NONGDANG 2 - ITHAR CHONGHAK

Ynthiing Laetha Ijungtheng

¹ Pentikos aphachu ahenphatah nache enuw vakhae inche denkhehna ipurpak ing ongsae.

² Amana manghuw mangharu ing ipirpak siiraang vaang ahuwrusa inempak om thangbaen tanii siiraang ijungtheng inche engongnii eenchu sipsa.

³ vokhehkho bari vaang ichii mi ichuwng inche ynsaesiirka entaklina ichuwchu emupa.

⁴ Enuw vakhaechu Ynthiing Laetha inche sip aeka, vokhehkho enuw ing laetha ing amanchongcheh ae reentaang chong inche ichong embasenpa.

⁵ Atii Jerusalem nache Thangnang ynden Jehudi ae, apaam lija tanii chaap theng aeka ong ae.

⁶ Enuw ing huwrusachu ensiitah nache mee inempak yngkongsae vokhehkho ngiksae, akhaechuve ameesiir aenche entaksahsah chong ing ichong aeng ensiipa.

⁷ Mee aenche ichiisuwh vokhehkho ingikniipak ing enriirpa, “Havana ichong vakhae ae i Galili mah paekhang!

⁸ Amachu ynsaangkhe enuw ing ichong ae i inuw yntaksahsah chong pingeng ichii ing ynsiiiva?

⁹ Inuw ithengchaap muw i Pathia, Midia, vokhehkho Ilam tanii vamuw; Mesopotamia, Judia, vokhehkho Kappadosia tanii vamuw; amanche Pontus vokhehkho Asia tanii vamuw,

¹⁰ Phrigia vokhehkho Paamphilia, Ijeep re Sairene thoh ynneeng Libia paam tanii vamuw. Topoh chuve Rom tanii vamuw,

¹¹ Judaijam ening Jehudi aere reentaang mee ae vokhehkho inuw topoh inchembe Kret re Arabia tanii manuw, changkhangnare inuw vakhae ing ynsii ichuve inuw ynchongsah ing Thangnang anong iruungpak khaena ichong ae vaang ynsiisa!”

¹² Enuw ing ingik aethoh vokhehkho fhuwm ynvae ing yngkheh yngkheh chong aeka enriir, “Havi ynchiikhava?”

¹³ Changvakonchu areh ae inchembe maniisa aeka enriir, “Enuw ae i aren juw ing baruwsae.”

Pitar Chongjeer

¹⁴ Pitar ing chongthang suum arii yngkheh ae thohche hangiirka mee ae ningnache iruur ipirpak inche chongsa: “Kauw kanae Jehudi ae vokhehkho Jerusalem sungna ong mee vakhae, havi ynchiiva ichiichu neningna riirkata irungaepeehruw.

¹⁵ Havana mee ae i nenuw ing juw ynruwpae ichii ing nemandennah, enuw ae i ynruwmahpae; akhaechuve ziing apha eekuw tapehna.

¹⁶ Changvakonchu havi jaephar Joel ing ariir chong chuva:

¹⁷ “Thangnang ing achii, achinii inii nache jinge suwhvaata, Ki ing mee vakhae taklina laetha jepivakata. Nenuw nensapa vokhehkho nensanuw aenche kachong isachu tongvaatae; nenaepang aenche ruvaam muvaatae, vokhehkho nengupa aenche enrumang sikvaata.

¹⁸ Chumna, kameenae ae, pasar vokhehkho rupanuw ae ningna rapkho, ama inii nache kalaetha jechirva kata, amanche enuw ing kachong isachu tongvaatae.

¹⁹ Amana ki ing thangbaen chungting vokhehkho laaruw paam derting ingiknii mandangva kata, amanache sii, mi, vokhehkho mikhuwh inempak khukvaata;

²⁰ Achinii iruungpak Aafhuw iniichu ahenphamahri raenche inii ing manthim vaata, vokhehkho tha ing sii isenvaang tavaata.

²¹ Amanache Aafhuw ruming athamsah mee vakhaechu ikarpeeh phavaatae.”

²² “Isrel mee ae, havana chongriir i rungaeruw: Nazaret Jesu chuve nengkaarna ampa Thangnang ajaar nache laetho vokhehkho ingiknii nong aajaeh amanche buwtinnii atu ingkhe Thangnang ing aru meeva ichii nentaksahrap ing nemanghuwsa.

²³ Jesu chu Thangnang ing asir vokhehkho maen ing amanghuw inuwzii ing neningna ipika, nenuw ing vajeer chonghak amanjiimah ae kikrina khros nache jamchuwka jopi henchuwka nenthehpa.

²⁴ Chang-vakonchu Thangnang ing isii ikha ijachaam taniichu bathenka amanringpa, akhaechuve ithii inche atakchu chehmahsa.

