NONGDANG 27 - ITHAR CHONGHAK

Pol Rom ting Isi

¹ Kenuw ing Itali ipha ing ruwkuwng nache vaongva taruw kenchiitah nache, enuw ing Pol vokhehkho reentaang areh ae kaeshum sungna engkhum mee aechu laarchang chaama aapuh aruming Julius ningnache amansirpae.

² Asia taang aphamsiir tingche huurnaka sivachii Adramittium ichii ruwkuwng nache ong ungka, kenuw chifhuw nache sisung. Amana Thesalonika na ong Mesidonia tanii mee Aristarkus ing kenuwchu eenruwfhuw.

³ Mathang inii nache kenuw Sidon nache ruwkuwngchu mangiir ungka, Julius ing Pol chu iruwpak ing tuka aarang ae ningnakho ynlen naka anungaenii inche abathenpa.

⁴ Ama mapham nache basenka chifhuw iruung nache kenvasitah nache, siiraang ing kenuwchu parden yntu khaena kenuw ing Saipras daeriim tingche jemanjii ungka kenghuurpa.

⁵ Vokhehkho Silisia re Paamphilia maana heom chifhuwchu veraen ungka, kenuw ing Lisia na om Mira nache vatungsung.

⁶ Amanache laarchang chaama aapuh inche Itali ipha ing sivachii Alekjendria ruwkuwng yngkhehchu vepha ungka, kenuwchu ama ruwkuwng nache ymmangongpa.

⁷ Apha inii iseehpak ing kenuw ing tapnaenae inche ruwkuwngchu huur ungka Knidus ichii maanache ijachaampak ing kenvatung tahnache, siiraang inche akhae ynsuwhka kemaating kensichehmah khaenache, Kep Salmon ichii amaana om Kret daeriim jemanri ungka kenghuurpa.

⁸ Ijachaampak ing chifhuw kuur ruvae jemanri ungka Lasia khuwruung kuurna om isapak ruwkuwng mangiirnii enchii nache tungsung.

⁹ Apha inempak theh ungka vokhehkho Ynthiingnii Inii apha chukho aaraen khaenache, vokheh-kho sivakenchii khaenakho ichiisuwh ing aomtah nache;

¹⁰ Pol ing mee ae ningna ariir, “Laaruw mee ae, ruwkuwngna simuwka ynreen peehchae vakhae vokhehkho ruwkuwng i maangvachii vokhehkho yntak ikho maangvaanchii ing kamusa.”

¹¹ Changvakonchu laarchang chaama aapuuh inche Pol ing ariir chungna ruwkuwng aahuur aaruung re ruwkuwng aafhuw enchongchu athiseh ing arungaepa.

¹² Vokhehkho ruwkuwng mangiirnii nache pharbuw thana ongnii ichachehmah khaenache, aruvakhae Phoniks phamanuwka amanache pharbuw tha sungna ongcheh manuwve ichii manden aeka mee aanem ing chifhuw nache sitaruw ta aeka enriirpa; Phoniks ichii apham chuve Iniisuwhtah, Taetah, amanche Ikang vokhehkho Irip aheh Kret ruwkuwng mangiirnii yngkhehva.

Chifhuwna Khuksuwr Siiraang

¹³ Irip tanii siiraang inche iduwrjaeh ing ahangraang tahnache, enuw ing emandenchu kenphapa ichii ing manden aeka, ruwkuwngchu huur aeka Kret phanii inche tapnanah ing enjehuurpa.

¹⁴ Changvakonchu apha topoh aanuwtingche Ikang Estar ichii ipirpak siiraang inche avesukpa.

¹⁵ Chutahnache ruwkuwngchu raenka siiraangchu maesa abadaar chehmah tahnache, ruwkuwngchu siiraang ahehtingche embathenpa.

¹⁶ Amana Kloda enchiichak isiing chifhuw akuur nache jungsi ungka, kenuw ijachaampak ing ruwkuwngchu kemangiirpa.

¹⁷ Ama mapham nache ruwkuwngchu kiaeka emphuwp therpa; amana kensitah nache, athar vokheh siihphuw yntongting jensukdoh nave ichii khaena ynchik aeka, enuw ing ruwkuwng laangpeenschu rijoh aeka changche emansipa.

¹⁸ Amana khuksuwr siiraang inche kenuwchu inempak ymmanjatah nache, mathang inii nache enuw ing ruwkuwng sungtanii peehchae arehrehchu iren embasenpa,

¹⁹ animanthumnii inii nache ruwkuwng tanii peehchae chaapchu enrenchirpa.

²⁰ Amanache inii iseehpak ing kenuw kentaklina inii ingkho, aesii ingkho arengmah tahnache, vokhehkho ipirpak khuksuwr siiraang ing kentaklina ymbaruw tahnache, atii kenuw ringva kenta ichii yngaemah ung.

²¹ Amana venchaam kentongnii ahunhgseeh thohche, apha ichii nache Pol ing enuw enrik chimbangna ngiirka ariir, “Laaruw mee ae, nenuw ing kachongriir manjiitanuwka Kret tanii henghuurmah manuwve isii ikha vokhehkho ijachaampak imaang ae i phamah vaanchiiva.

