ROMIO 11 - ITHAR CHONGHAK

Isrel ae taklina Thangnang Ningchuwh

¹ Amachu vanave ki ing kariirnah, Thangnang ing amee aechu arumahpae chang? Ama-chumahva! Katakkho Isrel mee, Abraham tuti Benjamin sungkhur ping.

² Thangnang ing amaensana aateer vasah ameechu utaraenkho renmahdeh. Vokhehkho Elija khaena ynthiing thiimziih ing ynchii ariirse ichii nemanghuw mahva? Ama ing Isrel ae taklina Thangnang ningting athamsah:

³ “Aafhuw, nang nathamin aatong jaephar aechu enuw ing enthehpa, enuw ing thiimkung chaap chukho embakhiipa; ki kanumpang omtahning, amanche kalaetha enuw ing enjongnah.”

⁴ Changvakonchu Thangnang ing aningna basangka ynchii ariir? “Ichummah lae Baal arummah mee lising sarii kakhaena kasiihsae.”

⁵ Amavaangche ichii ing apha ichii nenkho tungsiih ing aateer inuwzii ing abarii mee topoh omnae.

⁶ Changvakonchu havi tungsiih ajaar vanave, athar nong tanii mahnii, changvaniive tungsiihchu athar tungsiih mahsa.

⁷ Amachu vanave ynchiiva chang? Isrel aeng enjongchu phamahsae; changvakonchu aateer vasah mee aenchembe amachu emphapa, amana om areh aechu embarungriir pirsa.

⁸ Ynziih vasahna jinge ariirsa, “Thangnang ing eningna embarungriir ing emandenchu emuniimah ing, emik emuniimah ing vokhehkho engana ing ensiiniimah inche ataniiphane apeehpae.”

⁹ Devit ing ariir, “Enuw ing ensah thaemin inche chaang ynsuwhsana unii ae rasii vokhehkho engkhi emansii inche engkhaena isii ikha ynsuwhnii rasii,

¹⁰ enuw ing emuniimah khaena emik manthimrasii, apha vakhaena Aafhuw ing ikiim ijachaam dernache mangom ae rasii.”

¹¹ Chukhaenache ki ing kariirnah, enuw entiihnii ing engkhi emansiipae? Amachumahdehva! changvakonchu enuw engkallaknii khaena itiih aenche, reentaang mee ae khaena manlaenpeeh phanii ynsuwhsa.

¹² enuw itiih aenche laaruw paam savang vanave vokhehkho enuw imaangsah aenche reentang mee ae savang suwhnii vanave, enuw ynriimjor aenche aajaehmeh thivaatae!

Reentaang mee aeng Manlaenpeeh Empha

¹³ Reentaang mee ae neningna kariirnah, ki reentaang mee ae khaena chongthang ynsuwhping khaeka, ki ing katu nongnache yndingniining.

¹⁴ kacheh vakhae ki ing ruwreng yngkheh ing hakchaangna mari yngki kamee ynsuwh ae enuwchu kallak mangom ae ningka enuw topohchu ikarpeehnii khaenava.

¹⁵ Enuwchu arupeehmah ae inche laaruw paam thohne aanrunii ynsuwhnave, arupeeh ae raenche ynchii ynsuwhvaate? Ithii tanii hangring chuvatah.

¹⁶ Aren aanla manthiing nave, jaam atum chukho ynthiingva; vokhehkho arajung manthiing nave, abah chukho ynthiingva,

¹⁷ amanche oleep thing abah arehchu yngkhiih nave, lampana imuwng oleep thing abah nache vaanjomna. Reentaang mee ae nenuw chuve lampana imuwng oleep thing thohche aanghak vachuw, changvakonchu atiive nenuw Jehudi ae ipirpak laetha ringkumchu enuw thohche sarup nenphahakpa,

¹⁸ yngkhiih thing abah aechu jeehnii nuwna yndingnii mahruw; nenuw chuve abah vatahchuw, arajungchu nemanehmahva, arajung inche nenuwchu ymmanehva.

¹⁹ Amachuvanve nang ing tavaanta, “Chumna, thing abah yngkhiichu kaongnii seemnii khaenava.”

