NONGDANG 16 - ITHAR CHONGHAK

Timothi ing Pol re Silas thoh Isihak

¹ Pol ing Derbe vokhehkho Listra nache tungsa. Amana che Jehudi rupanuw athacha om asiti pasarpa aruming Timothi ichii sebok yngkheh om, ampa chuve Grik meeva.

² Listra re Ikonium na ong ae thacha mee aenche Timothi khaena isapak ing ichong ae.

³ Pol ing atakchu amathoh ynruw ing sihaknungka achiipa, chutahnache ama ing ruwka vinchiip amantupa. Havi akhaechuve ama ampa Grik meeva ichiichu ama paamna ong aenche emanghuw.

⁴ Enuw ing khuwruung chaapna siaeka Jerusalem na ong chongthang ae vokhehkho upa aeng engaanrunii chongchu ingahnii khaena thacha mee ae ningnache empeehpa.

⁵ Jinge ichii ing ruwrthiing aenche thacha tahna hungpirsae vokhehkho anasiir nache mee masing ahenthipa.

Tros na Pol Ruvaam

⁶ Atii enuw ing Pharigia re Galatia paamna enghungsi raenche, Asia na isa chong itongchu ynthiing laetha inche akhaampae.

⁷ Enuw ing Misia envephatah nache Bithinia varuwhnii entupa, changvakonchu Jesu ynthiing laetha inche rumahsa.

⁸ Chutahnache Misia iraen aeka Tros nache vatungsae.

⁹ Ama jaen nache Pol ningna ruvaamna amansiipa. Mesidonia mee ing ngiirka athamsah, “Mesidonia kenuwchu ibomsara achii!”

¹⁰ Ama ing ruvaam amu aanuwting Mesidonia ting isinii kentupa, akhaechuve Aafhuw ing eningna isa chong itongnii khaena yngeenpa ichii kenuw ing kemanghuw.

Philipi nache Lidia ing Abarungriir Ahuung

¹¹ Chukhaenache kenuw ing Tros na ing ruwkuwngna Samothras phanii ing sisung amanche mathang inii nache Nipolis vatungsung.

¹² Amana ing Philipi kenvephapa. Hava paam i Mesidonia ae aaruungseh khuwruung chuva vokhehkho Rom derna om paam ynsuwhsa; amana kenuw ing hava khuwruung ne inii iseehpak ing cheengsung.

¹³ Amana Deennii inii nache kenuw ing khuwruung taangting siungka chiikuur paangna-che Jehudi ae ithamnii omsiingta manden ungka ama phanii ing vaksung. Kenuw ing ong ungka amana ong rupanuw ae ningnache chongsung.

¹⁴ Thitira khuwruung tanii aruming Lidia ichii rupanuw isenphiphi peen ajuwr vokhehkho Thangnang athacha yngkheh ing Pol ing atong chongchu arungaepa; Pol ing atongchu abarungriir iruwhdeh ing isiinii khaena Aafhuw ing abarungriir aamong peehpa.

¹⁵ Ataksah vokhehkho a-eengkuw thoh baptais entunuwna, ama ing ynthamsahpa, “Ki i Aafhuw athachava ichii ing nenuw ing imanden tanuwve ka-eenna ithengpeeh nuwna iongpeehruw.” Amana kenuwchu ama ing yngkhaampa.

Pol Philipi Kaeshumna ong

¹⁶ Inii nikhehna kenuw ing ithamnii khaena kensir raenche, umlae ichuwng suwh rupanuwti yngkheh kengaantuwhfhuw. Ama ing kikjii ibuwrka seer inempak taarka ama aafhuw inche inempak akaaniisah.

¹⁷ Rupanuwti havi inge Pol vokhehkho kenuw kengaanuwchu jiika uung, “Ynningna manlaenpeeh phanii lam yntongpeeh mee havi ae i athi omah Thangnang meenaepae!”

¹⁸ Ama ing havi inii aajaeh atu. Chutahnache Pol ing adir inempak nungaemahka laetha ningnache ariir, “Aning tanii hungsuwhnii khaena Jesu Khrista rumingna naningna chonghak kapeehnah!” Apha ichiinache isamah umlaechu taang suwhsa.

