METHIU 8 - ITHAR CHONGHAK

Jesu ing mee yngkheh Amandam

¹ Jesu ing reen tanii ajungchum raenche mee inempak ing aanuw enjii.

² Changlaenche ichiisuwhpak ynchor laena ing ina mee yngkheh ing amaensokna akheerkhuwh mansinka athamsah, “Aafhuw, nang ing namanden vanave, ki ymmandam chehsachii.”

³ Amana Jesu ing abaen ithoh-ka atakchu parka ariir, “Ki ing kamandennah, nang damla. Aphachak nache ynchor ing inachu damsa.”

⁴ Amana Jesu ing aningna ariir, “Rungaera, achuw ningnakho riirmahra, changvakonchu jaethiim ningna chembe vaknana mansiira; amanche saarkhii omnii ing mee vakhae maekungna Mosi ningna chonghak apeeh inuwzii ing ipifhuwchu pira.”

Jesu ing Rom Iruung meenae Amandam

⁵ Jesu ing Kaparnaum ting ahungruwh raenche laarchang chaama aaruung yngkheh ing yntuwhfhuwka aningna ibomsahnii khaena athamsah,

⁶ “Aafhuw, kameenae yngkheh ipirpak ing nakka eenna ynlaap chehru ing ijaarniina yntorjaehka ijachaam aphanah achii.”

⁷ “Ki ing vakningka amachu mandam vakata,” taka Jesu ing abasang.

⁸ Changvakonchu laarchang chaama aaruung inche abasang, “Aafhuw, nang ing ka eenna thengvanachii matik chasamah ing; damrasiing ichii chong pangchu iriirpeehra, kameenaechu damjaeh vachii vatah,

⁹ akhaechuve kikho kachungna aatuaricheh iruung ae derna ongning vokhehkho kaderna laarchang omnae. Amana ki ing laarchang yngkheh ningna sira kachiitahna sina, reentaang laarchang yngkhehting huungla kachiitahna huungna, amanche kasuwh ningna havi tura kachiitahna atunah.”

¹⁰ Jesu ing ama chongchu asiitahna ngikka aanuw ajii mee ae ningna ariir, “Ki ing neningna atatak ing kariirnah, jinge ichii ing athacha om mee Isrel sungna tuwhmahri ing.

¹¹ Ki ing neningna kariirnah amachuve, thangbaen iruwng lipahna iniisuwhtah tanii vokhehkho taetah tanii mee thengnaka Abraham, Isak amanche Jakop buumna imaarnii khaena ongvaatae.

¹² Changvakonchu iruwng lipah sitiae chuve ynthim sungting renvaata; amana enuw ing engha iriir ae naka chapvaatae.”

¹³ Amana Jesu ing laarchang chaama aaruung tingche ariir, “Yngkaera, nang nathacha inuwzii ing namandenchu ynsuwhrasiing.” Amana iruung meenae chu aphachak nache damsa.

Jesu ing mee inempak Amandam

¹⁴ Jesu ing Pitar eenting avakcha Pitar ampuw ijaarniina riitheng ing hejaarchu amupa.

¹⁵ Jesu ing Pitar ampuwchu akikna ajepartah nache ariithengchu damsa. Amana hangsuwka Jesu chu abariimsah.

¹⁶ Ama khuri nache umlae ing ichuwng mee aechu mee aenche enveruw, amana umlae vakhaechu Jesu ing athurpeeh chirpae vokhehkho ina chaap ae chukho amandampa.

¹⁷ Havi Jaephar Isaia ing ariir vasahchu hungchumsa, “Atakrap ing inuw ynlaena aasuwchirpa vokhehkho riirae omchaap areenchirpa.”

Jesu Aanuw Jiivachii

¹⁸ Jesu ing abuumting mee inempak ivathengchu amanghuw tahnache asebok aeting chiiding laarting isinii khaena amanthang.

¹⁹ Changlae thiim-thang yngkheh ing vakka aningna ariir, “Oja, nang nasinii vakhaena jiiva kachii.”

²⁰ Jesu ing abasang, “Imi aeve enruwhnii engkhur omna amanche minvaenna vaati aekho enrabuw omna, changvakonchu Mee Sapa chuve aja basumnii aantornii omah.”

²¹ Amana reentaang sebok yngkheh ing aningna ariir, “Aafhuw, yngkaeningka kapa ithiichu maensa ing rijapkata.”

²² Changvakonchu Jesu ing aningna abasang, “Kaanuw ijiira, ithii aengkhe ithii aechu riae rasiing.”

Jesu ing khuwsii ynleh Amandae

²³ Jesu ing ruwkuwng ting hang-karka asebok aenche aanuwchu jiiaeka sisae.

²⁴ Amanache enruw, ipirpak khuwsii ynlehka chifhuwchu aanohpa, amana ruwkuwngchu chiiting rupvachii ing omsa, changlaenche Jesu chuve ijaar.

²⁵ Amana sebok aenche hungbasuw aeka enriir, “Aafhuw, thik ynthongnung ikarsar.”

²⁶ Jesu ing abasang ae, “Ynchii khaena nenuw hangjaehmeh ynchik vachuw; ‘Aajaehmeh nenthacha isiing-va!’ Amana hangiirka khuwsii ynleh re chii ynnohchu rukuhka daerengsa.”

²⁷ Amana engkhenglaang ngik aeka enriir, “Hava mee i ynchii meeva!” khuwsii ynleh vokhehkho chii ynnoh aengkho achongriir emanjii i.

Jesu ing umlae ichuwng meeniimeh Amandam

²⁸ Jesu ing chiiding laar Gadara ichii paam nache ahuunglae thaenkung tanii hungsuwh umlae ing ichuwng mee ynniimeh aeng Jesu engaantuwhfhuw. Enuw ae i aajaehmeh ichiisuwhpae ynchii imbe achuw ingkho ama lamchu ijii achehmahva.

²⁹ Amana enuw ing va ung aeka enriir, “O Thangnang sapa, nang ing keningna ynchii tukata nachiiva? Apha ahenphamah rirae kenuw ijachaam pinii ithengvachii!”

³⁰ Changlaenche engongnii thoh aasen yndahmah ing voh inempak imaar ae.

³¹ Amana umlae aenche Jesu ningna enthamsah, “Kenuw i ithurva nachii vanave voh ae kaarting ibathensara.”

³² Jesu ing umlae ae ningna ariir, “Nenuw ongmahruw.” Amana enuw ing hungsuwh aeka voh ae sungting ruwhsae amanche enruw, voh aangkheng jungtaen aeka chiiding tingche ruwhsae vokhehkho thikchirsae.

³³ Voh aacheer aenche khuwruung ting hungtaen aeka isuwh chaap entong, amanche umlae ing ichuwng ae taklina isuwh chukho entong.

³⁴ Chukhaenache mee vakhae ing Jesu chu vaantuwhfhuw aeka vokhehkho engkhuwveen bathennii khaena enthamsah.