ROMIO 14 - ITHAR CHONGHAK

Unae taklina Vajeer Tumah

¹ Thacha isuur meechu kuurpeeh-ra, ama ing amandenchu vajeehnii mahra.

² Achuw yngkheh athacha inche isah aruchirva taka amandennah, achuw yngkheh thacha tahna isuur chuve thingna rungna pangchu asahnah.

³ Asah mee ing asahmah meechu yntuurlep ing tumahrasii. Amanche asahmah mee ing asah meechu vajeer tumahrasii; Thangnang ing aningna aruva.

⁴ Mee meenae taklina vajeer natu nang achuw vachii? Amakho ama aafhuw ningna basangsa vaata. Aafhuw ing bachuw naka amakho ngiircheh vaata.

⁵ Mee yngkheh ing inii nikhehchu reentaang inii chungna amen iruwpak ing amanden omna, amanche achuw yngkheh ing iniichu aanghakjaehva ichii ing amandennah. Mee aangkheng ing ataksahna yndensa rasii.

⁶ Inii tha aanden mee ing Aafhuw amandennah. Inii tha aandenmah mee ing Aafhuw mandencheh mahnii. Achuw yngkheh asah mee inche Aafhuw ing ympeehva taka amanpahnah, amanche asahmah mee ingkho kasahmah khaena taka Aafhuw amanpahnah.

⁷ Achuw mee ingkho anumpang khaena ringcheh-mah vokhehkho anumpang khaena thikchehmah.

⁸ Ringkhang manuwkho Aafhuw ningna ringvaanchiiva, thikkhang manuwkho Aafhuw ningna thikvaanchiiva, amanche ithii iring tahrasii, inuw chuve Aafhuw tavamuw.

⁹ Iring mee vokhehkho ithii aechu Aafhuw ynsuwhnii khaenache Khrista ing thikka hangringsa.

¹⁰ Nang ing yngkhaena nauw nanae taklina vajeer natuva? Yngkhaena nauw nanaechu na-ensiimahva? Khrista ing vajeer aturaenche inuw vakhae atuwr maanache ngiirvataruw.

¹¹ Jinge taka ynziihna, “Aafhuw kichu mee aangkheng ing irum vaata, mee aangkheng ing kenraarpa ichii riirvaatae.”

¹² Chukhaenava mee aangkheng ing ama ing atu ari chaap Thangnang ningna riirvaata.

Nauw nanae taklina Isii ting Buknii tumah

¹³ Chukhaenache mee yngkheh ing mee taklina vajeer itu manchenruw. Amathoh ynruw ing mee yngkheh ing auw anae taklina isii ting abukniimah ing turuw.

¹⁴ Jesu Khrista thoh ynchaar inge kaningna yntanga ynthiingmah thaemin omah ichii ing kamandennah. Achuw yngkheh ing thaeminchu manthiingmah tanave, aningnache manthiing mahnii.

¹⁵ Nang ing thaemin nasah yngkhe nauw nanaechu mansuh taniive, naning namansiih mahva. Khrista ing akhaena ithii meechu nang nathaemin ingkhe mamaang mahra.

¹⁶ Nang ing isava nachiikha, isamahva ichii ing ruming thangmah rasii.

¹⁷ Thangnang lipahchu isahnii innii khaena mahva, changvakonchu ichum ynthiing, idae vokhehkho ynthiing laethana rotharoh chuva.

¹⁸ Hava vakhae inge Khrista ningna nong atuchu Thangnang ing aru vokhehkho laaruw mee ingkho aruchuva.

¹⁹ Chukhaenache idae vokhehkho yngkheh yngkheh ympirniichu inuw ing jongsataruw.

²⁰ Isahfhuw khaena Thangnang nongchu mamaangmah manuw. Aangkhenglaang ynthiing chirva, changvakonchu abarungriir asuh ing asah mee ningnache isamahva.

²¹ Isaseh chuve sha isahmah, juw inmah changmahka ynchii yngkheh ing nauw nanaechu isii ting bukniivachii vaniive itumah ing sakna.

²² Nang nathacha omba? Thangnang maanache mangom jaehra.

²³ Changvakonchu fhuwm ynvae ing asah mee ningnache amachu imaangva, akhaechuve athacha om ing samahsa, thacha taniimah chaapchu isiiva.