METHIU 5 - ITHAR CHONGHAK

Bungna Isa Chong Atong

¹ Jesu ing mee inempakchu amutahna ama ing reen ting hangkarka aonglae asebok ae ing abuum ting vathengsae.

² Amana Jesu ing mee vakhaechu ynchuw abasenpa:

Ichum Bor Aphamee

³ “Laethana yntuur mee aechu bor aphapae, thangbaen paamchu enrutum vaata!

⁴ ‘Ichap ichuw mee aechu bor aphapae, enuw ing rotharoh phavaatae!’

⁵ “Ynjuursah mee aechu bor aphapae, laaruw paam enrutum vaata!

⁶ ‘Ichum ynthiing khaena venchaam chiilaar apha mee aechu bor aphapae, enuw ipendeh inche sipvaatae!’

⁷ ‘Ningchuwh adeen mee aechu bor aphapae; enuw ing ningchuwhchu phavaatae!

⁸ “Barungriir ynthiing aechu bor aphapae, enuw ing Thangnang muvaatae!

⁹ ‘Idae omnii khaena nong atu aechu bor aphapae; enuwchu Thangnang siti tavaatae!’

¹⁰ ‘Ichum ynthiing khaena ijachaam apha aechu bor aphapae, thangbaen paamchu enrutum vaata!’

¹¹ ‘Nentaklina mee ae ing ningjak ipiae naka vokhehkho imanang ae naka amanche isamah tangmah riir ae nave bor nenphava, akhaechuve nenuw i kaanuw ijiichu vachuw.

¹² Nenrotha manrohruw vokhehkho nungaesaruw, thangbaen nache nenphafhuw iruungpak omna, nemaana hesivasah Thangnang Jaephar aekho changche ijachaam emphava.’ ”

Bachii re Ireng

¹³ “Nenuw laaruw paam bachii vachuw. Changvakonchu bachii inche achiiniichu omah nave, ynsaangkhe athar manchiicheh vatakhang? Chang-chii bachii chuve renmanuwka mee ae ing chiiniimah naka ikanii yntanga omah.”

¹⁴ “Nenuw laaruw paam irengchu vachuw. Reenna om khuwruungchu ithuur rumah,

¹⁵ amanche achuw ingkho jaemi barengka buruk mangkhummah; changvakonchu jaemi asiihnii nache siika eensung aangkheng aennah.”

¹⁶ Havi vaange neningna irengchu mee ae maana aenrasiing, amana chembe nenuw ing isa nong nentuchaap muae naka thangbaenna ong nenpachu manpah vaatae.

Vajeer Chonghak Ynchuwpeeh

¹⁷ “Ki i vajeer chonghak vokhehkho Jaephar ae chongchu mamaangnii khaena ijuwngva ichii ing imanden mahruw; ki chuve aamaang ijuwng mahping changvakonchu ahungchum chirnii khaena ijuwngping.

¹⁸ Ki ing havi khaena neningna atatak ing kariirnah, thangbaen vokhehkho laaruw paam achimahri raentaang vajeer chonghak tanii achiih tikho areer asuwhmahri taangche maangmahnii.

¹⁹ Chutahnache achuw yngkheh ing chonghak kaarna aasiingseh yngkhehchu bakhiinaka mee manchuw nave thangbaen paamna isiinghak mee chuvaata, changvakonchu achuw yngkheh ing chonghak inuwzii ing mee manchuw nave ama meechu thangbaen paamna ruungvaata.

²⁰ Neningna kariirnah, nenuw ing ichum ynthiing nache thiimthang aere Pharisi ae ichum ynthiing aechu kheermah tanga tanuwka utaraenkho thangbaen paam tungchehmah tanuw.”

Barungsii khaena Ynchuwpeeh

²¹ “Mee itheh rumahnii, achuw yngkheh ing mee thehnave vajeer derna ijachaam phavaata ichiichu ajae nensii vasahva.

²² Ki ing neningna kariirnah, achuw yngkheh ing auw anae taklina ahuwnii denniichah ing athir fhuwrnave, vajeer derna ijachaam phavaata, amanche achuw yngkheh ing auw anaechu ningjak pinave, aanchungpuh ae vajeer phavaata, vokhekho achuw yngkheh ing ‘ipang nang’ tanave longkong mi sungna ijachaam phavaata.

²³ Chukhaenache nang ing thiimkungna ipeehfhuw peeh pikata tataniika najechirae nauw nanae taklina nanungaeniimah om ynsii taniive,

²⁴ napeehchu thiimkung maanache mara vokhehkho ynrinana amaensana nauw nanae thohche aanrunii tura, amanache huungnana napeehchu thimmkung nache pira.”