¹⁹ Ama aafhuw aenche kaaniiva enchiichu omahsa ichii emanghuwtah nache, enuw ing Pol re Silas chu suwr aeka kithiir sungting vajeer ituae maanache enveruwpa.

²⁰ Enuw ing entakchu vajeer ituae ningna veruw aeka enriir, “Enuw ae i Jehudi aepae, enuw ing khuwruung ne huw emantamnah.

²¹ Enuw ing Rom vajeer chonghak ing arumahchu mee ae ningna emanchuwnah ae.”

²² Amana mee aenche Pol re Silas irumah nache vaanvaesae; amana vajeer itu aenche empeen vesiihchir aeka rumor ing bin aeruw ta aeka enriirpa.

²³ Inempak embin aanuwnache, enuwchu kaeshum ting khum aeka ynriimpak ing irungnii khaena kaeshum aarung ae ningnache enriirpa.

²⁴ Ama chongchu emphatahnache entakchu kaeshum tingche khum aeka, engkhichu thing hang ing emphuwppae.

²⁵ Changvakonchu jaenchim nache Pol re Silas ing thamsa aeka Thangnang chu la tuaeka emanpah, amachu kaeshumna ong aenche enrungae ae.

²⁶ Amana manghuw mangharu ing ipirpak linglaang thengka kaeshum eenphambur ynnuhsa, vokhehkho eenkhaar vakhaechu ymmong chirsa.

²⁷ Amana kaeshum aarung inche ijaar tanii hangsuwka kaeshum eenkhaar chaapchu ymmong amutah nache, yngkhum mee aechu suwhchirsae ichii ing mandenka, ama ing achemchu isuwka ataksah ynthehsa kata achiipa.

²⁸ Changvakonchu Pol ing iruur ipirpak ing uungka ariir, “Nataksah maangnii tumahra, kenuw vakhae havane ongnung.”

²⁹ Kaeshum aarung inche jaemi niihka vataensa, amana aanchik ing ynchiimka Pol re Silas maensokna vatiihsa,

³⁰ vokhehkho ama ing enuwchu taang suwhfhuwka ariir, “Oja ae, ki ing ikarpeeh phanii khaena ynchii tuva kachiiva?”

³¹ Enuw ing embasang, “Aafhuw Jesu chu thachara; amanache natak kho amanche na-eengkuw kho manlaenpeeh phava nenta.”

³² Enuw ing aning nakho, a-een sungna ong ae ningnakho Aafhuw chongchu ariir peehpae.

³³ Ama jaen nachenrap ama ing enuwchu ruw aeka rumor ensahnii abuwchu achaam peehpae, amanche aphana chenrap ataksahkho, a-eengkuw aangkhengkho baptais entupa.

³⁴ Ama ing enuwchu a-eensung-ting ruw aeka buw amansahpae, amanche Thangnang chu thacha aeka a-eengkuw aangkheng thoh ynruw ing inempak enrotha iroh.

³⁵ Khuwchu hungvaarka vajeer itu aenche iruung aechu vechiir aeka enriir, “Mee aekha bathen aeruw.”

³⁶ Chutahnache kaeshum aarung inche Pol ningna ariir, “Vajeer itu aenche nenuwchu bathenruw enchiipa, chukhaenache nenuw suwhnuwna idaejaeh ing yngkaeruw.”

³⁷ Changvakonchu Pol ing eningna ariir, “Vajeer ituru aeng Rom mee kenuwchu mee ae maana enuw ing ibin aeka kaeshum ting ynsiihpae amanche atarae enuw ing kenuwchu ynruwhjaeh ing ibathenva chiipae? Rumahnii, entakrap vak ae sana kenuwchu ibathen ae rasiing.”

³⁸ Amana aarung aenche vajeer ituae ningting hava chong i enriirtah nache, Rom meepae ichii manghuw aeka enuw ynchiksae.

³⁹ Chukhaenache enuw ing vak aeka enthamsahpae amanche entakchu kaeshum sungtanii basuw aeka khuwruung tanii isuwhnii khaena enriir.

⁴⁰ Pol re Silas ing kaeshum tanii jungsuwh aeka Lidia eenting vaksae. Amana enuw ing enguw enae aechu ithohsa aeka sisae.