²⁵ Yngkhaena ynchii imbe Devit ing Aafhuw khaena ariir, ‘Ki ing Thangnang chu kamanache anasiirna kamusa; akhaechuve kaanlaap niimahdeh khaena Aafhuw ing kachangbaen kuurna ongna.

²⁶ Havi inge ki kabarungriirna inungae ing sipning, kabari inge rothakho rohsakna; athurfhuw chuve kahakchaang ing kaningmanden nache ongvaata.

²⁷ Aafhuw nang ing kalaetha i longkong tingche irenpeehmah tanii, Aafhuw nang nameenae ynthiingchu thaensung nache manthukmah tanii.

²⁸ Aafhuw nang ing kaningna iringnii lamchu ymmansiipasii, Aafhuw nama nache kichu rotharoh inche imansip vaanta.’

²⁹ “Kauw kanae ae, Iruwng Devit khaena ichiimjaeh ing kariirchehsa. Atak ithikkho thiksa amanche idimkho yndimsa, amanche athaenkho atanii phanii ing yngkaarna omna.

³⁰ Atak jaephar yngkheh vakhaka ama atuti bahsuwm tanii yngkheh ing aaruwngpham ongniina ongva chiiva taka Thangnang ing aningna chongreep yngkheh atupeehpa ichii ama ing amanghuwpa.

³¹ Devit ing nuwting hungsuwh vachiichu maen ing muka Khrista ing hangring vachii khaena chongsa, ‘Aafhuw chu longkong tingche babuk mahsa, Aafhuw hakchaang inche thaensung nache thukmahsa.’

³² Havana Jesu rem ichu Thangnang ing amanringpa, ama khaenache kenuw vakhae ing asaarkhii ynsuwhnung.

³³ Chukhaenache Thangnang chang-baen atachang ing manruungka vokhehkho ynthiing laetha pivakachii taka ariir chongreepchu ampa ningtanii iraangka, ama ing ajechirchu nenuw ing nemu vokhehkho nensii haviva.

³⁴ “Devit ing thangbaen ting karmah, changvakonchu ataksahrap ing taka, ‘Aafhuw ing ki kaafhuw ningna katachangne ongla,

³⁵ nang ynjeehnii aechu ki ing nakhi bakhong derna kasiihmahri ae raentaang.’

³⁶ “Chukhaenache khros na nenuw ing nentheh Jesu havi Thangnang kho Khrista kho ynsuwhsa ichiichu Isrel eengkuw chaap ing atatak ing manghuw aerasii.”

³⁷ Amachu ensiitah nache, enuw embarungriirna isii ynsinvaang taka Pitar vokhehkho chongthang ae ning-nache enriir, “kenguw kenae ae kenuw ynchii tuvakenchiiva.”

³⁸ Pitar ing eningna ariir, “Nenuw ing isii nentu chaap akuhnii inche nenbarungriir huungruw vokhehkho Jesu Khrista ruming nache nengkheng baptais turuw; amanche nenuw ing ynthiing laetha kikthuur phavanenta.

³⁹ Nening nakho amanche nensiti ae ningnakho vokhehkho yndahna ong ae vakhae nakho, Thangnang ing eenvachii chaap nakho chongreepchu omna.”

⁴⁰ Pitar ing reentaang chong aajaeh ingkho saarkhii pika, enuwchu ithoh-saka ariir, “Embarungriir ichuwhmah entaklina vajeer thengvachii havi tanii nentak sahsah nenringnii tusaruw.”

⁴¹ Chukhaenache ama achongchu athacha vakhae aenche baptais entupa, vokhehkho ama inii nache mee lising ynthum vakhae emphapa.

⁴² Enuw ing chongthang aeng emanchuw nache vokhehkho ningsiih ipurnache, tar isahhak nache vokhehkho ithamsah nache ympehru-deh ing embarungriir emanruwh dehpa.

⁴³ Mee vakhae taklinache ynchiknii suwhsa, amanche laetho vokhehkho ingiknii aajaeh chongthang ae inche entupa.

⁴⁴ Amana thacha mee vakhae aenche purpak aeka peehchae vakhae ynchumpoh ing ensichinniipa;

⁴⁵ vokhehkho enuw ing endeensah vakhae juwr aeka achuw yngkheh ing kaaniivachii inuwzii inche mee vakhae ningnache ensempa.

⁴⁶ Anasiir rumniieen nache barungriir yngkhehpang ing yntuwh aeka, een een nache tar bakhii aeka rotharoh ing vokhehkho barungriir ichampak inche sahakpoh aeka,

⁴⁷ enuw ing Thangnang manpah aeka ong ae, amanche mee vakhae taniikho ningsiih empha, vokhehkho ikarpeeh apha aechu Aafhuw ing anasiirche eningna mee ahemanempa.