NONGDANG 10 - ITHAR CHONGHAK

Pitar vokhehkho Kornelius

¹ Kesaria nache Italia enchii laarchang ruwr chaama aapuh aruming Kornelius ichii pasar yngkheh ong.

² Ama ing a-eengkuw thohche Thangnang yndentahna, Thangnang achiisah, mee ningna inempak ipisahnii amanghuw vokhehkho apha vakhaena Thangnang ting athamsah mee ynsuwh.

³ Apha eekuw vakhae ahungtakna aruvaam nache ama ing iseengkiir ing vaarmee ing juwngka Kornelius taka chong abuwhchu amu.

⁴ Ama ing achiisah thoh ynruw ing enteehka ynchiiva Aafhuw taka ariir. Vaarmee inche aningna ariir, “Nang ing nathamsah vokhehkho ipeehtahnii namanghuw aangkheng Thangnang maana yndennii khaena tungsa.

⁵ Atarae Joppa na Pitar enchii Simon amachu ivaruwnii khaena mee chiir aera.

⁶ Atakchu shavin iseem nong atu chifhuw kuurna a-een om ama thohche onghaknae.”

⁷ Aningna chong ariir vaarmee inche aangkaenuwna, Kornelius ing ameenae mee ynniimeh re atak rukuum atu Thangnang yndentahna icheep laarchang yngkhehchu eenka,

⁸ eningnache iriirfhuw chong vakhae riirchirka Joppa phanii ing enuwchu achiirpae.

⁹ Atuknuwche enuw ing lam nache hungsiaeka khuwruung envephapha nache, Pitar ing apha kuruk taangna ithamnii khaena een chungting hangkarsa.

¹⁰ Amana Pitar aven ichaam ing thaemin saningka achiipa; enuw ing isahnii khaena ensir raenche ama ing ruvaamna amupa.

¹¹ Ama ing thangbaen ymmong vokhehkho iruungpak peehvaang ichii ithinnii yngkheh jungbukka arakiing manriina ynchuwka laruwna ijungbuw amu.

¹² Ama sungnache masing ikip, akhi manrii ipaar shava ae, laruwna yntor aeka isiae chaap vokhehkho minvaen vaati ynvae ae.

¹³ Amana iruur yngkheh ing aningna ariir, “Hangiir, Pitar, theh ae nana sara!”

¹⁴ Changvakonchu Pitar ing ariir, “Havi suwhmah dehrasii, Aafhuw! Ki utaraenkho imaang vokhehkho ynthiingmah peehchaap samahri ing.”

¹⁵ Avomanii aningna ariir, “Thangnang ing amanthiing vasahchu nang ing imaangva ichii ing mandenmahra.”

¹⁶ Havi jinge vathumchak asuwhnuwna, peehchu thangbaen ting ajekipa.

¹⁷ Amana Pitar ing ruvaamna amansiichu ynchiiva taka ataksahna fhuwm abavae raenche enruw, Kornelius ing avechiir pasar aenche Simon ongnii eenchu siiaeka suwngkung maana ngiir aeka,

¹⁸ Pitar ichii Simon tungnamo ta aeka ensii.

¹⁹ Pitar ing ruvaamna amunache amanden najaehrae laetha inche aningna ariir, “Rungaera, pasar ynthummeh aeng nangchu ynjongnah ae.

²⁰ Chukhaenache nang hangiir nana jungchumra, yntanga fhuwm ynvae omru ing sira, ki ing enuw i kajechiirpae.”

²¹ Pitar ing jungchumka eningnache ariir, “Nenuw ing nenjong meechu kiping; nenuw ynchii khaena ivatheng vachuw?”

²² Enuw ing embasang, “Laarchang chaama aapuh ynsuwh Kornelius ichii ichum mee, Thangnang chu achiipak vokhehkho Jehudi mee vakhae kaarna athang isana aruming isi a-een tingche ihenruwnii khaena vokhehkho naningtanii chong isiinii khaena ynthiing vaarmee inche ariirpeehpa.”

²³ Amatah nache ama ing enuwchu bariimsaka abathungpae. Atuknuwche ama ing enuw thohche sisa vokhehkho Joppa tanii unae thacha mee ae thohche sihakpohsae.

²⁴ Ama inii aanuwnache enuw ing Kesaria nache hungtungsae. Amana Kornelius ing eengkuw ynsuwh auw anae vokhehkho aarang arupae vakhaechu eenka enuwchu enghah ae.

²⁵ Pitar ing avaruwhtah nache jinge tasa, Kornelius ing atakchu bariim saka akhi nache vakhupka arumsahpa.

²⁶ Changvakonchu Pitar ing atakchu jemangiirka ariir, “Hangiirla, kikho meeping.”

²⁷ Pitar ing athaminchu Kornelius ningnache tongka eensung ting enghungruwh tahnache, mee hengongpoh aantuwhfhuwpa.

