ROMIO 10 - ITHAR CHONGHAK

¹ Kauw kanae ae, kabarungriir ing aadik inche kamee ae ing ikarpeeh emphanii khaenache Thangnang ting kathamsahva.

² Thang-nang chu ithuwhpak ing emandensa changvakonchu emanghuw inuwzii ing mandenmahsae ichiichu ki ing saarkhii kapeehnah.

³ Thangnang ningtanii ichum ynthiingchu emanghuwmah vakhaka entaksah tanii ichum ynthiing nache engiirnii jong aeka, enuw ing Thangnang ningtanii ichum ynthiing dernache ongmahsae.

⁴ Khrista chuve thacha mee vakhae ningnache ichum ynthiingchu engaansuwhnii inche adongnii vajeer chonghak chuva.

Manlaenpeeh i Mee Aangkheng khaenava

⁵ Mosi ing abaziih chuve vajeer chonghak ajaarna ichum ynthiing phanii atu mee inche vajeer chonghak inuwzii ing ringvaata.

⁶ Changvakonchu thacha jaarna ichum ynthiing ymphava achii aenche enriir, “Nabarungriirna tamahra, achuw inche thangbaen ting karvachiiva?” (amachuve Khrista chu ajenbasumnii vatah.)

⁷ Changmahka achuw inche laaruw paam dertingche juruwhva chiiva? (amachuve Khrista chu ithii tanii ahenbasuwnii vatah.)

⁸ Ama ingkhe ynchii ariirsa? Nang nabuumna, nanerna vokhehkho nabarungriir nakhe chongsaechu omna (amachuve kenuw ing kentong thachanii chongsae chuva.)

⁹ Nang naner ing Jesu chu Aafhuwva tataniika vokhehkho Thangnang ing ithii tanii amanringva ichiichu nabarungriirna thacha taniive, nangchu ikarvaata.

¹⁰ Mee ing abarungriirna thachaka ichum ynthiingchu aphava, amanche ner ing ynriirsah inche ikarpeeh ymphava.

¹¹ Ynthiing thiimziih ing ariirsa, “Aafhuw chu athacha mee vakhae ing ningjak phamahnii.”

¹² Akhaechuve Jehudi re Grik ae ruwrak nache asiksik ichii yntanga omah; Thangnang chuve aangkheng khaena Aafhuwva vokhehkho aningna a-een vakhae ningnache ynriimjor ing bor apeehsa.

¹³ Akhaechuve Aafhuw ruming a-een mee vakhaechu karvaata.

¹⁴ Changvaniive enuw ing enthacha-mah Aafhuw chu ynsaangkhe eenva chiipae? Enuw ing supsii ensiimah Aafhuw chu ynsaangkhe thachava chiipae? Aatongchu omah nacha ynsaangkhe siiva chiipae?

¹⁵ Enuwchu ynchiirmah ae nacha, ynsaangkhe enuw ing isa chongchu tongva chiipae? Ynziih vasah ynthiing thiimziihna ariirsa, “Rotharohnii idae isa chong ajereen vokhehkho atong ae engkhichu aajaehmeh isava!”

¹⁶ Changvakonchu mee aangkheng ing isa chongchu rimah ae. Isaia atakrap ing ariirsa, “Aafhuw, achuw ing kenchongchu atha-chasae?”

¹⁷ Chukhaenache chongchu siika thachachu ompehva, vokhehkho Khrista ajaarnache chongchu ompehva.

¹⁸ Changvakonchu ki ing kariir, enuw ing ensii vasah mahvakhang? Atatak ing ensiipa, “Enuw engaruurchu laaruw paam apaam lijana vokhehkho enchongchu laaruw paam avadongnii ipha ing tungsa.”

¹⁹ Ki ing athar kasii, Isrel mee aeng emanghuwmah vakhang? Mosi ing amaensana ajeer, “Jaati ynsuwhmah aechu naningna kallak mangomva kata, Ipang jaati ae taklina nathir manfhuwrva kata.”

²⁰ Changvakonchu Isaia ing inempak athona isa ing ariir, “Ki ynjongmah mee aenche kichu yntuwhpae, Kichu ynniihmah ae ningnache kataksah ing yndangsing.”

²¹ Changvakonchu Isrel ae ningna-che ama ing ariir, “Chongriir ynjiimah ae vokhehkho asiksiisii jaati ae chaap nache siimpum kakik kathohpa.”