NONGDANG 3 - ITHAR CHONGHAK

Khibong Idam Apha

¹ Atii apha eekuw hungtakka Pitar re Johon ing rumniieen tingche ithamsahnii khaena sisae.

² Amanache amnuw ven rupumna basenka akhi ibong pasar yngkheh veruw aeka, rumniieen nache ivaruwh mee ae tanii meeningsiih athamsah aniihmee inche, Isapak Suwngkung enchii eenkhaarkung nache anasiir emangong.

³ Pitar re Johon inche rumniieen asungtingche envaruwh phana ama ing enuwchu muka eningsiih athamsahpa.

⁴ Enuw ing atakchu enteeh aeka amana Pitar ing ariir, “Keningting ihengenla.”

⁵ Ama ing eningtanii iphafhuw phava katamo taka abarungriir iruwhdeh ing ahengenpa.

⁶ Changvakonchu Pitar ing ariir, “Ki sana rupa deensamah ing, ki ing kadeensah chuve naningna kapeehnahchii: Nazaret Jesu Khrista rumingna hangiir nana karkhiingla!”

⁷ Pitar ing akik nache jebachuwka ahemangiirpa, aphachak nache akhi vokhehkho akhi bakhongchu vapirsa.

⁸ Amatah nache ama ing hangan thohka ngiirsa amanche hungsi vasikho atupa, ama ing ihuung iva tuka ynthoh sehsehka vokhehkho Thangnang manpahka enuwthoh ynruw ing rumniieen tingche varuwhsa.

⁹ Ama ing hunsi vasi tuka Thangnang amanpahchu mee vakhae ing emupa;

¹⁰ Rumniieen Isapak Suwngkung nache ningsiih iphasahnii khaena ongchak aniihmee khava ichii enuw ing manghuw aeka, ataklina isuwh nongchu ingiknii vokhehkho ichiisuwh ing bariimsa.

Rumniieen sungna Pitar Chongjeer

¹¹ Ama ing Pitar re Johon chu abachuw raenche, mee vakhae inche ngik aeka Solomon eensukreen ichii nache vataensae.

¹² Pitar ing amachu ajemutah nache mee ae ningnache ariir, “Isrel mee ae, kenuw kentaksah ruwreng ing changmahka keningsiih ing mee havi kemansicheh khaena atakline nenuw ynkhaena ingik vachuw, changmahka ynchii khaena kentaklina yngenteeh vachuw?

¹³ Abraham, Isak vokhehkho Jakop Thangnang, apa fhuwven aekho Thangnang inche ameenae Jesu chu alaar isa apeehpa. Changvakonchu nenuw ingve Aafhuw chu aatuaricheh ae kikting nenpeehpa, Pilaat ing bathenning takhang nakho amaekung nache rumahchuw.

¹⁴ Changvakonchu ynthiing vokhehkho isa Aafhuw atakchu rumah chuwka miktheh pasarpa yngkhehchu bathenla tachuwka neniihsahpa,

¹⁵ amanche iringnii Aafhuw chuve nenthehpa; Aafhuw amachu Thangnang ing ithii ae kaartanii amanringpa, ama khaenache kenuw asaarkhii nung.

¹⁶ Aafhuw ruming athacha nenuw ing nemu vokhehkho nemanghuw pasar havichu Aafhuw ruming inche akarpa; chumna, Aafhuw tanii ynsuwh thacha inche nenuw vakhae maanache ataklina idamkiirniichu apeehpa.

¹⁷ “Ataraene kauw kanae ae, nenuw nenfhuwven aeng emanghuw-mah vaangkhe, nenuw ingkho nemanghuwmah ing nentuva ichii ki ing kamanghuwsa.

¹⁸ Changvakonchu Thangnang ing ajae isivasahna jaephar ae jaarnache Khrista ing ijachaam phavachii khaena amanthangchu ama ing jinge areer abasuwpa.

¹⁹ Chukhaenache nenbarungriir huungnuwna athar hunganlehruw, nentaklina isii icher chaapchu ikuhpeeh vaata; nenuw ing changche tutanuwve laetha ruwreng aphachu Thangnang tanii thengvaata,

²⁰ vokhehkho nengkhaena aateer vasah Khrista Jesu chu ama ing jenbathen vaata.

²¹ Peeh aangkhenglaang ithar ing aseemmahri raentaangche Aafhuw ing thangbaen nache ongjaeh vaata ichii khaena Thangnang ing ajae ynthiing jaephar ae nerna amanjeer vasahva.

²² Mosi ing taka, ‘Aafhuw Thangnang ing nenuw nenguw nenae ae sungna nengkhaena ki vaange ichii jaephar yngkheh jenbathen vaata, ama ing neningna ariir chong vakhaechu siiruw.

²³ Havi hungsuwh vaata, jaephar chong amanjiimah mee vakhaechu Thangnang mee ae tanii asik ing khaenaka yngkuupkiir ing mamaang vaatae.’

²⁴ Samuel na ing ynthaang chakchak ing hungsuwh jaephar chaap aenche iriirfhuw vakhaechu atarae apha hungvi ipha inge enjeerpa.

²⁵ Nenuw chuve jaephar ae jaarna Thangnang ing chongreep atuchu nengkhaenava, amatah nache Thangnang ing nenfhuw fhuwven aethoh chongreep enrinache nenuwkho ynvaenachuw. Thangnang ing Abraham ningna ariir, ‘Natuti bahsuwm ae jaarnache laaruw paam mee aangkhengna bor pivakata.’

²⁶ Amaensana Thangnang ing neningna ameenaechu ihenbasuw peehka neningtanii isii icher mee vakhaechu barungriir isamah tanii nenghunganrinii khaenache bor ympeehpa.”