²⁸ Ama-na eningnache ama ing ariir, “Jehudi ynsuwh pasar yngkheh ing reentaang mee jaati thoh yntuwhhak changpang mahka hunganveer vaanveer itu aajaehmeh vajeer ikiiva ichii nenuw ing nemanghuwsa. Changvakonchu ki ing achuw yngkheh meechu imaangva vokhehkho ynthiing mahva ichii sakmah ichiichu Thangnang ing kaningna amandangpa.

²⁹ Chu-khaenache ki ynvaruwchu tahna chong yntanga manemru ing ivathengping. Chukhaenache nenuw ing ki ynvaruwchuw akhae ynchiiva kasiinahchuw.”

³⁰ Amana Kornelius ing ariir, “Inii nithum visa ki ing apha jingenne ka-eensungna apha eekuwna kathamsah raenche manghuw mangharu ing peen ynreen ing ynthong pasar yngkheh ing kamana ngiirka ariir,

³¹ ‘Kornelius, nathamsahkha kasiipa vokhehkho nang ing ipeehtahna namanghuwkha Thangnang maana yndennii ing omsa.

³² Chukhaenache Joppa ting chiir aengka aruming Pitar ichii Simon amachu va-eenruw, ama chifhuw kuurna shavin iseem nong atu Simon een nache tungna.’

³³ Amatah nache ki ing apha ichiinache naningting kavechiirpae, nang ivathengchii i inempak sakna. Chukhaenache Aafhuw ing naningna chonghak ympeeh aangkhengchu isiisahnii khaenache kenuw kengkheng ing atarae Thangnang maana ongsanung.”

Pitar Chongjeer

³⁴ Amana Pitar ichong abasen, “Atatak ing kamanghuwpa, Thangnang ing mee vakhaena adongchang tumahdeh.

³⁵ Jaat aangkheng Aafhuw achii vokhehkho isa nong atu mee chaap Aafhuw ing aruva.

³⁶ Aangkhengna Aafhuw Jesu Khrista ajaarna idae omna ichii isa chong jebathenka yntongchu nenuw ing nemanghuwsa.

³⁷ Johon ing baptais itu khaena atong aanuwna basenka Galili na ing Isrel paam aangkhengna yngkhiirchu nenuw ing nemanghuwmah changchii mahva,

³⁸ amachuve Nazaret Jesu khaenava, Thangnang ing ynsaangkhe ataklina ynthiing laetha re ruwreng chirka, Aafhuw ing hungsi vasi tuka isa nong atuva vokhehkho umlae ichuwng ae chaapchu amansakva ichii khaena chenva; yngkhaena ynchii imbe Thangnang ing Aafhuw thohche ynruwhaksae.

³⁹ Aafhuw ing Isrel ae paam nakho, Jerusalem nakho atu ari nongchaap asaarkhiichu kenuwpung; amanche enuw ing Aafhuw chu khros taklina jam aeka enthehpa.

⁴⁰ Chang-vakonchu Thangnang ing Aafhuw chu inii nithum ahenpha nache manringka amandangpa,

⁴¹ mee aangkheng ningna mahva changvakonchu Thangnang ing mamaenna aateer ae saarkhii om ae ningna chemba, amachuve Aafhuw ing ithii ae kaartanii ahangring aanuwna asahhak kenginhak keningna chemba.

⁴² Amanche mee ae ningnache isa chongchu itongnii khaena vokhehkho iring re ithii aechu vajeer Aafhuw Thangnang ing apeehchu Aafhuw havi iva ichiichu saarkhii ipeehnii inche Aafhuw ing keningna chonghak ympipa.

⁴³ Aafhuw khaena jaephar aeng saarkhii empisa, amachuve Aafhuw chu athacha mee vakhae ing ama aruming nache isii ikuhpeeh phasa vaatae.”

Reentaang mee aeng Ynthiing Laetha Engaraang

⁴⁴ Pitar ing achong raenche ynthiing laetha inche achongchu arungae vakhae ae ningnache juwngsa.

⁴⁵ Amana Pitar thoh ynruw ing itheng vinchiip mee aenche ngikpohsae, akhaechuve reentaang mee ae taklinakho kik-thuur ynthiing laethachu ajechirpa,

⁴⁶ yngkhaena ynchii imbe enuw ing reentaang reentaang chong ing chong aeka vokhehkho Thangnang emanpahchu enuw ing ensii.

⁴⁷ Apha ichiinache Pitar ing ichong, “Inuw thoh ynchim ing ynthiing laetha empha enuw ichu chiina baptais ituniimah khaena achuw yngkheh mee ing khaamcheh vaate?”

⁴⁸ Ama ing enuwchu Jesu Khrista rumingna baptais itunii khaena ariirpa. Amana enuw ing inii topoh icheengnii khaena enthamsahpa.