NONGDANG 14 - ITHAR CHONGHAK

Ikonium na Pol re Barnabas

¹ Ikonium nache Pol re Barnabas ing meekongnii nache varuwh aeka enchongtah nache, Jehudi aengkho, Grik aengkho mee inempak ing enthachapa.

² Changvakonchu enthachamah Jehudi aenche reentaang mee aechu sinsa aeka vokhehkho enguw enae thacha mee ae taklina ichamah amanbupae.

³ Chukhaenache enuw ing Aafhuw ajaarnache thona isapak ing chong aeka amanache apha iseehpak ing ongsae, amanche Aafhuw ing enchongchu bajuumka aning taniiva ichiichu laetho tuchehnii ruwreng eningna apeeh inche saarkhii ynsuwhsa.

⁴ Changvakonchu khuw-ruung mee aechu asiksik suwhsae. Mee areh aenche Jehudi khaena amanche mee areh aenche chongthang ae khaena ngiirsae.

⁵ Amana reentaang mee topoh aere Jehudi ae vokhehkho Jehudi aapuh thoh ynchum ing chongthang aechu ningjak piaemanuwka vokhehkho rung ing deengtaeruw ichii eman-denpa.

⁶ Chongthang aenche amachu emanghuwtah nache, enuw ing Likonia, Listra vokhehkho Derbe ichii khuwruung ting amanche aruvaena om paam tingche sisae.

⁷ Amanache enuw ing isa chongchu entong.

Listra re Derbe na Nong Entu

⁸ Listra nache amnuw ven rupum tanii ajungomlae akhi ibong vasah isi achehmah yngkheh om.

⁹ Ama ing Pol ing ariir chongchu arungaerae, Pol ing atakchu enteehka adamnii khaena athacha omchu amutah nache

¹⁰ iruur ipirpak ing uungka ariir, “Nakhi ichum ing ngiirla” Ama ing khuwngka hungsi vasi atupa.

¹¹ Pol ing atu nongchu mee aeng emutah nache Lokonia chong ing uung aeka, “Lae ae ing laaruw mee ynsuwh aeka vokhehkho ynningna juwngsae enchii.”

¹² Amana enuw ing Barnabas chu Jupitar ta aeka amanche Pol inche ichong tahna aaruung vakhaka Markuri enchii.

¹³ Jupitar rumniieen khuwruung maensokna om ama jaethiim inche siirchar vokhehkho riikuwrchu suwngkung nache vechika mee ae thohche chaatha tukenta enchiipa.

¹⁴ Amachu Barnabas re Pol ing ensiitah nache enpeen isiih aeka mee ae kaarna vataen aeka va uung ae,

¹⁵ “Nenuw ing havi ynchii khaena nentuva? Kenuwkho nenuw thoh aanghak laaruw mee pungtah! Ne-nuw ing ikaniimah nong havi tanii thangbaen, laaruw paam, chifhuw vokhehkho hava sungne om aangkheng ynseempeeh iring Thangnang ningting hunganheernii khaena isa chong kenuw ing neningna kenvereenpeeh vachuw.

¹⁶ Isivasahna Aafhuw inche mee ae ing emandenna isichu aruva.

¹⁷ Changvakonchu Aafhuw chuve asaarkhii mangomru ing mamah, Aafhuw ing isa nong itupeehka minvaen tanii khuwsuwr vokhehkho chimuw bajaang aanlanii khaena kumtha ympeehpa; ama ing isahfhuw ipika vokhehkho nenbarungriir rotha-roh ing amansippa.”

¹⁸ Havi riir aeka eningna chaatha tukenta enchii mee aechu ijapak ing engkhaam.

¹⁹ Jehudi topoh aenche Entiok vokhehkho Ikonia tanii thengsae, amana enuw ing mee aechu sinsa aeka Pol chu rung ing deeng aeka thiksa ichii ing manden aeka khuwruung taangting atakchu ensiihpa.

²⁰ Changvakonchu thacha mee aenche aruvaena engiirraenche, ama ing hangiirka khuwruung ting varuwhsa; mathang inii nache ama ing Barnabas thohche Derbe ting sisae.

Entiok ting Hunganri

²¹ Pol re Barnabas ing Derbe nache isa chong tong aeka sebok inem ensempa. Aanuwnache enuw ing Listra, Ikonia vokhehkho Entiok ting hunganrisae.

²² Enuw ing thacha mee aechu manpir aeka vokhehkho thacha nache ichum ing omnii khaena ithohsa aeka, ijachaam inem thoh ynruw ing inuw ing Thangnang iruwng lipah nache hungruwh vaanchiiting buksa ta aeka enriirpeeh.

²³ Enuw ing ruwr-thiing chaapna upa aechu pham thin aeka, ithamsah thoh ynruw ing vokhehkho maaru tong aeka enuw ing enthacha Aafhuw ningnache emansirpa.

²⁴ Enuw ing Pisidia paam hungruwh aeka Paamphilia nache tungsae.

²⁵ Amanache enuw ing Perga nache isa chong tong aeka aanuwnache Attalia ting sisae.

²⁶ Enuw ing enong enghemanchi khaena Thangnang tungsiih ajaarna entakchu emansirnii apham Entiok phanii ing ruwkuwng engongniipa.

²⁷ Enuw ing Entiok nache envatungtah nache ruwrthiing mee aechu mangkong aeka amanche Thangnang ing enuw thoh nong atu vakhae vokhehkho ynsaangkhe reentaang mee ae ningna thacha lam ama ing aamongva ichii vakhaechu eningna entong.

²⁸ Amana enuw ing apha iseehpak ing thacha mee ae thohche onghak ae.