²⁵ “Nangchu miraar ympeeh mee thohkhe vajeer itu nenphamah rirae ynrujapruw; changmahnave ama ing vajeer aafhuw kikting ipivaata, amanache vajeer aafhuw ing aarung mee kikting ipinaka kaeshum ting ynthin vaata.

²⁶ Ki ing naningna atatak ing kariirnah, nalertuur nasingkiir mahtaang kaesum tanii hungsuwh rumahnii.”

Reentaang rumee fhuwsar taklina ichuwhmah itu khaena Ynchuwpeeh

²⁷ “Reentaang rumee fhuwsar taklina ichuwhmah itu rumahnii ichii nenuw ing nensiipa.

²⁸ changvakonchu ki ing neningna kariirnah, rupanuw yngkheh taklina barungriir aasumpak ing a-en mee vakhae inche abarungriirna ama thohche ichuwhmah atupa.

²⁹ Namik tachang ing isii ting ababuknii vachii vanave iphernana ren; natak aangkheng longkong ting bukvanachii changve nataklitanii asae yngkheh omah ing nakhaena saksehna.

³⁰ Nakik tachang ing isii ting ibabuknii vachii vanave tennana ren; natak aangkheng longkong ting bukvanachii changve nataklitanii asae yngkheh omah ing nakhaena saksehna.”

Rumee Saanglam ynsae khaena Ynchuwpeeh

³¹ “Achuw yngkheh ing arumee yn-saefhuw kata tanave, aningna ynsaenii chongthen pirasiing ichii omna.”

³² Changvakonchu ki ing neningna kariirnah, ichuwhmah atu khaena mahnaka rupanuw aansaefhuw mee chaap ing arumeechu ichuwhmah amanguurva, amanche achuw yngkheh ing rumee saanglaam ynsaevasah rupanuw buwhnave, ama meechu ichuwhmah nong atuva.

Saarkhii itu khaena mee Ynchuwpeeh

³³ “Isivasahna ariir chukho nensiipa, ‘Ynraar ing saarkhii tumah changvakonchu Aafhuw ningna saarkhii natuchu nong ing tura.’

³⁴ Chukhaenache neningna kariirnah, Thangnang ongnii thangbaen ruming parnuwna chongreep tumahruw,

³⁵ changmahka Thangnang khi chuwngnii laaruw paam rumingna changmah naka iruungpak iruwng ongnii khuwruung Jerusalem ruming nakho chongreep tumahruw.

³⁶ Nang ing narusae bachuw nana chongreep tumahra, akhaechuve nang ing nasam yngkhehkho manpuur kata changmahka mandupkata ichii chehmahchii.

³⁷ Chutahnache naru chong chuve ung tajaehtah amanche rumah taniive rumah ing tajaehtah; havi chungna athi ing ichong chuve ichamah suwhnii vatah.”

Huwthung khaena mee Ynchuwpeeh

³⁸ “Mik yngkheh changdenna mik yngkheh vokhehkho ha yngkheh changdenna ha yngkheh ichii chong i nenuw ing nensiipa.”

³⁹ Changvakonchu ki ing neningna kariirnah, nentaklina araar mee ningnakhe huwthung mahruw. Changvakonchu achuw yngkheh ing naabeeng tachangna eebeeng nave, paangkheh tingkho dura.

⁴⁰ Vokhehkho achuw yngkheh ing isuwrnaka narungop rikata tanave napeenkho pira.

⁴¹ Amanche achuw yngkheh ing meil yngkheh sita atateeh nave, meil ynnii sihakruw.

⁴² Na-ningna aadik peehchae ynniihchu pira, amanche ynfhuwh chukho damahra.

Ningsiih Khaena

⁴³ “Naveenchaang aechu naning mansiih vokhehkho ynrumah mee aechu batirla ichii chongchu nenuw ing nensiipa.

⁴⁴ Changvakonchu ki ing neningna kariirnah, ynjeehnii mee aechu nening mansiihruw, siraap ympiaechu bor piaeruw, ymbatir mee ae ningna isa turuw, yngensiimah ae vokhehkho ijachaam ympiae khaenache thampeeh aeruw.

⁴⁵ Amana chembe thangbaenna ong Thangnang sitichu ynsuwhva nenta, akhaechuve isamah vokhehkho isa aaniimeh taklina inii abasuwhna amanche khuwkho amansuwrnah.

⁴⁶ Aning ymmansiih mee ae chupang nening mansiih tanuwcha ynchii nongmen phava nenchii omkhang? Ree ikhuum mee aerap ingkho changche ichii ing tumah ae khang?

⁴⁷ Nenguw nenae pangchu bariim tanuwcha, mee reentaang ae chungna ynchii nentuse? Reentaang mee aerap ingkho changche tumah ae khang?

⁴⁸ Chukhaenache thangbaenna ong nenpa ing araarmah dehvaang nenuwkho raarmah dehruw.”