²² Atii ki ing nenuw vakhae nenbarungriir ajaniimah ing kariirnah; amachuve ruwkuwng mahnaka nenuw nengkaarna yngkheh pangkho laetha imaang omahnii.

²³ Ki Aafhuw ameechu ynsuwh ingka karum Thangnang avaarmee yngkheh ing kabuumna jaen nache ngiirka ariir,

²⁴ ‘Pol nang ynchik mahra, nang ing Kesar maana ngiirva nachiiting buksa; amanche enla, nangthoh ynruw ing ruwkuwng naongfhuw ae vakhaechu Thangnang ing naningna ympeehpa.’

²⁵ Chukhaenache laaruw mee ae nenbarungriir manjamahruw, kaningna ariir vaange suwhvaata ta ingka Thangnang ningna kathachasa.

²⁶ Changvakonchu inuw chiirikpaam yngkhehting ympeen vaanchiiting bukna.”

²⁷ Jaen suum ariimanrii ahenpha tahnache Adria chifhuw nache asup aphuw ing ymmansi raenche, jaenchim hemphaka ruwkuwng aahuur aenche taang kenjeneengpa ichii ing emanden.

²⁸ Chukhaenache enuw ing chii aasen thuwhne ta aeka emanticha lam somnii thuwhsa; amanche topoh sireeh aeka emantireeh tahnache lam suum ariirunga ithuwh emphapa.

²⁹ Chukhaenache kenuw ing rungfhuw taklina laanglam jesukva tarammo ta ungka kengaanchik tahnache enuw ing ruwkuwng khaamnii asae manriimehchu bathen aeka, khuw hungvaar vachii khaena enthamsahpa.

³⁰ Ruwkuwng aahuur aenche ruwkuwng khaamniichu bajohchir aeka, taangting khuwngva enchii ing thoraang entuchu Pol ing amutah nache,

³¹ ing laarchang mee chaama aapuh vokhehkho laarchang ae ningnache ariir, “Enuw inge ruwkuwngne ongjaehmah ae nave, nenuw iring phamah tanuw.”

³² Apha ichiinache laarchang mee aenche ruwkuwng isiing arunohchu ten aeka embathenpa.

³³ Khuwchu ahungvaarpha nache Pol ing enuw vakhaechu isahfhuw thaemin topoh isahnii khaena thamsa aeka ariir, “Atanii inge inii nisuum ariimanrii chak sungna thaemin man-tenruchuw ing venchaam nentongpa.

³⁴ Chukhaenache thaemin topoh isahnii khaena kathamsahnahchuw; yngkhaena ynchii imbe havi nenuw nenlaetha karnii khaenava, akhaechuve achuw yngkheh rusae tanii sambur yngkheh pangkho maangmahnii.”

³⁵ Pol ing hava chong i ariir nuwna tarchu verika enuw vakhae maana Thangnang hemanpahka vokhehkho bakhiika isah abasenpa.

³⁶ Amatah nache mee vakhae aenche enrotha rohka enuwkho ensahpa.

³⁷ Ruwkuwng sungna ong vakhae ungchu mee chanii somsarii ariikruk kempha.

³⁸ Enuw enven abava tahnache, chifhuw tingche gehuchu ren aeka ruwkuwngchu atii hungjaangsa.

Ruwkuwng Ikii

³⁹ Khuwchu ahungvaar tahnache, enuw ing paamchu manghuwcheh mahsae; changvakonchu chii ing avemah siihphuw ympeehpak mapham yngkheh enuw ing enjemupa. Amatah nache enuw ing ruwkuwngchu vemanlaen chehva taruwmo ta aeka emanseerpa.

⁴⁰ Chukhaenache enuw ing ruwkuung khaamniichu ten aeka chifhuw nache embathenpa; apha ichiinache ruwkuwng amanchumnii emphuwp chukho bajoh aeka amanche maensokna laangpeenchu siiraang ahehting ithoh aeka siihphuw ajenghehnii ing entu.

⁴¹ Changvakonchu chifhuw ynniimeh aantuwhnii tingche ajenghehtah nache, ruwkuwngchu siihphuw tingche ruwhsa; amana ruwkuwngchu yntaangka ynlaap arumah ing omsa. Changvakonchu ruwkuwngchu chii ynnoh inche ivebakhii abasenpa.

⁴² Amatah nache kaeshum sungna ong mee achuw yngkheh ing chii japnaka itaenkho arusa ta aeka, enuw ae i thehtah taeruw ta aeka laarchang aenche chong emanseerpa.

⁴³ Changvakonchu laarchang chaama aapuh inche Pol chu karningka ichii amanden khaenache enuw ing chong emanseerchu akhaampae; amana chiijap aacheh mee aenche ruwkuwng tanii khuwng ae sana taangting suwhsa ae rasiing;

⁴⁴ vokhehkho areh aenche thingchuwngna changmahka topoh aenche ruwkuwng peeh achiihchahna iraen ae rasiing taka chonghak ajeerpa. Amana jinge ichii ing engangkheng taangtingche isuwh empha chirpa.