ROMIO 2 - ITHAR CHONGHAK

Thangnang Vajeer

¹ Nang mee vajeer natuva? Nang ikuhpeehchu phamahtanii. Nang ing mee vajeer natu ingkhe nataksah miraar ympisah vachii. Akhaechuve araar mee taklina vajeer natu nang ing ynraarchu nanunu ing natujaehpa.

² Chukhaenache changchii ynraar nong atuae taklinache Thangnang ing ichum vajeerchu tuvaata ichiichu ymmanghuwsa.

³ Changchii nong itu nang ing reentaang aeng entu taklina vajeer itu laaruw mee nang, Thangnang vajeer nache nang ringva kata ichii ing namandenva?

⁴ Changpangmahka, Thangnang tanii isa ichum inche nangchu barungriir huungniiting ynruwva ichii nang ing manghuwmah chiika, Thangnang tanii isapak atu ari ing ynghahjaeh vokhehkho yngkhaangpeeh jaehchu nang ing namanghuw mahva?

⁵ Nabarungriir ipir ing huungning nachiimah khaena Thangnang barung isii vokhehkho ichum vajeerchu aandang inii nache barung sikniichu nataksah ing narangsahva.

⁶ Mee vakhae ningna ama ing atu inuwzii inche, Thangnang ing baripeeh vaata.

⁷ Chukhaenache isachu atujaeh, aruwrengchu iphanii khaena ajong, aajasah, amanche imaang naemah ajong ae inche ichen naemah iringchu phavaatae.

⁸ Changvakonchu ataksah khaenapang ataar, ichumchu manjiimahka ichummahchu ajii mee ae ningnache Thangnang barungchu sikvaata.

⁹ Isamah atu mee vakhae laetha nache ijachaam ipirpak inangniichu amaensana Jehudi ae amanche Reentaang mee ae inche phavaatae.

¹⁰ Changvakonchu amaensana Jehudi ae amanche aanuwnache Reentaang mee ae vakhang nakho, isa nong atu mee chaap ningnache ympahsah, ynjasuwh vokhehkho idaechu Thangnang ing pivaata.

¹¹ Thangnang chuve adongchang tumah.

¹² Vajeer chonghak ynvaeru ing isii atu mee vakhaechu vajeer chonghak ynvaeru ing maangvaata. Vajeer chonghak derna isii atu mee vakhaechu vajeer chonghak ing vajeer tuvaata.

¹³ Achuw yngkheh ing vajeerchu asiijaeh ingkhe, Thangnang ningna ichum mahva, changvakonchu vajeer chonghak amanjii meechu amanchumva.

¹⁴ Reentaang mee ae ningna vajeer chonghak omahkhang nakho, enuw ing entu nong vakhaechu vajeer chonghak ing aruchuva. Enuw ing vajeer chonghakchu omahkhang nakho, entaksah vajeer chonghakchu adeensahpae.

¹⁵ Enuw ing embarung-riirna enthin vasah vajeer chonghakchu anong ing emandangnah. Enuw enrathuwh ichum ynraar ynghuwnii inche saarkhii atunah.

¹⁶ Ki ing katong isa chong inuwzii ing vajeer inii nache Thangnang ing Jesu Khrista jaarna ynruwh ing atu nongchaap vakhae vajeer tuvaata.

Jehudi aere Vajeer Chonghak

¹⁷ Atarae nang nataksah ing Jehudi ping tataniika, vajeer chonghak nache yndiisa taniika, Thangnang chu ruungchichuhnii taniive,

¹⁸ vokheh-kho Aafhuw ing amandenchu manghuw taniika, vajeer chonghak na namanghuw ingkhe aasaseh nongva ichii ing manden taniive,

¹⁹ amanche nang ing namanghuw re ichumchu vajeer chonghak sungna tuwhtaniika, natak ing mikchu ae aaching, ynthimna ong ae aanreng chuping,

²⁰ vokhehkho ipang aechu aanchumping amanche naepang aechu aanchuw ping ichii ing manden taniive,

²¹ chunuwcha mee reentaang aanchuw mee nang, nataksahcha ynchuw nachii? Baruk mahra nachii nangcha, baruk nachii?

²² Reentaang rumee fhuwsar taklina ichuwhmah tumah achii nangcha, ichuwhmahchu natuse? Lae ruthaksii nabatir nang, lae een tanii nabaruwhse?

²³ Vajeer chonghak na iruungniichii nang vajeer chonghakchu namamak inche, Thangnang chu ynjasauwhmah ing natuva?

²⁴ Ynziih vasah vaangkhe, nenuw nengkhaena reentaang mee ae kaarna Thangnang rumingchu ithipak ing nemanriirnah.

²⁵ Nang vajeer chonghak ynjii mee vataniive, vinchiip natu ing natuungsehva. Nang vajeer chonghak najiimah mee vataniive, vinchiip natumahthoh yngkhehpang vachii.

²⁶ Chukhaenache vinchiip atumah mee ing vajeer chonghakchu manjiinave, ama ing vinchiip atumahkha vinchiip atuvasahva ichii ing mandenmah manuwkhang?

²⁷ Anunu ing vinchiip atumah mee ing vajeer chonghak vakhaechu manjiinave, ynthiing thiimziihna ynziih vaangkhe vajeer chonghak vokhehkho vinchiip atuvasah vakhang taniikho, vajeer chonghak aangkhii nangchu vajeer chonghak ajii mee inche vajeer itumah nakhang?

²⁸ Akhaechuve achung paamphuwna Jehudi ynsuwh meechu Jehudi mahva. Achung paamphuwna hakchaang vinchiip atu chuve vinchiip chumahva.

²⁹ Changvakonchu barungriirna Jehudi ynsuwh inche Jehudi meeva, amanche ynziih ingmahva laetha ing abarungriirna vinchiip atuchu vinchiip chuva. Atak ympahasah aphachu mee ae tanii mahva, Thangnang taniiva.