NONGDANG 11 - ITHAR CHONGHAK

Pitar ing Jerusalem Ruwrthiing nache Amanthang

¹ Atii chongthang aeng vokhehkho Judia paamna ong thacha mee unae vakhae aenche reentaang mee aengkho Thangnang chongsae emphapa ichii chong ensiipa.

² Pitar ing Jerusalem ting avasitah nache, vinchiip ruwr aenche amathoh chong ynsang aeka enriir,

³ “Nang ing vinchiipmah ae ningna ruwh chiika enuw thoh thaemin nasah hakpa!”

⁴ Amatah nache Pitar ing eningna thamin aangkheng atongpa:

⁵ “Ki ing Joppa khuwruung nache kathamsah raenche ruvaamna kamu. Iruungpak peenvaang ichii peehchae thinnii yngkheh arakiing manriina ynchuwka thangbaen tanii ijungbuw kamuchu kabuum nache omsa.

⁶ Amachu ki ing ibuwrneh ingka kakharlae, laaruw paam shava akhi manrii ipaar, lampa sha, aven ing yntorka isiae vokhehkho minvaen vaati ae kamu.

⁷ Amana iruur yngkheh ing ariir kasii, ‘Hangiirla, Pitar; theh nana sara.’

⁸ Changvakonchu ki ing kariir, ‘Aafhuw amachu ynsuwhmahrasii! Akhaechuve ki imaangva ichii chaap changmahka ynthiingmah peeh kabaena thinmahri ing.’

⁹ Changvakonchu thangbaen tanii iruur yngkheh ing athar vokheh ymbasang, ‘Thangnang ing amanthiing vasahchu nang ing imaangva tamahra.’

¹⁰ Havi vathum phachak ing suwhsa, amanche aangkheng athar thangbaen ting ajekipa.

¹¹ Apha ichiinache Kesaria tanii kaningna envechiir pasar ynthum aenche kengongnii een nache vathengsae.

¹² Amana laetha inche kichu fhuwm ynvaerudeh ing enuw thoh sira taka ariir vokhehkho unae mee kuruk ae thohkho ynruw ingka, kenuw ing Kornelius eensung tingche varuwhsung.

¹³ Ama ing ynsaangkhe vaarmee ing a-eensungna vangiirka Joppa na mee chiirnana aruming Pitar ichii Simon chu varuwra taka ariirchu kaningna ariirpa.

¹⁴ Ama ing naningna chong iriirpeeh vaata, ama chong ajaarnache nang ingkho, na-eengkuw aangkheng ingkho manlaenpeeh phavanenta.

¹⁵ Ki ing ichong kabasentah nache, kenuw kentaklinakho amaensana ijuwngvaang ynthiing laetha inche entaklinache juwngsa.

¹⁶ Amana Johon ing chiina baptais yntupa, changvakonchu nenuw chuve ynthiing laetha nache baptais imantuvaata taka Aafhuw ing ariir chongchu ki ing kaansiisahpa.

¹⁷ Chukhaenache inuw ing Aafhuw Jesu Khrista ynthacha tahna, Thangnang ing ynning nakho ynchimchak kikthuur ipinave, kicha achuw ingka Thangnang chu khaam kata kachiiva!”

¹⁸ Enuw ing hava chong i ensiitah nache enghuw mandae aeka Thang-nang chu amanpahsah ae, “Reentaang mee ningnakho iringnii phanii khaena barungriir ihuung Thangnang ing arupa.”

Entiok na Ruwrthiing Nong

¹⁹ Stephen taklina isuwh ijachaam inche ynsaenong empha enuw inche Jehudi ae ningna pangche chongchu manchuw aeka Phonisia, Saipras vokhehkho Entiok emphapa.

²⁰ Changvakonchu engkaarna topoh aechuve Saipras vokhehkho Sairene pasar ynsuwh ae. Enuw ing Entiok nache enthengtah nache, Grik ae ningnakho Aafhuw Jesu chu tong aeka emanchuw ae.

²¹ Amana Aafhuw ruwreng inche enuw thoh ynruwhaksa, mee inempak inche thacha aeka Aafhuw ningtingche hungruwhsae.

²² Hava chong khaene Jerusalem na om ruwrthiing aphapa, chutahnache enuw ing Barnabas chu Entiok ting enchiirpa.

²³ Ama ing vatungka Thangnang ing mee aechu bor apeeh amutah nache arotha rohka enuw vakhaechu barungriir ingiirthoh ynruw ing Aafhuw ningnache apha vakhae-na omnii khaena aathohsahpae.

²⁴ Barnabas ichii i isa meeva, ynthiing laetha ing isip vokhehkho thachana ipir yngkhehva, amanche mee aajaeh Aafhuw ningting ahenruwva.

²⁵ Ama ing Sol chu ijongnii khaena Tarsas ting sisa.

²⁶ Ama ing Sol chu tuwhka Entiok ting ahenruwpa. Amana jinge tasa, enuw ing kumkheh chak sungna ruwrthiing aethoh purpak aeka mee aanem amanchuwpae; amanche Entiok nache thacha mee aechu amaensana Khristian enchii-pae.

²⁷ Apha havi sungne Jerusalem tanii jaephar ae Entiok nache thengsae.

²⁸ Enuw engkaar tanii aruming Agabus ichii yngkheh ing hangiirka laetha ruwreng ing ariir, laaruw paam aangkheng isah itaang omthongna. Havi Klodius iruwng aaniina suwhsa.

²⁹ Chutahnache Judia na ong thacha unae ae ningnache mee vakhae ing enchehsah inuwzii ing ibomsah ynthennii khaena sebok aenche chongiir enripa.

³⁰ Havi enuw ing tuaeka, Barnabas re Sol kikting seerchu mansir aeka ruwrthiing upa ae ningtingche envemanthakpa.