²⁰ Amachu ichumva, enthachamah inche enuw yngkhiihsae, changvakonchu nang chuve nathacha ing ngiirnachii, nabarungriir nakhe yndingvanachii changdenna ynchikra.

²¹ Thangnang ing Jehudi aechu karpeehmah nave, Aafhuw inche nangkho ikarmahnii.

²² Chukhaenache Thangnang ningtanii isa vokhehkho isamahchu ibuwrla; itiih ae yntongting isamah changvakonchu isa nache nang anasiir ongtaniive, naning yntongting Aafhuw inche isa eensuwhpeeh vaata. Changmah nave natakkho itenvaata,

²³ vokhehkho enuw ingkho enthachamah nache apha vakhaena ongmahpae vaniive, engongniichu seempeeh vaata; akhaechuve Thangnang ing enuwchu athar vokheh engongnii iseempeeh achehsa.

²⁴ Reentaang mee ae nenuw chuve lampa kaarna imuwng oleep thing abah yngkhiihka yntinmah siisii ing omchuwka, om vasah oleep thing nache ivaanjom thoh aanghak vachuw, Jehudi ae chuve om vasah oleep thing thohne aanghakpae; amanche yngkhiih abahchu entaksah thingbur nache iraecharii ing Thangnang ing avemanjomchehsa.

Mee Aangkheng taklina Thangnang Ningchuwh

²⁵ Kauw kanae ae, nenuw nentaksah iruungsahchuw ingkhe isingpung ichii ing nemanden niimah ing ithuwhpak chong havi nenuw ing manghuw tanuwka kachiinah. Reentaang mee vakhae ing Thangnang ningting enghungruwhchir mahtaang, rakhehting Isrel sungna barungriir ipirchu suwhna.

²⁶ Havi vaange ichii ing Isrel mee vakhaechu karpeeh vaata. Ynziihka omna, “Ikarpeeh Aafhuw inche zaion tanii thengvaata, Aafhuw inche Jakop tuti bahsuwm tanii Thangnang aandenmah vakhaechu rupeeh vaata;

²⁷ Vokhehkho enuw isii enrang vakhaechu kakuhpeeh ae aphanache, enuw thoh ynruw ing chongiir katuchu haviva.”

²⁸ Isa chong khaena chembe enuw chuve nengkhaena Thangnang jeehnii meepae; changvakonchu ynteer vasahpae ichii khaena chembe enuw chuve fhuwven ae tanii hungsuwh meepae khaka aarang chupae.

²⁹ Thangnang inche aateer vasah aere bor apeeh vasah ae ningna abarungriir mantehmah.

³⁰ Reentaang mee ae, ajaenche nenuw Thangnang chongriir ynjiimah ing omchuw, changvakonchu atiive nenuw Thangnang ningchuwh nenphapa, akhaechuve Jehudi aenche chongriir ynjiimah ynsuwh-sae.

³¹ Havithoh aanghak ing nenuw ing ningchuwh nenpha inche, Jehudi aenche Thangnang chongriir manjiimahsae, amachuve enuwkho atii Thangnang ningchuwh emphanii khaenava.

³² Thangnang ing mee vakhaechu chongriir ynjiimah kaeshum nache akhumpa, akhaechuve aningchuwhchu mee aangkhengna amandangnii khaenava.

Thangnang ting Ympahsah

³³ Aajaehmeh iruungva Thangnang lerchii? Aajaehmeh ithuwhva asing aveernii vokhehkho amanghuwchu! Achuw ing achongiirchu riircheh vachiiva? Achuw ing alamchu manghuwcheh vachiiva?

³⁴ Ynziih ing ariirsa, “Aafhuw barungriirchu achuw ing manghuwva chiiva? Achuw ing aningna chong tahpeehcheh vachii omkhang?”

³⁵ Aafhuw aningna maensa ing pinaka, Aafhuw ningtanii athar phava-chiichu achuwva?

³⁶ Aafhuw ing peeh aangkhenglaang aseemva amanche aangkhenglaang ama ajaarna omchirva vokhehkho akhaenava. Thangnang ningnache ichuwr naemah ing ympah ynsuwhrasii! Amen.