaenakho ynziihva.

²⁵ Inuw ing ichumchu ymphanii inche, yntaklina om isiicher khaenache Jesu ing ithii phaka vokhehkho yngkhaena hangringsa.