NONGDANG 18 - ITHAR CHONGHAK

Pol ing Korinthia ting Asiraennii

¹ Atii Pol ing Athens khuwchu bathenka, Korinthia aphapa.

² Amanache achuw yngkheh Jehudi mee aruming Akuila ichii pontus na om yngkheh ing arumee Presila thoh Itali tanii ithengpeh ae enuwchu Pol thoh yntuwhsae, akhaechuve Iruwng Klodius ing Jehudi mee vakhae Rom bathenruw taka chonghak abathen. Pol ing enuwchu avaveerpae.

³ Enuw thohche enongtu aanghaktah nache onghak aeka nong entupohpa, enongtu chuve khurpeen iseem nongva.

⁴ Ama ing Deennii chaapna meekongnii nache Jehudi ae, Grik mee ae thohche chong yntaannii aeka, Aafhuw chu thachanii khaena emaneem ae.

⁵ Amana Silas re Timothi chuve Mesidonia ting juwngsae, amanche Pol chuve Jesu i Khrista chuva taka Jehudi ae ningna isa chongchu abarungriir iruwhdeh ing atong.

⁶ Amana Pol chu rumah aeka ithipak ing ataklina enchong tahna Pol ing apeen rukhuung-ka eningna ariir, “Nenuw nentaksah nensiikha nenrusaena bukrasii! Ki chuve manthiingning, atanii basen naka ki reentaang mee ae ting isiping.”

⁷ Amachu ariirthoh ympeenka Taitas enchii Justus mee yngkheh Thangnang amanden a-een nache tungsa; ama a-eenchu meekongnii thoh ynneeng.

⁸ Amana meekongnii nong aapuh Krispus ing a-eengkuw aethoh engkheng Aafhuw enthachapa; amanche Korinthia mee aanem ing siiaeka enthacha vokhehkho baptais entu.

⁹ Ama jaen nache Aafhuw ing Pol ningna ariir, “Ynchik mahra, chongla vokhehkho manchen mahra,

¹⁰ Ki ing nangchu kaanruwfhuw sachii, achuw ingkho nangchu iparmahnii; hava khuwruungne kamee inempak omnae.”

¹¹ Chukhaenache Pol ing engkaarna Thangnang chongchu manchuw aeka kumkheh tharuk chak ong.

Gallio re Pol

¹² Gallio ing Akaia lipah apuh raenche, Jehudi aeng barungriir yngkhehpang ing Pol taklina rumah aeka vajeer tunii tingche varuwh aeka enriir,

¹³ “Hava mee inge vajeer chonghak nakhe henbareh vebarehka Thangnang ting thachanii khaena mee aechu amaneemnah enchii.”

¹⁴ Pol ing ichong basen kata achiiraensiim Gallio ing Jehudi ae ningna ariir, “O Jehudi ae, laanglam isamah miktheh chiitheh vokhehkho ynraar chong omnave, ki ing nenuwchu khaangfhuwva kachiivachuw.”

¹⁵ Changvakonchu chongsuwhnii, ruming khaena vokhehkho nen vajeer chonghak khaena ynjeehnii vata-nuwve nenareerna ensaruw; ama khaena ki vajeer itu ynsuwh ningka tamah ing.

¹⁶ Amana enuwchu vajeer tunii tanii athurpae.

¹⁷ Amanache enuw vakhae ing meekongnii aapuh Sosthenes chu suwr aeka vajeer tunii maanache embinpa. Changvakonchu Gallio ing hava nong khaene yntanga thosamahsa.

Pol Entiok ting Hunganri

¹⁸ Pol ing amanache apha iseehpak ing ongka aanuwnache auw anae ae thohche ynsaeka, Presila vokhehkho Akuila aethoh ynruw ing Siria phanii ing ruwkuwng nache sisae. Ama achongreep om khaena Kenkria nache arusae amangkuhpa.

¹⁹ Enuw ing Ephisia nache hungtung aeka enuwchu amanache amahpae. changva-konchu atak chuve meekongnii nache varuwhka Jehudi ae thohche chong emanseer.

²⁰ Enuw ing Pol chu apha topoh iseehhak ing ongla ta aeka enriircha rumahsa.

²¹ Chukhaenache enuw thoh engaansae phana Pol ing ariir, “Thangnang ing amanden ynsuwh nave ki athar vokheh nening-ting vaanriva kata.” Ama ing Ephisia na ing ruwkuwngna ongka sisa.

²² Ama ing Kesaria nache ahung-tung tahnache Jerusalem ting vakka ruwrthiing aechu salaam tuka vokheh-kho Entiok ting sisa.

²³ Amana apha topoh iseeh ing cheengka vokheh Galatia, Pharigia paam khuwruung henphaka, Thangnang thacha mee vakhaechu barungriir amanpir.

Apollo ing Ephisia vokhehkho Korinthia na Itheng

²⁴ Aruming Apollo ichii pasar Alekjendria tanii thiimziih ihae Jehudi mee yngkhehchu Ephisia nache itheng; atak i ynthiing thiimziih amanghuw meeva.

²⁵ Hava pasar inge Thangnang lam ijiinii khaene aner ithumpak ing amanchuwpeeh ae; vokhehkho aba-rungriir ija omrudeh ing Jesu khaena thamin isajaeh ing amanchuw ae. Changvakonchu Johon ing Jesu baptais amanturaennii pangchu amanghuwsah.

²⁶ Changvakonchu ama ing meekongnii eenna thona isapak ing ichong abasen. Amana Akuila ing arumee Presila thohche ama ing atong chongchu ensiitah nache, atakchu engeenting ruw aeka Thangnang lamchu amanghuw sehnii khaenache adiing anehthoh eman-chuw.

²⁷ Aanuwnache ama ing Akaia khuwting sining achiitahna, Ephisia na thacha mee aenche ithohsa aeka, akhaena chongthen baziih aeka Akaia na thacha mee ae ningtingche embathenpa. Ama ing ahungtungtah nache, tungsiih ajaarna thacha apha mee aechu inempak abom ae.

²⁸ Ama ing Jesu i Khrista chuva taka ynthiing thiimziih ruwreng ajaarna mangdangka mee changjaeh inem Jehudi ae chongchu ipirpak ing basangka achehpae.