NONGDANG 23 - ITHAR CHONGHAK

¹ Pol ing aanchungpuh aechu enka ariir, “Kauw kanae ae, ki atanii ipha inge Thangnang maana barungriir iseeng ing ringning.

² Aanchung Jaethiim Ananias ing abuumna ingiir ae ningnache anerku nakhe jechumruw taka ajeriirpa.”

³ Apha ichiinache Pol ing ariir, “Ivaar ing yntaehchii bang, nang Thangnang ing ibin vaata! Nang ing vajeer chonghak inuwjii ing kichu vajeer itunii khaena ongchiika, vajeer chonghakchu asup aphuw ing bareh chiika yngkhaena kichu binruw tachiika najeriirva.”

⁴ Apaangna ingiir mee aenche enriir, “Aanchung Jaethiim chu nang ing narakuhva.”

⁵ Pol ing abasang, “O kauw kanae ae, ama aanchung jaethiim va ichii ki manghuw samah ing; havi ynziihka omna, ‘Nang ing namee ae aapuh taklina isamah ing chongva nachii-mahva.’”

⁶ Changvakonchu Pol ing Saduki ae ing aruwr yngkheh ing om ae vokheh-kho Pharisi ae ing aruwr yngkheh ing om aechu amutah nache ama ing aanchungpuh ae ningna ariir, “Ki Pharisi ping vokhehkho Pharisi ae sapa ping; ithii aeng hangringnae ichii ningmanden om khaena havane kichu chaang yngenpae.”

⁷ Pol ing changche ichii ing ariir-tah nache, Pharisi aere Saduki ynrumah aeka aruwr asiksik ing suwhsae.

⁸ Akhaechuve hangring kho, vaarmee vokhehkho laetha kho omah ta aeka Saduki aenchembe enriir, changvakonchu Pharisi aen-chembe aaniimeh ing omna ta aeka enthacha.

⁹ Amatah nache ipir ing uung sehsehsae, vokhehkho Pharisi ae enruwr kaarting ynvae ae thiimthang topoh aenche hangiir aeka chong ynsangsae, kenuw ing hava mee takline isamah ynchiikho tumah ung. Achuw ing ymmanghuwsa, ama aningna laetha yngkheh ing changmahka vaarmee yngkheh ing ichongkho arusa.

¹⁰ Changche ichii ing chong yngkheh yngkheh engaansang tahnache, Pol chu arakheh arakheh ing embasuwkho arusa ichii khaena aapuh aaruung inche ynchikka laarchang ae ningting jungchum nuwna ataksu engkaar tanii siih ae nuwna laarchang ongnii eensung ting ruwruw taka ajeriirpa.

¹¹ Ama jaen nache Aafhuw ing apaangna ngiirka ariir, “Nathona mansakla. akhaechuve nang ing Jerusalem na kakhaena saarkhii napeeh vaangkhe, Rom nenkho saarkhii piva nachiiting buksa.”

Pol Ringkum taklina Enrumah

¹² Khuwchu ahungvaar tahnache Jehudi topoh aenche yntuwhpoh aeka ensirpa. Enuw entaksah ing Pol chu kenthehmahri raentaang thaemin samahnung vokhehkho chiikho inmahnung ta aeka reepsae.

¹³ Havi aasir aechu mee somanrii athipae.

¹⁴ Enuw ing aanchung jaethiim ae vokhehkho upa ae ningnache vak aeka enriir, “Kenuw ing Pol kenthehmahri raentaang thaemin samahnung ta ungka kensanaensah ing kemanreeppa.

¹⁵ Chukhaenache atarae nenuw ing ama akhaene isajaeh ing ynchiiva ichiichu manghuw nungka nenchiivaang mantanuwna, Rom ae aapuh aarung ningtingche Pol chu neningting ivebathennii chong vepiruw. Changvakonchu kenuw ing havane avatungmah rirae ithehnii khaena hemanchuwmva kenta.”

¹⁶ Changvakonchu Pol asarnuw sapa inche emanchuwmchu asiipa, chukhaenache laarchang ongnii eentingche vakka Pol ningnache ariirpa.

