PHILIPPIA 1 - ITHAR CHONGHAK

¹ Jesu Khrista meenae ynsuwh Pol vokhehkho Timothi tanii ing, ynthiing Jesu Khrista nong aapuh ae vokhehkho Dikan ae-

² Neningna Apa Thangnang vokhehkho Aafhuw Jesu Khrista tungsiih re idaechu om ynsuwhra-siing.

Aapa ae khaena Pol ing Athamsah

³ Apha vakhaena nenuwchu mandensachuw ingka ka Thangnang chu nengkhaena kamanpahsahva;

⁴ vokhehkho apha vakhaena neng-khaena kathamsah raenche, karotha iroh ing kathamsahva.

⁵ Ki ing ynthiing nong kahentu iniina basenka atanii ipha ing nenuw ing ymbomjaeh sachuw.

⁶ Chukhaenache ki ing kathachanah amachuve, neningna isa nong abasen Thangnang inche, Jesu Khrista aaniichu aphamahri raentaangche areer ibasuwpeeh savaata.

⁷ Nenuw vakhae khaena kakhar havi kakhaena chenbe ichumva. Yngkhaena ynchii imbe apha vakhaena nenuw i kabarungriir sungna omjaeh nachuw, amanche atarae kaeshum sungna katak yngkhum ae vokhehkho isa chong khaena ngahther ingka icheep ing kamangiirne, nenuw vakhaekho kithoh sarup phahakfhuwchu vachuw.

⁸ Ki ing nenuw nengkhaena ithuwhpak ing kakhar havi Jesu Khrista barungriir taniiva ta-ingka ichum ing kariirne, Thangnang ing saarkhiina.

⁹ Amanche ichum ynghuwna vokhehkho ynthiing vajeer ing ningsiih ahenthichu ahungruungnii khaenache ki ing havi kariirsahva,

¹⁰ amana chembe nenuw ing isasehchu ynchiiva ichii iteercheh vanenta; vokhehkho Khrista aanii nache nenuw ynthiingmah vokhehkho ynraar nentuchaap nentaklina omahnii.

¹¹ Nenuw nen-ringkumchu Jesu Khrista ajaarnache atatak angen isa hembasuw naka Thangnang alaar isa ympahniichu sipvaata.

Khrista khaena Iring

¹² Kaarang ae, nenuw vakhae ing manghuw tanuwka kachiichuve, kataklina isuwh chaap inge atatak ing isa chongchu ma sinii khaenache ynsuwhsa.

¹³ Havi inge kaeshumna korkhiing ing ynchar ae katak i Khrista meenaeva ichiichu iruwng sejaamna ong laarchang ae vokhehkho mee vakhae aenche emanghuwniisa.

¹⁴ Ki ing kaeshumna ong inge unae vakhae ing Aafhuw yndensehsehnii vokhehkho ama aanuwjiichu ynchik omrudeh ing isa jaerachu itongnii khaenava.

¹⁵ Achuw yngkheh chuve sehmaner om ing vokhehkho ynnahnii ing Khrista isa chongchu entongnah ae; changvakonchu reentaang areh aeng chembe ynthiing barungriir thoh ynruw ing entongsae.

¹⁶ Havi ningsiih inchemba, yngkhaena ynchii imbe isa chongchu ingahnii khaena Thangnang ing ympeehchu enuw ing emanghuwsa.

¹⁷ Achuw yngkheh ae chuve Khrista i ynthiing ing tongmah aeka, enrutumsah khaenapang manden aeka kaeshum sungna ong kichu manjaanii khaena entunah ae.

¹⁸ Chunuwcha ynchii khava chang! Ama khaena karotha rohsapnara, yngkhaena ynchii imbe ynchii ynchii vakhang nakho Khrista thaminchu entongsae. Karothakho manrohrap vakata,

¹⁹ yngkhaena ynchii imbe Jesu Khrista tanii laetha ajaar inche nenuw vakhae ing kathenna thamchuwka ymbomchuw inche taang isuwh phava kata.

²⁰ Atatak ithuwh ing kamandennah amachuve, kanong i utaraenkho chenmahnii; changvakonchu apha vakhaena vokhehkho ataenkho kabarungriir ngamna amachuve, ringva kachii vakhang nakho, thikva kachii vakhang nakho khrista ruungniichu tuvakata.

²¹ Kaningna chembe Khrista khaena iring vokhehkho ithii inche katuungsahva.

²² Changvakonchu hakchaang khaena ringningve, amachuve kataksah khaena aanla omnii nongvatah. Amana chembe ki ing ynchiikha iteerva kachiiva riirchehmah ing.

²³ Kamana ijiifhuw lam asae ynniimeh heom inge eechiipnah, amachuve hava ringkum i maningka amanche Khrista thoh iringchu kaadik haknah, yngkhaena ynchii imbe ama inche sahakna;

²⁴ changvakonchu nenuw vakhae thenna iring inche athurfhuw yngkheh nareeh.

²⁵ Havi ki ing icheep ing kamanghuwsa amachuve, nenuw nema asinii khaena vokhehkho thachana rotharoh nengomnii inche, ki nenuw vakhae thoh paarhakva kata,

²⁶ amana chembe nenuw re ki vokheh onghak manuwka, nenringkumchu Khrista thohche yntuwhak naka kaningna inempak ruungniisava nenta.

²⁷ Atii athurfhuw yngkheh chuve, nenuw nenringkumchu khrista isa chong khaena pangche matik icha ing paarruw, amana chembe ki ing nenuwchu imunii khaena thengkhang ningkho, thengmah khang ningkho, nenuw barungriir yngkhehpang ing isa chongchu thachanii khaena manpir tanuwka, vokhehkho thacha yngkhehpang nache ngiirnachuw ichiichu ki ing isiicheh phava kata.

²⁸ Eejeehnii aechu chiimah aeruw, nenbarungriir manpir therruw amana chembe enuw duwrvaatae, changlaenche nenuw ing chehva nentae, yngkhaena ynchii imbe nentaklina maepahnii ympeehchu Thangnang va.

²⁹ Akhaechuve khrista ningna yndenpang chumahka, ama akhaena ijachaam khaangnii chukho ympeehva.

³⁰ Atii nenuw ing kithoh ynruw ing laar tukchehva nenta. Amachuve isi vasahna laar katuk nemu thohkhe yngkhehpang vatah; ataraenkho nenuw ing nensii laar churap katukjaeh tahsa.