ROMIO 3 - ITHAR CHONGHAK

¹ Chunuwcha Jehudi aecha ynchii engkanii omne? Vinchiip entu-tahna ynchii entuungsah omne?

² Havi akhaechuve nempakna, amaensa nache Thangnang isa chongchu Jehudi ae ningna amansirpa.

³ Reentaang aeng thachamah ae nacha ynchii tavaate? Enuw ing Thangnang thachava enchiichu enthacha aommah tahnache, Thangnang chu yntangamah basuwva chiipae khang? Changchen mahdeh rasii.

⁴ Mee vakhae ing ichummah chongkhang ae nakho Thangnang chuve ichumva. Ynziihka omna: “Ichumchu nachong ing mandangva nachiiva, amanche nang navajeer nache maepah phava nachiiva.”

⁵ Changvakonchu ichum ing nong atu Thangnang chu inuw ing ichummah ing mandang manuwka, ama ing Ponti ympiraenche ichummahva tavaanchiiva?

⁶ Amachumah rasii, changchen vaniive Thangnang ing laaruw paam mee aechu ynsaangkhe vajeer tuvaate?

⁷ Ichummah ki ing Thangnang ichumchu mandang ningka aruwreng alaar isachu manruung ningve, kichu ynchii khaena ataraenpha ing isii icherva ichii ing vajeer yntupae?

⁸ Mee maangnii vachii ichamah chong enriirpa ta aeka kichu ynrensahpae. Chutahnache isa suwhnii khaena isamah tuvaanchiiva tamah manuw-khang? Changchii ichong mee aechu miraar ipeeh chumna.

Achuwkho Ichum ynthiing Omah

⁹ Chunuwcha enuw chungna inuw ing isaseh vamuw? Changmahva, Jehudi aekho, Grik aekho aangkheng isii derna ongpae ichiichu mamaenna kamanthang vasahva.

¹⁰ Ynthiing thiimziih ing ariirsa: “Ichum ynthiing achuwkho omah,

¹¹ yngkhehpangkho omah, Thangnang aajong achuwkho omah.

¹² Engkheng Thangnang tanii aasiirting yngheersae; Engkheng ynraarting sichirsae; isa atu achuwkho omah, yngkhehpangkho omah.

¹³ Enuw engaruurchu ymmong vasah thaen vaang tasa, embari ing mee amanchaepae; baruwr hae chuwrchu enerna omna.

¹⁴ Enbaechu siraap re ikha ing bariimna.

¹⁵ Engkhi ing sii yntanii khaena jaangpakna.

¹⁶ Imaangnii re ijachaam emaana omna.

¹⁷ Idae lamchu enuw ing manghuwmahsae,

¹⁸ vokhehkho emik barengna Thangnang chu chiimahsae.”

¹⁹ Inuw ing ymmanghuwsa amachuve, vajeer chonghak inuwzii ing ong vakhaena vajeer chonghak ing ariir chuve, laaruw paam mee vakhae ing Thangnang vajeer derna omvaatae. Chukhaenache ner vakhae ing chong-mah ae rasii.

²⁰ Vajeer chonghak nong ing Thangnang mik enna achuw yngkhehpangkho manchumpeeh mahnii; akhaechuve vajeer chonghak ajaar ing isii ikha amanghuwniinah.

Thacha jaarna Ichum

²¹ Atiive vajeer chonghak chah ing, Thangnang tanii ichum ynthiingchu amandangpa. Amachuve Mosi vajeer chonghak re jaephar ae ing saarkhii entupa.

²² Thangnang aanden vakhaena Thangnang tanii ichum ynthiingchu Jesu Khrista thacha ajaarna chenva, reentaang asik ichii yntanga omah.

²³ Mee vakhae isii cherchirsa vokhehkho Thangnang alaar isachu jungsuursa.

²⁴ Changvakonchu Jesu Khrista ing isii icher tanii yngkarsah ajaarnache atungsiih ing inuwchu ngareh ing ymmanchumpa.

²⁵ Thangnang ing apensahnii khaenache Aafhuw chu ipisaka ithii apha aningne ithacha ajaar nache laaruw mee isii vakhaechu ikuhpeehnii khaenava. Thangnang ing atu havi atakchu ichum ynthiingva ichiichu amandangniiva. Isivasah nachembe laaruw mee isii chaap taklinache khaangtherka teenpeehmah,

²⁶ changvakonchu atarae apha ichiinen chembe ichum ynthiingchu mandangnii inche, Jesu athacha mee vakhae taklina adongchang omrudeh inche vokhehkho aanchumpeeh aechu ynsuwhniiva.

²⁷ Amachu vanave inuw ynruungnii unakhe omkhang? Omahdeh! Havi khaena akhaechu ynchiiva? Inuw ing vajeer chonghakchu ymmanjiitah nava? Changmahva, Aafhuw chu ynthacha tahna chenva.

²⁸ Chukhaenache kenuw ing kemanchinah amachuve thacha ajaarna meechu amanchumpehva, vajeer chonghak ingmahva.

²⁹ Thang-nang chu Jehudi ae pang Thangnang vakhang? Reentaang mee ae khae-nacha Thangnang mahvakhang?

³⁰ Thangnang yngkhehpang vatah, chukhaenache vinchiip atukho amanche atumahkho athacha inuwzii ing Thangnang ing manchumpeeh vaata.

³¹ Thacha inche vajeer chong-hakchu arimah changchii mahva, changvakonchu amanpirniiva.