METHIU 6 - ITHAR CHONGHAK

Ipeehtah khaena mee Ynchuwpeeh

¹ “Mee ae ing ymmunii khaena isa nong nentuchu emaensokna yndang ing ituniimah inche nenbarungriir manruwhruw; changmah nave thangbaenna ong nenpa ningtanii nenphafhuw nongmen omah.”

² “Chukhaenache isachaang atu aeng mee ing imanpah rasiing ta aeka meekongniina vokhehkho lamna entu vaangkhe, nenuw ing isa nong nenturae nemaensokna khuwng ibeeng mahruw. Ki ing neningna atatak ing kariirnah, enuwkha enongmen emphapa.

³ Changvakonchu napeeh raenche natachang ing napeehkha natari ing manghuwmah rasiing,

⁴ amana chembe yndangmah ing natu isa nongchu ynruwhjaeh ing amu nangpa inche yndang ing nongmen ipivaata.”

Ithamnii khaena Ynchuwpeeh

⁵ “Nenuw ing nenthamsah raenche isachaang atu mee ae khavaang tamahruw; enuw chuve mee vakhaeng imunii khaena lam kuurna vokhehkho meekongniina yndang engadiknah. Ki ing neningna atatak ing kariirnah, enuw chuve enongmen emphapa.

⁶ Changvakonchu nang ing nathamsah raenche eensung ting hungruwh nana, eenkhaar kamnana thamsara amanche nangpa inche imunaka nongmen ipivaata.”

⁷ “Nenuw ing nenthamsah raenche reentaang mee ae vaang chongkha nuummahruw, nuumnungve ibasang vaata ichii ing emandenva.

⁸ Chu-khaenache enuw vaangkhe nenuw tamahruw, nenpa Thangnang ing nentaklina ivaehkha nenthamsah mahrirae amanghuw vasahva.

⁹ Chu-khaenache jinge thamruw: ‘Thangbaenna ong kempa Thangnang: Naruming ynthiing ynsuwhrasiing;

¹⁰ Naaruwng lipahchu thengrasiing; thangbaenna namanden vaang laaruw paam nenkho namanden ynsuwh rasiing.

¹¹ Kenuwchu anasiirna kensahfhuw thaemin ipisar,

¹² Kentaklina isii ikha atu mee aechu kengkuhpeeh vaang, kentaklina isii ikha omchaap ikuhpeehsar.

¹³ Batheem tingche kenuwchu ibabuw samah, vokhehkho isii ikha tanii ikarsar.’ ”

¹⁴ “Nentaklina isii ikha atu mee aechu kuhpeeh tanuwve, thangbaenna ong nenpa ingkho nenuwchu ikuhpeeh vaata;

¹⁵ changvakonchu nentaklina isii ikha atu mee aechu kuhpeehmah tanuwve, nenpa ingkho ikuhpeeh chehmahnii.”

Maaru itong khaena Ynchuwpeeh

¹⁶ “Nenuw ing maaru nentonglae isachaang atu mee ae vaangkhe mee ing imurasiing tanuwna yndang ing tumahruw. Ki ing neningna atatak ing kariirnah, enuw enongmen emphapa.

¹⁷ Changvakonchu nenuw chuve maaru nentonglae nenrusae richiithou itaehpeh nuwna amanche nemae chukho phuwpehruw,

¹⁸ amanachen vaang maaru nentongchu mee ae ing manghuwcheh mahnii ae, nenpa pang inche manghuw vaata. Amanche ynruwhjaeh ing ymmu nenpa ing neningna nongmen ipivaata.”

Thangbaenna Savangnii

¹⁹ “Risa vokhehkho jorhing ing savachii amanche lamruw ing bakhii naka baruwhcheh vachii laaruw paamne lerchii mangkongpoh mahruw.

²⁰ Changvakonchu risa vokhehkho korhing ing asahchehmah amanche lamruw ingkho baruwh chehmah vachii thangbaen nache nenlerchii mangkongruw.

²¹ Nenlerchii omnii apham nache nenbarungriir chukho ombaata.”

Hakchaang Rengnii

²² “Mik inge hakchaang jaemi chuva; chukhaenache namik bareng chumnave, natak aangkheng reng-vaanta.

²³ changvakonchu namik bareng chummah nave, natak aang-kheng manthim vaanta. Chukhaenache nataklina irengchu manthim nave, aajaemeh manthim vaate!”

Thangnang re Lerchii

²⁴ “Achuw ingkho aafhuw ynniimeh meenae ynsuwh chehmah; akhaechuve yngkhehchu aning mansiih mahnave, yngkhehchu aning mansiih vaata, vokhehkho yngkheh ningna abarungriir manruwhdeh nave, yngkheh tingche barungriir manruwhmahnii. Thang-nang re lerchii aaniimeh ing anong ituhak rumahnii.”

²⁵ “Chukhaenache ki ing neningna kariirnah, iringnii khaena ynchii savakate, invakate vokhehkho ynchii peendiir niivakate ichii ing nenbarungriir manjamahruw. Isah-fhuw chungna iringnii ing vokhehkho peendiir chungna hakchaang ing ruwhakmah khang?

²⁶ Vaati ae i enruw, enuw sachii kho basaemah ae, ikuumkho kuummah ae amanche itom tingkho mangkongmah ae, chang-vakonchu thangbaenna ong nenpa ing ensahfhuw apeehsae. Enuw chungna nenuw ing nemen ruwhakmah khang?

²⁷ Nenuw achuw yngkheh nenbarungriir ajatahna aringkum khudup yngkheh amanthichehse?”

²⁸ “Nenuw peendiir khaenache ynchii khaena nenbarungriir ijaava? Lampana rii ipaar ae i enruw, yntanga turu ae ing muwngnae vokhehkho paarjaeh tahnae.

²⁹ Chukhaenache ki ing neningna kariirnah, Solomon iruwng alerchii ompakrap ingkho enuwvaang peendiir deenmah.

³⁰ Changche ichii ing atanii ringnaka atuknii mi sungting renvaanchii rapkho Thangnang ing isajaeh ing rukuum atunuw chembe, nenuw chuve iruwpak ing itumahnii khang? O thacha isiing ae!”

³¹ “Chutahnache ynchii savakente, ynchii invakente changmahka ynchii niivakente tanuwna nenbarungriir manjamahruw.

³² Hava vakhae i reentaang mee ae ing iphanii khaena enjongnah; amana thangbaenna ong nenpa ing nenvaehnii aangkheng havi amanghuwsa.

³³ Changvakonchu amaensana Thangnang iruwng lipah vokhehkho ichum ynthiingchu jongruw, amana peeh aangkhenglaang havi neningna ipivaata.

³⁴ Chukhaenache atuknii khaena nenbarungriir man-jamahruw, atuknii khaena chembe atuknii barungriir jasavaata. Nikheh khaena ija ing nikheh rutum rasiing.”