NONGDANG 12 - ITHAR CHONGHAK

Ijachaam Hungnem

¹ Apha ichiinache Herot iruwng ing ruwrthiing mee aechu ijachaam pinii khaena akik avarorpa.

² Ama ing Johon aipa Jems chu chem ing amanthehpae.

³ Havi inge Jehudi aenche pennae ichii amutah nache, Pitar chukho ama ing amansuwrpae. Havi chor ynvaemah tar isahnii kuurva apha ichiinache isuwhva.

⁴ Ama ing Pitar asuwr nuwna kaeshum ting siika, laarchang manriii ing ruwrkheh asha manriimeh nache atakchu amansirpa; yngkhaena ynchii imbe manlaennii kuurva aanuwna atakchu mee ae maana chaang enkata ichii ing amanden.

⁵ Chutahnache Pitar chu kaeshum sungnache arungpae; changvakonchu ama akhaena ruwrthiing mee aenche Thangnang ningting ipirpak ing enthamsahpa.

Pitar Kaeshum Sungtanii Isuwh

⁶ Herot ing atakchu mee ae maana hembasuw vachii inii ama jaen nache, Pitar chu laarchang ynniimeh ae ruwrak nache siir runoh ynnii ing phuwp aeka ijaar; amana aarung aenche kaeshum suwngkung nache arung ngae.

⁷ Amana manghuw mangharu ing Aafhuw vaarmee yngkheh inche abuumna ngiirsa, amanche ireng inche aongnii nache aenpa, amana vaarmee inche Pitar aangna parka abasuw thoh ariir, “Ithupak ing hangsuwra.” Aphachak nache siir runohchu akik tanii ynjohchirsa.

⁸ Aanuwnache vaarmee ing aningna ariir, “Nadiirriim chiimtherla vokhehkho nakheerkhaang kha niira.” Pitar ing changche mantaka vokhehkho vaarmee inche ariir, “Napeen kha singnana kaanuw ijiira.”

⁹ Ama ing aanuwchu jiika vaarmee ing atu arichu ataktakva ichii manghuw mahka ama ing ruvaamna kamuva ichii ing amanden.

¹⁰ Enuw ing ahaarpana ing avomaniinii eenkhaarkung aarung aechu jengaraen aeka khuwruung ting varuwhnii siir ing enseem suwngkungchu enve-phatah nache suwngkungchu ataksah ing ymmongka taang suwhsae. Enuw ing lam nache siaeka vokhehkho vaarmee inche Pitar chu manghuw mangharu ing amahpa.

¹¹ Amana Pitar ing ataklina isuwh-chu manghuwka ariir, “Atii ki ing atatak ing kamanghuwpa, Aafhuw ing avaarmee jebathenka Herot iruwng kik tanii vokhehkho Jehudi ae ing emanden tanii kichu yngkarpa.”

¹² Ama ing vakhar tuka Johon Maak amnuw Meri eenting vaksa, amanache mee aenche yngkongpoh aeka enthamsah.

¹³ Ama ing eenkhaarchu aachumtah nache, Roda ichii meenae rupanuwti yngkheh inche imongkata taka huungsa.

¹⁴ Rupanuwti inche Pitar iruurva ichii amanghuwtah nache arotha iroh lamher ing een-khaarchu imongru ing hungtaenka eenkhaar kungna Pitar ngiirna ichii chong ahungriir.

¹⁵ Amana enuw ing aningna enriir, “Nang baveeh nachii! Changvakonchu ama ing ataktakva taka ariirteehpa. Chutahnache enuw ing embasang, “Ama avaarmee vasiingta.”

¹⁶ Changvakonchu Pitar inchembe eenkhaarchu vanuh vanuh ichumka ong. Enuw ing eenkhaarchu engamongtah nache atakchu muaeka ngiksae.

¹⁷ Ama ing eningnache huwdaejaeh ing ongnii khaena akik ing mandangniika, amana atakchu Aafhuw ing kaeshum sungtanii ynsaangkhe taang abasuwva ichiichu eningnache atongpa. Ama ing hava chong i Jems vokhehkho auw anae thacha mee ae ningna riirruw achii; aanuwnache ama ing jungsuwhka reentaang yngkhehting sisa.

¹⁸ Khuw ahungvaar tahnache Pitar taklina ynchii isuwhva ta aeka laarchang ae sungna inempak huwtamsa.

¹⁹ Herot ing atakchu jongka atuwhmah tahnache, aarung ae ningna chong siika vokhehkho ithehnii khaena eningna chong apeehpa. Aanuwnache Herot ing Judia bathenka Kesaria nache cheengsa.

Herot Ithii

²⁰ Herot ing Taire Sidon mee ae taklina inempak abarung siksa, chutah-nache barungriir yngkhehpang ing aningtingche vak aeka iruwng kaaroh aapanii Blastus chu ynchaarfhuw aeka idae omnii khaena enthamsahpa, akhaechuve empaamchu iruwng apaam tanii isahfhuw thaemin empha.

²¹ Amana engaanrunii inii nache Herot ing iruwng peendiir ing ynthongka iruwngpham ongnii nache ongka eningna thamin atong.

²² Mee aenche hanguung ae, lae iruurva, meeruur mahva!

²³ Ama ing Thang-nang amanpahmah khaena apha ichiinache Aafhuw vaarmee ing man-varka amanche rungi ing saka thiksa.

²⁴ Thangnang isa chongchu yntongka thacha mee hungnemsa.

²⁵ Barnabas re Sol ing enong manchi-aeka aruming Johon Maak ichiichu ynrufhuw aeka Jerusalem tanii hunganrisae.