Biblia Todo Logo
Bìoball air-loidhne

- Sanasan -

NONGDANG 25 - ITHAR CHONGHAK


Pol taklina Festus ing Vajeer atu

1 Atii Festus ing ama paam nache varuwhka, inii nithum aanuwting Kesaria na ing Jerusalem phanii ing vasisa.

2 Amana aanchung jaethiim ae vokhehkho Jehudi ae aaruung ynsuwh ae ing Pol taklinache Festus ningna vajeer tura ta aeka enthamsahpa.

3 Pol chu lamna chuwm manuwka thehtaruw ichii khaena sir aeka, Jerusalem tingche eennii khaena Festus ningna enuw ing aningsiih athamsah ae.

4 Changvakonchu Festus ing eningna abasang, “Pol chu Kesaria na laarchang aeng rung aeka ongna; katakkho apha topoh ongpheh ningka amating sivakata.

5 Chukhaenache nenuw nengkaarna aacheh mee aenche kithoh ynruw ing sinungka, ama amiraarchu omnave enuw ing changlaenche manraar ae rasiing taka ariir.”

6 Amanache engkaarna ama ing inii neeriih, changmahka nisuum iraenru ing ongka, Kesaria phanii ing vasika mathang inii nache ama ing vajeernii ongnii nache ongka, Pol chu iveruwnii khaena chonghak ajeerpa.

7 Pol ing avathengtah nache, Jerusalem tanii itheng Jehudi aenche aruvaena ngiir aeka iruwpak miraar aajaehcha piaeka haviva ichii inaemah ing enriir numnumpa.

8 Amana Pol ing aangahsahnii ariir chongchuve haviva: “Jehudi ae vajeer chonghak taklina vakhang nakho, Thangnang rumniieen taklina vakhang nakho, Kesar taklina vakhang nakho, ki ing isii yntangakho tumahdeh ing.”

9 Changvakonchu Festus ing Jehudi ae ningtanii eningsiih phaningka ichii amandentah nache, Pol chu abasang, “Nang ing Jerusalem ting sitaniika havana vaathuh khaene kamana vajeer itu runingka nachiinah?”

10 Changvakonchu Pol ing ariir, “Kichu vajeer itunii vachii apham Kesar vajeernii ongnii maanache ki ngiirning, Jehudi ae taklina ki ing ynraar katu yntanga omah, amachu nang ingkho isajaeh ing imanghuwpeeh chiika omna.

11 Katak i ynraar katu meeping vanave vokhehkho ithii aru nong katu omnave, ki ithii khaena kada omah; changvakonchu mee ae inge kataklina miraar ympeeh chaap ae sungna laanglam ichum yngkheh pangkho omah nave, achuw mee yngkhehpang ingkho kichu eningting ipichehmahnii ae. Ki ing Kesar ningting vajeer tunii khaena kariirsahnah.”

12 Amatah nache Festus ing aanchungpuh upa aethoh chong manseerka abasang, “Nang ing Kesar ningting vajeer tunii khaena nariir vakhaka Kesar ningting sivaanta.”


Pol ing Agrippa re Barnis Maana Ingiir

13 Atii inii topoh ynghaen phehka Agrippa vokhehkho Barnis ing Kesaria nache Festus chu ivaveernii vokhehkho bariimsahnii khaena va-tungsae.

14 Enuw ing apha topoh iseeh ing encheeng raenche Festus ing Iruwng Agrippa maanache Pol taklina vaathuh isuwhchu manthangka ariir, “Feliks ing kaeshum sungna thinka amah pasar mee yngkheh omna.

15 Ki ing Jerusalem na kaonglae hava pasar khaene aanchung jaethiim aere Jehudi upa aeng ataklina miraar ibabuwpeehra ta aeka kaningna vajeernii khaena enriir.

16 Amana ki ing eningna kariir chuve, amiraar omsa ichii apha mee inche amanraar mee ae thoh mae re mae yntuwh ing ataklina isuwh vaathuh khaenache aangahsahnii chong iriirnii apha aphamah rirae, ama meechu ynraar chuve Rom mee ae nunu mahva kachii.

17 Enuw ing havane engkheng itheng ae khaenache, ki yntukrudeh ing, aanuw nikheh nache vajeernii ongnii nache ong ingka, pasarpa chu iveruwnii khaena chonghak kajeerpa.

18 Ataklina miraar apeeh mee aenche enghangchong incha ki ing kamanden vaang, ataklina isamah chong yntanga enuw ing hembasuwmah ae.

19 Chang-vakonchu enuw entaksah endharmo khaenache, vokhehkho ringna taka Pol ing ithii vasah Jesu khaena ireep nache enganahnii ynsuwhsa.

20 Chukhaenache hava vaathuh khaene ki ing ynsaangkhe siiva kachiiva ichii manghuwchehmah ingka, nang ing Jerusalem ting sinana vaathuh havi khaene vajeer itu naadiknah ta ingka kasiipa.

21 Changvakonchu ama ing paam aapuh ningting vajeer itunii khaena ariirsah tahnache, ki ing Kesar ningting kajebathen mahri raentaang ikhumnii khaena chonghak kajeer.”

22 Agrippa ing Festus ningna ariir, “Ki ingkho achongchu siiningka kachiinah.” Festus ing abasang, “Atuknuw nang ing ama achongchu siivaanta.”

23 Atuknuwche Agrippa re Barnis enuw meenii inche thoraang iruungpak ing vatheng aeka, laarchang ipirpak aapuh ae thoh vokhehkho khuwruung aapuh iruung ae thohche mee vakhae aangkongnii nache varuwh aeka, Festus achonghak inuwzii ing Pol chu enveruwpa.

24 Amana Festus ing ariir, “Iruwng Agrippa vokhehkho kenuw thoh ong pasar vakhae, nenuw havana pasar i nemusa. Ama i iring matik chaamah ichii ing uung aeka Jerusalem nakho, hava nenkho Jehudi mee vakhae ing kaningna enriirpa.

25 Changvakonchu ama ithii phanii ynchiikho tumah ichii ki ing katuwhpa, ama atak ing iruwng ningna vajeer itu aniihnuwzii ing amachu mansinii khaena kachong kamanreeppa.

26 Ama akhaene ki ing kaafhuw naningna ynziihfhuw yntangakho omah. Chukhaenache siinana ki ing ynziih aruchu ituwhnii khaena nenuw nemaana vokhehkho Iruwng Agrippa, athurfhuw ing namaana atakchu kaveruwpa.

27 Kaeshum sungna yngkhum meechu vajeer tuniinache ynveruwtahna, ataklina emanraarnii chongkho emandangmah havichu vakhar omah ae ichii ing kamandennah.”

Moyon Naga New Testament - ITHAR CHONGHAK

Copyright © 2008 by The Bible Society of India

Used by permission. All rights reserved worldwide.

Bible Society of India
Lean sinn:



Sanasan