¹⁷ Pol ing laarchang chaama aapuh yngkhehchu ve-eenka aningna ariir, “Havana naepang i aanchungseh aapuh ningting iruwpeehra, ama ing aningna chong yngkheh riirvachii omna.”

¹⁸ Chukhaenache ama ing aanchungseh aapuh ningtingche ruwka ariir, “Kaeshum sungna ong Pol ingkhe ive-eenka havana pasarti i naningting vethakla achiitah nache kaveruwva, ama ing naningna chong yngkheh riirvachii omna.”

¹⁹ Aanchungseh aapuh inche akikna bachuwka aruwpa vokhehkho ynruwhjaeh ing chong asiipa, “Nang ing kaningna chong iriirfhuw omchu ynchiiva.”

²⁰ Ama ing ariir, “Enuw ing Pol akhaena isajaeh ing chong siiva enchiivaang manta ae naka, naningna aanchungpuh ting ivepinii khaena Jehudi aatuaricheh aeng iveniih vaatae.

²¹ Changvakonchu nang ing enchongchu imanjiipeeh mahra, enuw engkaar tanii mee somanrii athi aenche Pol kenthehmahri raentaang thaemin samahnung ta aeka embarungriir manreep aeka amanchuwmnah ae; atii enthoraang chichirsa, naningtanii chong chupang enghah vatah.”

²² Chukhaenache aanchungseh aapuuh inche pasarti ningnache nang ing havana chong i kaningna kaman-thangpa tanana achuw ningnakho riirmah dehra taka amangkaepa.

Pol chu Lipah Aapuh Feliks ningting Envepeeh

²³ Aanuwnache ama ing laarchang chaama aapuh meeniimeh ve-eenka ariir, “Jaen apha eekuw ataklae Kesaria phanii ing isinii khaena laar-chang mee chaniimeh thoh sakuurna siva enchii mee somsarii vokhehkho isii ichi mee chaniimeh thoraang turuw.

²⁴ Pol chu sakuurna mangong nuwna lipah aapuh Feliks aongtah phanii ing ataklina isii ikha asuwhniimahdeh ing sakuur thoraang turuw.

²⁵ Amana jinge ichii ing chongthen abaziihpa:

²⁶ “Klodius Lisias Ruwrengdeen, lipah aapuh Feliks: Salaam kajepeeh-sah nahchii.

²⁷ Havana pasar ichu Jehudi mee aeng suwr aeka ithehnii khaena thoraang enturae, ki ing Rom tanii meeva ichii manghuw ingka, eningtanii laarchang aethoh apha icha ing kengkarpa.

²⁸ Enuw ing ynchii khaena ataklina miraar empeehva ichii akhaechu ki ing manghuw ningka kachiitah nache, atakchu enuw aanchungpuh ae ning ipha ing kaveruw.

²⁹ Ki ing katuwh chuve enuw envajeer chonghak khaena chong emanjaam vatah, changvakonchu ithii phanii changmahka kaeshum sungna ithinnii yntangakho amiraar omah.

³⁰ Vokhehkho hava pasar takline emanchuwmnah ichiichu kaningna emanthang tahnache, ki ing ama ataklina miraar apeeh ae ningnakho namaensokna ataklinache chongsaruw ta ing atak i naningna ithirmahdeh ing kajebathenva.”

³¹ Chukhaenache laarchang ae inche chonghak inuwzii inche Pol chu ruw aeka jaenna Entripatis tingche enghenruwpa.

³² Changvakonchu atuknuwche enuw ing sakuur aongnii mee aechu amathoh ynruw ing isinii khaena ma aeka, laarchang ae ongnii een tingche hunganrisae.

³³ Enuw ing Kesaria hungtung aeka, chongthenchu lipah aapuh ningnache emansirpa vokhehkho Pol chukho aningting enjeruwpa.

³⁴ Ama ing chongthenchu paaka, nang upaam tanii mee vachii taka asiipa. Ama ing Silisia meeva ichiichu amanghuwtah nache,

³⁵ ama ing ariir, “Nataklina miraar ympeeh aechu enthengraenche, ki ing nachong isajaeh ing rungaeva kata.” Amana Pol chu Herot iruwng ongnii sungna mangong nuwna rungruw taka chonghak ajeerpa.