PHILIMON 1 - ITHAR CHONGHAK

¹ Jesu Khrista khaena kaeshum sungna ong Pol ki ing unae Timothi thoh ing- Kaningsiih nong katufhuw Philimon,

² ynsarnuw Aphia amanche laarchang Arkkipa vokhehkho na-een sungna ruwrthiing nengkafhuw mee vakhae ningna chongthen i kavebaziih sahnah:

³ Apa Thangnang vokhehkho Jesu Khrista tanii tungsiihchu neningna om ynsuwhrasii.

Philimon Ningsiih vokhehkho Athacha

⁴ Nenuw vakhaechu mandensachuw ingka apha om bakhaena ithamsah thoh ynruw ing Thangnang kaman-pahsahnah.

⁵ Nenuw ing Aafhuw Jesu Khrista ningna vokhehkho ynthiing mee ae taklina neningsiih vokhehkho nenthacha omchu kensiisahpa.

⁶ Chukhaenache nenthacha ing Khrista chu ynghuwniiseh khaena nong ynjarnii sehseh rasiing ta ingka kathamsahnah.

⁷ Yngkhaena ynchii imbe naningsiih tanii ki ing rotharoh inempak kaphasahpa! Akhaechuve kaarang, nang najaarna ynthiing mee vakhae embarungriir rotharoh athisehnah.

Onesimas khaena Athamsah

⁸ Nang ing tuvanachii nong khaena ipirpak ing riirning ta ing konchu,

⁹ Khrista khaena kaeshum sungna ong lipah changden Pol ki ing ningsiih thoh ynruw ing,

¹⁰ Onesimas rutumna ampa yngkheh vaang kathamsahnahchii.

¹¹ Atak i ajaenbe naningna ikaniimah mee vakonchu atiive kaning nakho ikanii mee yngkheh ynsuwhsa.

¹² Atiive iruwpak ing ama i naningting kavebathennah.

¹³ Isa chong khaena kaeshum sungna ong kithoh nachangdenna onghak nungka rukuum itunaka takhang ningkho

¹⁴ nang ing narumahchu tuning tamah ing. Chukhaenache isajaeh ing itupeeh savaanta kamandensahnah.

¹⁵ Apha mongteh khaena naningtanii Onesimas itaen i atiive apha om bakhaena nangthoh nong tunii khaenava;

¹⁶ Atii atak i ynningna chembe suwhchu ynsuwhmahsa, Khrista rumingna athar vokheh ningsiihniipak mee yngkhehchu nang ki ynningna ynsuwhsa.

¹⁷ Chukhaenache nang ing kichu naarang yngkheh ing imanden sanana amakho kivaang ihebariim peehsara.

¹⁸ Isi vasahna laanglam naningna raardoh khangnakho, seer baarna yntuur omkhang nakho ki ing manseengsava kata;

¹⁹ hava chong i Pol katakrap ing kabaziihva; seerbaar yntuur omnave ki ing singvakata-nang ing ki isuursava nachii chuve riirmahtah manuw.

²⁰ Haviva kaarang Aafhuw nong khaena yngkheh re yngkheh ymbomchu: Jesu Khrista rumingna karotha rohnii itupeehra ta ingka kathamsahnahchii.

²¹ Ama i nachongriir derna isajaeh ing isinii khaena vokhehkho kaveriir chungna nangkho asaknii vakhae ing itupeeh vanata ichii ing kamandensahnah.

²² Yngkheh chuve ki kavatungnii khaena ongnii ihesir peehsara; amanche nenuw ing kakhaena ynthampeeh tahnachuw ki thenglemva kata ichii ing kamandennah.

Achinii Chong

²³ Jesu Khrista rumingna kaeshum sungna onghak kaarang Ipaphras ingkho nenuwchu ymmandensahnah;

²⁴ amanche kanong tufhuw ae Maak, Aristarkas, Demas vokhehkho Luk enuw aengkho ymmandensahnah ae.

²⁵ Aafhuw Jesu Khrista tungsiih ajaar ing nenuw vakhae nenlaethachu ynruwfhuwrasii. Amen.